Chapter 70

rāghavaścāpi vipulaṃ taṃ rākṣasavanaukasām |
śrutvā saṃgrāmanirghoṣaṃ jāmbavantamuvāca ha || 1 ||
[Analyze grammar]

saumya nūnaṃ hanumatā kṛtaṃ karma suduṣkaram |
śrūyate hi yathā bhīmaḥ sumahānāyudhasvanaḥ || 2 ||
[Analyze grammar]

tadgaccha kuru sāhāyyaṃ svabalenābhisaṃvṛtaḥ |
kṣipramṛṣkapate tasya kapiśreṣṭhasya yudhyataḥ || 3 ||
[Analyze grammar]

ṛkṣarājastathetyuktvā svenānīkena saṃvṛtaḥ |
āgacchat paścimadvāraṃ hanūmānyatra vānaraḥ || 4 ||
[Analyze grammar]

athāyāntaṃ hanūmantaṃ dadarśarkṣapatiḥ pathi |
vānaraiḥ kṛtasaṃgrāmaiḥ śvasadbhirabhisaṃvṛtam || 5 ||
[Analyze grammar]

dṛṣṭvā pathi hanūmāṃśca tadṛṣkabalamudyatam |
nīlameghanibhaṃ bhīmaṃ saṃnivārya nyavartata || 6 ||
[Analyze grammar]

sa tena harisainyena saṃnikarṣaṃ mahāyaśāḥ |
śīghramāgamya rāmāya duḥkhito vākyamabravīt || 7 ||
[Analyze grammar]

samare yudhyamānānāmasmākaṃ prekṣatāṃ ca saḥ |
jaghāna rudatīṃ sītāmindrajid rāvaṇātmajaḥ || 8 ||
[Analyze grammar]

udbhrāntacittastāṃ dṛṣṭvā viṣaṇṇo'hamariṃdama |
tadahaṃ bhavato vṛttaṃ vijñāpayitumāgataḥ || 9 ||
[Analyze grammar]

tasya tadvacanaṃ śrutvā rāghavaḥ śokamūrchitaḥ |
nipapāta tadā bhūmau chinnamūla iva drumaḥ || 10 ||
[Analyze grammar]

taṃ bhūmau devasaṃkāśaṃ patitaṃ dṛśya rāghavam |
abhipetuḥ samutpatya sarvataḥ kapisattamāḥ || 11 ||
[Analyze grammar]

asiñcan salilaiścainaṃ padmotpalasugandhibhiḥ |
pradahantamasahyaṃ ca sahasāgnimivotthitam || 12 ||
[Analyze grammar]

taṃ lakṣmaṇo'tha bāhubhyāṃ pariṣvajya suduḥkhitaḥ |
uvāca rāmamasvasthaṃ vākyaṃ hetvarthasaṃhitam || 13 ||
[Analyze grammar]

śubhe vartmani tiṣṭhantaṃ tvāmāryavijitendriyam |
anarthebhyo na śaknoti trātuṃ dharmo nirarthakaḥ || 14 ||
[Analyze grammar]

bhūtānāṃ sthāvarāṇāṃ ca jaṅgamānāṃ ca darśanam |
yathāsti na tathā dharmastena nāstīti me matiḥ || 15 ||
[Analyze grammar]

yathaiva sthāvaraṃ vyaktaṃ jaṅgamaṃ ca tathāvidham |
nāyamarthastathā yuktastvadvidho na vipadyate || 16 ||
[Analyze grammar]

yadyadharmo bhavedbhūto rāvaṇo narakaṃ vrajet |
bhavāṃśca dharmasaṃyukto naivaṃ vyasanamāpnuyāt || 17 ||
[Analyze grammar]

tasya ca vyasanābhāvādvyasanaṃ ca gate tvayi |
dharmeṇopalabheddharmamadharmaṃ cāpyadharmataḥ || 18 ||
[Analyze grammar]

yadi dharmeṇa yujyerannādharmarucayo janāḥ |
dharmeṇa caratāṃ dharmastathā caiṣāṃ phalaṃ bhavet || 19 ||
[Analyze grammar]

yasmādarthā vivardhante yeṣvadharmaḥ pratiṣṭhitaḥ |
kliśyante dharmaśīlāśca tasmādetau nirarthakau || 20 ||
[Analyze grammar]

vadhyante pāpakarmāṇo yadyadharmeṇa rāghava |
vadhakarmahato dharmaḥ sa hataḥ kaṃ vadhiṣyati || 21 ||
[Analyze grammar]

