Chapter 69

śrutvā taṃ bhīmanirhrādaṃ śakrāśanisamasvanam |
vīkṣamāṇā diśaḥ sarvā dudruvurvānararṣabhāḥ || 1 ||
[Analyze grammar]

tānuvāca tataḥ sarvān hanūmānmārutātmajaḥ |
viṣaṇṇavadanāndīnāṃstrastān vidravataḥ pṛthak || 2 ||
[Analyze grammar]

kasmādviṣaṇṇavadanā vidravadhvaṃ plavaṃgamāḥ |
tyaktayuddhasamutsāhāḥ śūratvaṃ kva nu vo gatam || 3 ||
[Analyze grammar]

pṛṣṭhato'nuvrajadhvaṃ māmagrato yāntamāhave |
śūrairabhijanopetairayuktaṃ hi nivartitum || 4 ||
[Analyze grammar]

evamuktāḥ susaṃkruddhā vāyuputreṇa dhīmatā |
śailaśṛṅgāndrumāṃścaiva jagṛhurhṛṣṭamānasāḥ || 5 ||
[Analyze grammar]

abhipetuśca garjanto rākṣasān vānararṣabhāḥ |
parivārya hanūmantamanvayuśca mahāhave || 6 ||
[Analyze grammar]

sa tairvānaramukhyaistu hanūmān sarvato vṛtaḥ |
hutāśana ivārciṣmānadahacchatruvāhinīm || 7 ||
[Analyze grammar]

sa rākṣasānāṃ kadanaṃ cakāra sumahākapiḥ |
vṛto vānarasainyena kālāntakayamopamaḥ || 8 ||
[Analyze grammar]

sa tu śokena cāviṣṭaḥ krodhena ca mahākapiḥ |
hanūmān rāvaṇi rathe mahatīṃ pātayacchilām || 9 ||
[Analyze grammar]

tāmāpatantīṃ dṛṣṭvaiva rathaḥ sārathinā tadā |
vidheyāśva samāyuktaḥ sudūramapavāhitaḥ || 10 ||
[Analyze grammar]

tamindrajitamaprāpya rathathaṃ sahasārathim |
viveśa dharaṇīṃ bhittvā sā śilāvyarthamudyatā || 11 ||
[Analyze grammar]

patitāyāṃ śilāyāṃ tu rakṣasāṃ vyathitā camūḥ |
tamabhyadhāvañ śataśo nadantaḥ kānanaukasaḥ || 12 ||
[Analyze grammar]

te drumāṃśca mahākāyā giriśṛṅgāṇi codyatāḥ |
cikṣipurdviṣatāṃ madhye vānarā bhīmavikramāḥ || 13 ||
[Analyze grammar]

vānarair tairmahāvīryairghorarūpā niśācarāḥ |
vīryādabhihatā vṛkṣairvyaveṣṭanta raṇakṣitau || 14 ||
[Analyze grammar]

svasainyamabhivīkṣyātha vānarārditamindrajit |
pragṛhītāyudhaḥ kruddhaḥ parānabhimukho yayau || 15 ||
[Analyze grammar]

sa śaraughānavasṛjan svasainyenābhisaṃvṛtaḥ |
jaghāna kapiśārdūlān subahūndṛṣṭavikramaḥ || 16 ||
[Analyze grammar]

śūlairaśanibhiḥ khaḍgaiḥ paṭṭasaiḥ kūṭamudgaraiḥ |
te cāpyanucarāṃstasya vānarā jaghnurāhave || 17 ||
[Analyze grammar]

saskandhaviṭapaiḥ sālaiḥ śilābhiśca mahābalaiḥ |
hanūmān kadanaṃ cakre rakṣasāṃ bhīmakarmaṇām || 18 ||
[Analyze grammar]

sa nivārya parānīkamabravīttān vanaukasaḥ |
hanūmān saṃnivartadhvaṃ na naḥ sādhyamidaṃ balam || 19 ||
[Analyze grammar]

tyaktvā prāṇān viceṣṭanto rāma priyacikīrṣavaḥ |
yannimittaṃ hi yudhyāmo hatā sā janakātmajā || 20 ||
[Analyze grammar]

imamarthaṃ hi vijñāpya rāmaṃ sugrīvameva ca |
tau yat pratividhāsyete tat kariṣyāmahe vayam || 21 ||
[Analyze grammar]

ityuktvā vānaraśreṣṭho vārayan sarvavānarān |
śanaiḥ śanairasaṃtrastaḥ sabalaḥ sa nyavartata || 22 ||
[Analyze grammar]

sa tu prekṣya hanūmantaṃ vrajantaṃ yatra rāghavaḥ |
nikumbhilāmadhiṣṭhāya pāvakaṃ juhuve ndrajit || 23 ||
[Analyze grammar]

yajñabhūmyāṃ tu vidhivat pāvakastena rakṣasā |
hūyamānaḥ prajajvāla homaśoṇitabhuk tadā || 24 ||
[Analyze grammar]

so'rciḥ pinaddho dadṛśe homaśoṇitatarpitaḥ |
saṃdhyāgata ivādityaḥ sa tīvrāgniḥ samutthitaḥ || 25 ||
[Analyze grammar]

athendrajid rākṣasabhūtaye tu juhāva havyaṃ vidhinā vidhānavat |
dṛṣṭvā vyatiṣṭhanta ca rākṣasāste mahāsamūheṣu nayānayajñāḥ || 26 ||
[Analyze grammar]