Chapter 80

tataḥ paulastya sacivāḥ śrutvā cendrajitaṃ hatam |
ācacakṣurabhijñāya daśagrīvāya savyathāḥ || 1 ||
[Analyze grammar]

yuddhe hato mahārāja lakṣmaṇena tavātmajaḥ |
vibhīṣaṇasahāyena miṣatāṃ no mahādyute || 2 ||
[Analyze grammar]

śūraḥ śūreṇa saṃgamya saṃyugeṣvaparājitaḥ |
lakṣṇanena hataḥ śūraḥ putraste vibudhendrajit || 3 ||
[Analyze grammar]

sa taṃ pratibhayaṃ śrutvā vadhaṃ putrasya dāruṇam |
ghoramindrajitaḥ saṃkhye kaśmalaṃ prāviśanmahat || 4 ||
[Analyze grammar]

upalabhya cirāt saṃjñāṃ rājā rākṣasapuṃgavaḥ |
putraśokārdito dīno vilalāpākulendriyaḥ || 5 ||
[Analyze grammar]

hā rākṣasacamūmukhya mama vatsa mahāratha |
jitvendraṃ kathamadya tvaṃ lakṣmaṇasya vaśaṃ gataḥ || 6 ||
[Analyze grammar]

nanu tvamiṣubhiḥ kruddho bhindyāḥ kālāntakāvapi |
mandarasyāpi śṛṅgāṇi kiṃ punarlakṣmaṇaṃ raṇe || 7 ||
[Analyze grammar]

adya vaivasvato rājā bhūyo bahumato mama |
yenādya tvaṃ mahābāho saṃyuktaḥ kāladharmaṇā || 8 ||
[Analyze grammar]

eṣa panthāḥ suyodhānāṃ sarvāmaragaṇeṣvapi |
yaḥ kṛte hanyate bhartuḥ sa pumān svargamṛcchati || 9 ||
[Analyze grammar]

adya devagaṇāḥ sarve lokapālāstatharṣayaḥ |
hatamindrajitaṃ dṛṣṭvā sukhaṃ svapsyanti nirbhayāḥ || 10 ||
[Analyze grammar]

adya lokāstrayaḥ kṛtsnāḥ pṛthivī ca sakānanā |
ekenendrajitā hīnā śūṇyeva pratibhāti me || 11 ||
[Analyze grammar]

adya nairṛtakanyāyāṃ śroṣyāmyantaḥpure ravam |
kareṇusaṃghasya yathā ninādaṃ girigahvare || 12 ||
[Analyze grammar]

yauvarājyaṃ ca laṅkāṃ ca rakṣāṃsi ca paraṃtapa |
mātaraṃ māṃ ca bhāryāṃ ca kva gato'si vihāya naḥ || 13 ||
[Analyze grammar]

mama nāma tvayā vīra gatasya yamasādanam |
pretakāryāṇi kāryāṇi viparīte hi vartase || 14 ||
[Analyze grammar]

sa tvaṃ jīvati sugrīve rāghave ca salakṣmaṇe |
mama śalyamanuddhṛtya kva gato'si vihāya naḥ || 15 ||
[Analyze grammar]

evamādivilāpārtaṃ rāvaṇaṃ rākṣasādhipam |
āviveśa mahān kopaḥ putravyasanasaṃbhavaḥ || 16 ||
[Analyze grammar]

ghoraṃ prakṛtyā rūpaṃ tattasya krodhāgnimūrchitam |
babhūva rūpaṃ rudrasya kruddhasyeva durāsadam || 17 ||
[Analyze grammar]

tasya kruddhasya netrābhyāṃ prāpatannasrabindavaḥ |
dīptābhyāmiva dīpābhyāṃ sārciṣaḥ snehabindavaḥ || 18 ||
[Analyze grammar]

dantān vidaśatastasya śrūyate daśanasvanaḥ |
yantrasyāveṣṭyamānasya mahato dānavairiva || 19 ||
[Analyze grammar]

kālāgniriva saṃkruddho yāṃ yāṃ diśamavaikṣata |
tasyāṃ tasyāṃ bhayatrastā rākṣasāḥ saṃnililyire || 20 ||
[Analyze grammar]