atha vā vihitenāyaṃ hanyate hanti vā param |
vidhirālipyate tena na sa pāpena karmaṇā || 22 ||
[Analyze grammar]

adṛṣṭapratikāreṇa avyaktenāsatā satā |
kathaṃ śakyaṃ paraṃ prāptuṃ dharmeṇārivikarśana || 23 ||
[Analyze grammar]

yadi sat syāt satāṃ mukhya nāsat syāttava kiṃ cana |
tvayā yadīdṛśaṃ prāptaṃ tasmāt sannopapadyate || 24 ||
[Analyze grammar]

atha vā durbalaḥ klībo balaṃ dharmo'nuvartate |
durbalo hṛtamaryādo na sevya iti me matiḥ || 25 ||
[Analyze grammar]

balasya yadi ceddharmo guṇabhūtaḥ parākrame |
dharmamutsṛjya vartasva yathā dharme tathā bale || 26 ||
[Analyze grammar]

atha cet satyavacanaṃ dharmaḥ kila paraṃtapa |
anṛtastvayyakaruṇaḥ kiṃ na baddhastvayā pitā || 27 ||
[Analyze grammar]

yadi dharmo bhavedbhūta adharmo vā paraṃtapa |
na sma hatvā muniṃ vajrī kuryādijyāṃ śatakratuḥ || 28 ||
[Analyze grammar]

adharmasaṃśrito dharmo vināśayati rāghava |
sarvametad yathākāmaṃ kākutstha kurute naraḥ || 29 ||
[Analyze grammar]

mama cedaṃ mataṃ tāta dharmo'yamiti rāghava |
dharmamūlaṃ tvayā chinnaṃ rājyamutsṛjatā tadā || 30 ||
[Analyze grammar]

arthebhyo hi vivṛddhebhyaḥ saṃvṛddhebhyastatastataḥ |
kriyāḥ sarvāḥ pravartante parvatebhya ivāpagāḥ || 31 ||
[Analyze grammar]

arthena hi viyuktasya puruṣasyālpatejasaḥ |
vyucchidyante kriyāḥ sarvā grīṣme kusarito yathā || 32 ||
[Analyze grammar]

so'yamarthaṃ parityajya sukhakāmaḥ sukhaidhitaḥ |
pāpamārabhate kartuṃ tathā doṣaḥ pravartate || 33 ||
[Analyze grammar]

yasyārthāstasya mitrāṇi yasyārthāstasya bāndhavaḥ |
yasyārthāḥ sa pumāṃl loke yasyārthāḥ sa ca paṇḍitaḥ || 34 ||
[Analyze grammar]

yasyārthāḥ sa ca vikrānto yasyārthāḥ sa ca buddhimān |
yasyārthāḥ sa mahābhāgo yasyārthāḥ sa mahāguṇaḥ || 35 ||
[Analyze grammar]

arthasyaite parityāge doṣāḥ pravyāhṛtā mayā |
rājyamutsṛjatā vīra yena buddhistvayā kṛtā || 36 ||
[Analyze grammar]

yasyārthā dharmakāmārthāstasya sarvaṃ pradakṣiṇam |
adhanenārthakāmena nārthaḥ śakyo vicinvatā || 37 ||
[Analyze grammar]

harṣaḥ kāmaśca darpaśca dharmaḥ krodhaḥ śamo damaḥ |
arthādetāni sarvāṇi pravartante narādhipa || 38 ||
[Analyze grammar]

yeṣāṃ naśyatyayaṃ lokaścaratāṃ dharmacāriṇām |
te'rthāstvayi na dṛśyante durdineṣu yathā grahāḥ || 39 ||
[Analyze grammar]

tvayi pravrajite vīra gurośca vacane sthite |
rakṣasāpahṛtā bhāryā prāṇaiḥ priyatarā tava || 40 ||
[Analyze grammar]

tadadya vipulaṃ vīra duḥkhamindrajitā kṛtam |
karmaṇā vyapaneṣyāmi tasmāduttiṣṭha rāghava || 41 ||
[Analyze grammar]

ayamanagha tavoditaḥ priyārthaṃ janakasutā nidhanaṃ nirīkṣya ruṣṭaḥ |
sahayagajarathāṃ sarākṣasendrāṃ bhṛśamiṣubhirvinipātayāmi laṅkām || 42 ||
[Analyze grammar]