Chapter 68

vijñāya tu manastasya rāghavasya mahātmanaḥ |
saṃnivṛtyāhavāttasmāt praviveśa puraṃ tataḥ || 1 ||
[Analyze grammar]

so'nusmṛtya vadhaṃ teṣāṃ rākṣasānāṃ tarasvinām |
krodhatāmrekṣaṇaḥ śūro nirjagāma mahādyutiḥ || 2 ||
[Analyze grammar]

sa paścimena dvāreṇa niryayau rākṣasairvṛtaḥ |
indrajittu mahāvīryaḥ paulastyo devakaṇṭakaḥ || 3 ||
[Analyze grammar]

indrajittu tato dṛṣṭvā bhrātarau rāmalakṣmaṇau |
raṇāyābhyudyatau vīrau māyāṃ prāduṣkarottadā || 4 ||
[Analyze grammar]

indrajittu rathe sthāpya sītāṃ māyāmayīṃ tadā |
balena mahatāvṛtya tasyā vadhamarocayat || 5 ||
[Analyze grammar]

mohanārthaṃ tu sarveṣāṃ buddhiṃ kṛtvā sudurmatiḥ |
hantuṃ sītāṃ vyavasito vānarābhimukho yayau || 6 ||
[Analyze grammar]

taṃ dṛṣṭvā tvabhiniryāntaṃ nagaryāḥ kānanaukasaḥ |
utpeturabhisaṃkruddhāḥ śilāhastā yuyutsavaḥ || 7 ||
[Analyze grammar]

hanūmānpuratasteṣāṃ jagāma kapikuñjaraḥ |
pragṛhya sumahacchṛṅgaṃ parvatasya durāsadam || 8 ||
[Analyze grammar]

sa dadarśa hatānandāṃ sītāmindrajito rathe |
ekaveṇīdharāṃ dīnāmupavāsakṛśānanām || 9 ||
[Analyze grammar]

parikliṣṭaikavasanāmamṛjāṃ rāghavapriyām |
rajomalābhyāmāliptaiḥ sarvagātrairvarastriyam || 10 ||
[Analyze grammar]

tāṃ nirīkṣya muhūrtaṃ tu maithilīmadhyavasya ca |
bāṣpaparyākulamukho hanūmān vyathito'bhavat || 11 ||
[Analyze grammar]

abravīttāṃ tu śokārtāṃ nirānandāṃ tapasvinām |
dṛṣṭvā rathe stitāṃ sītāṃ rākṣasendrasutāśritām || 12 ||
[Analyze grammar]

kiṃ samarthitamasyeti cintayan sa mahākapiḥ |
saha tairvānaraśreṣṭhairabhyadhāvata rāvaṇim || 13 ||
[Analyze grammar]

tadvānarabalaṃ dṛṣṭvā rāvaṇiḥ krodhamūrchitaḥ |
kṛtvā viśokaṃ nistriṃśaṃ mūrdhni sītāṃ parāmṛśat || 14 ||
[Analyze grammar]

taṃ striyaṃ paśyatāṃ teṣāṃ tāḍayāmāsa rāvaṇiḥ |
krośantīṃ rāma rāmeti māyayā yojitāṃ rathe || 15 ||
[Analyze grammar]

gṛhītamūrdhajāṃ dṛṣṭvā hanūmāndainyamāgataḥ |
duḥkhajaṃ vārinetrābhyāmutsṛjanmārutātmajaḥ |
abravīt paruṣaṃ vākyaṃ krodhād rakṣo'dhipātmajam || 16 ||
[Analyze grammar]

durātmannātmanāśāya keśapakṣe parāmṛśaḥ |
brahmarṣīṇāṃ kule jāto rākṣasīṃ yonimāśritaḥ |
dhik tvāṃ pāpasamācāraṃ yasya te matirīdṛśī || 17 ||
[Analyze grammar]

nṛśaṃsānārya durvṛtta kṣudra pāpaparākrama |
anāryasyedṛśaṃ karma ghṛṇā te nāsti nirghṛṇa || 18 ||
[Analyze grammar]

cyutā gṛhācca rājyācca rāmahastācca maithilī |
kiṃ tavaiṣāparāddhā hi yadenāṃ hantumicchasi || 19 ||
[Analyze grammar]

sītāṃ ca hatvā na ciraṃ jīviṣyasi kathaṃ cana |
vadhārhakarmaṇānena mama hastagato hyasi || 20 ||
[Analyze grammar]

ye ca strīghātināṃ lokā lokavadhyaiśca kutsitāḥ |
iha jīvitamutsṛjya pretya tānpratilapsyase || 21 ||
[Analyze grammar]

iti bruvāṇo hanumān sāyudhairharibhirvṛtaḥ |
abhyadhāvata saṃkruddho rākṣasendrasutaṃ prati || 22 ||
[Analyze grammar]

āpatantaṃ mahāvīryaṃ tadanīkaṃ vanaukasām |
rakṣasāṃ bhīmavegānāmanīkena nyavārayat || 23 ||
[Analyze grammar]

sa tāṃ bāṇasahasreṇa vikṣobhya harivāhinīm |
hariśreṣṭhaṃ hanūmantamindrajit pratyuvāca ha || 24 ||
[Analyze grammar]

sugrīvastvaṃ ca rāmaśca yannimittamihāgatāḥ |
tāṃ haniṣyāmi vaidehīmadyaiva tava paśyataḥ || 25 ||
[Analyze grammar]

imāṃ hatvā tato rāmaṃ lakṣmaṇaṃ tvāṃ ca vānara |
sugrīvaṃ ca vadhiṣyāmi taṃ cānāryaṃ vibhīṣaṇam || 26 ||
[Analyze grammar]

na hantavyāḥ striyaśceti yadbravīṣi plavaṃgama |
pīḍā karamamitrāṇāṃ yat syāt kartavyameta tat || 27 ||
[Analyze grammar]

tamevamuktvā rudatīṃ sītāṃ māyāmayīṃ tataḥ |
śitadhāreṇa khaḍgena nijaghānendrajit svayam || 28 ||
[Analyze grammar]

yajñopavītamārgeṇa chinnā tena tapasvinī |
sā pṛthivyāṃ pṛthuśroṇī papāta priyadarśanā || 29 ||
[Analyze grammar]

tāmindrajitstriyaṃ hatvā hanūmantamuvāca ha |
mayā rāmasya paśyemāṃ kopena ca niṣūditām || 30 ||
[Analyze grammar]

tataḥ khaḍgena mahatā hatvā tāmindrajit svayam |
hṛṣṭaḥ sa rathamāsthāya vinanāda mahāsvanam || 31 ||
[Analyze grammar]

vānarāḥ śuśruvuḥ śabdamadūre pratyavasthitāḥ |
vyāditāsyasya nadatastaddurgaṃ saṃśritasya tu || 32 ||
[Analyze grammar]

tathā tu sītāṃ vinihatya durmatiḥ prahṛṣṭacetāḥ sa babhūva rāvaṇiḥ |
taṃ hṛṣṭarūpaṃ samudīkṣya vānarā viṣaṇṇarūpāḥ samabhipradudruvuḥ || 33 ||
[Analyze grammar]