tamantakamiva kruddhaṃ carācaracikhādiṣum |
vīkṣamāṇaṃ diśaḥ sarvā rākṣasā nopacakramuḥ || 21 ||
[Analyze grammar]

tataḥ paramasaṃkruddho rāvaṇo rākṣasādhipaḥ |
abravīd rakṣasāṃ madhye saṃstambhayiṣurāhave || 22 ||
[Analyze grammar]

mayā varṣasahasrāṇi caritvā duścaraṃ tapaḥ |
teṣu teṣvavakāśeṣu svayambhūḥ paritoṣitaḥ || 23 ||
[Analyze grammar]

tasyaiva tapaso vyuṣṭyā prasādācca svayambhuvaḥ |
nāsurebhyo na devebhyo bhayaṃ mama kadā cana || 24 ||
[Analyze grammar]

kavacaṃ brahmadattaṃ me yadādityasamaprabham |
devāsuravimardeṣu na bhinnaṃ vajraśaktibhiḥ || 25 ||
[Analyze grammar]

tena māmadya saṃyuktaṃ rathasthamiha saṃyuge |
pratīyāt ko'dya māmājau sākṣādapi puraṃdaraḥ || 26 ||
[Analyze grammar]

yattadābhiprasannena saśaraṃ kārmukaṃ mahat |
devāsuravimardeṣu mama dattaṃ svayambhuvā || 27 ||
[Analyze grammar]

adya tūryaśatairbhīmaṃ dhanurutthāpyatāṃ mahat |
rāmalakṣmaṇayoreva vadhāya paramāhave || 28 ||
[Analyze grammar]

sa putravadhasaṃtaptaḥ śūraḥ krodhavaśaṃ gataḥ |
samīkṣya rāvaṇo buddhyā sītāṃ hantuṃ vyavasyata || 29 ||
[Analyze grammar]

pratyavekṣya tu tāmrākṣaḥ sughoro ghoradarśanān |
dīno dīnasvarān sarvāṃstānuvāca niśācarān || 30 ||
[Analyze grammar]

māyayā mama vatsena vañcanārthaṃ vanaukasām |
kiṃ cideva hataṃ tatra sīteyamiti darśitam || 31 ||
[Analyze grammar]

tadidaṃ satyamevāhaṃ kariṣye priyamātmanaḥ |
vaidehīṃ nāśayiṣyāmi kṣatrabandhumanuvratām |
ityevamuktvā sacivān khaḍgamāśu parāmṛśat || 32 ||
[Analyze grammar]

uddhṛtya guṇasaṃpannaṃ vimalāmbaravarcasaṃ |
niṣpapāta sa vegena sabhāyāḥ sacivairvṛtaḥ || 33 ||
[Analyze grammar]

rāvaṇaḥ putraśokena bhṛśamākulacetanaḥ |
saṃkruddhaḥ khaḍgamādāya sahasā yatra maithilī || 34 ||
[Analyze grammar]

vrajantaṃ rākṣasaṃ prekṣya siṃhanādaṃ pracukruśuḥ |
ūcuścānyonyamāśliṣya saṃkruddhaṃ prekṣya rākṣasāḥ || 35 ||
[Analyze grammar]

adyainaṃ tāv ubhau dṛṣṭvā bhrātarau pravyathiṣyataḥ |
lokapālā hi catvāraḥ kruddhenānena nirjitāḥ |
bahavaḥ śatravaścānye saṃyugeṣvabhipātitāḥ || 36 ||
[Analyze grammar]

teṣāṃ saṃjalpamānānāmaśokavanikāṃ gatām |
abhidudrāva vaidehīṃ rāvaṇaḥ krodhamūrchitaḥ || 37 ||
[Analyze grammar]

vāryamāṇaḥ susaṃkruddhaḥ suhṛdbhirhitabuddhibhiḥ |
abhyadhāvata saṃkruddhaḥ khe graho rohiṇīmiva || 38 ||
[Analyze grammar]

maithilī rakṣyamāṇā tu rākṣasībhiraninditā |
dadarśa rākṣasaṃ kruddhaṃ nistriṃśavaradhāriṇam || 39 ||
[Analyze grammar]

taṃ niśāmya sanistriṃśaṃ vyathitā janakātmajā |
nivāryamāṇaṃ bahuśaḥ suhṛdbhiranivartinam || 40 ||
[Analyze grammar]

yathāyaṃ māmabhikruddhaḥ samabhidravati svayam |
vadhiṣyati sanāthāṃ māmanāthāmiva durmatiḥ || 41 ||
[Analyze grammar]

bahuśaścodayāmāsa bhartāraṃ māmanuvratām |
bhāryā bhava ramasyeti pratyākhyāto'bhavanmayā || 42 ||
[Analyze grammar]

so'yaṃ māmanupasthānādvyaktaṃ nairāśyamāgataḥ |
krodhamohasamāviṣṭo nihantuṃ māṃ samudyataḥ || 43 ||
[Analyze grammar]

atha vā tau naravyāghrau bhrātarau rāmalakṣmaṇau |
mannimittamanāryeṇa samare'dya nipātitau |
aho dhinmannimitto'yaṃ vināśo rājaputrayoḥ || 44 ||
[Analyze grammar]

hanūmato hi tadvākyaṃ na kṛtaṃ kṣudrayā mayā |
yadyahaṃ tasya pṛṣṭhena tadāyāsamaninditā |
nādyaivamanuśoceyaṃ bharturaṅkagatā satī || 45 ||
[Analyze grammar]

manye tu hṛdayaṃ tasyāḥ kausalyāyāḥ phaliṣyati |
ekaputrā yadā putraṃ vinaṣṭaṃ śroṣyate yudhi || 46 ||
[Analyze grammar]

sā hi janma ca bālyaṃ ca yauvanaṃ ca mahātmanaḥ |
dharmakāryāṇi rūpaṃ ca rudatī saṃsramiṣyati || 47 ||
[Analyze grammar]

nirāśā nihate putre dattvā śrāddhamacetanā |
agnimārokṣyate nūnamapo vāpi pravekṣyati || 48 ||
[Analyze grammar]

dhigastu kubjāmasatīṃ mantharāṃ pāpaniścayām |
yannimittamidaṃ duḥkhaṃ kausalyā pratipatsyate || 49 ||
[Analyze grammar]

ityevaṃ maithilīṃ dṛṣṭvā vilapantīṃ tapasvinīm |
rohiṇīmiva candreṇa vinā grahavaśaṃ gatām || 50 ||
[Analyze grammar]

supārśvo nāma medhāvī rāvaṇaṃ rākṣaseśvaram |
nivāryamāṇaṃ sacivairidaṃ vacanamabravīt || 51 ||
[Analyze grammar]

kathaṃ nāma daśagrīva sākṣādvaiśravaṇānuja |
hantumicchasi vaidehīṃ krodhāddharmamapāsya hi || 52 ||
[Analyze grammar]

veda vidyāvrata snātaḥ svadharmanirataḥ sadā |
striyāḥ kasmādvadhaṃ vīra manyase rākṣaseśvara || 53 ||
[Analyze grammar]

maithilīṃ rūpasaṃpannāṃ pratyavekṣasva pārthiva |
tvameva tu sahāsmābhī rāghave krodhamutsṛja || 54 ||
[Analyze grammar]

abhyutthānaṃ tvamadyaiva kṛṣṇapakṣacaturdaśīm |
kṛtvā niryāhyamāvāsyāṃ vijayāya balairvṛtaḥ || 55 ||
[Analyze grammar]

śūro dhīmān rathī khaḍgī rathapravaramāsthitaḥ |
hatvā dāśarathiṃ rāmaṃ bhavānprāpsyati maithilīm || 56 ||
[Analyze grammar]

sa taddurātmā suhṛdā niveditaṃ vacaḥ sudharmyaṃ pratigṛhya rāvaṇaḥ |
gṛhaṃ jagāmātha tataśca vīryavānpunaḥ sabhāṃ ca prayayau suhṛdvṛtaḥ || 57 ||
[Analyze grammar]