Chapter 67

makarākṣaṃ hataṃ śrutvā rāvaṇaḥ samitiṃjayaḥ |
ādideśātha saṃkruddho raṇāyendrajitaṃ sutam || 1 ||
[Analyze grammar]

jahi vīra mahāvīryau bhrātarau rāmalakṣmaṇau |
adṛśyo dṛśyamāno vā sarvathā tvaṃ balādhikaḥ || 2 ||
[Analyze grammar]

tvamapratimakarmāṇamindraṃ jayasi saṃyuge |
kiṃ punarmānuṣau dṛṣṭvā na vadhiṣyasi saṃyuge || 3 ||
[Analyze grammar]

tathokto rākṣasendreṇa pratigṛhya piturvacaḥ |
yajñabhūmau sa vidhivat pāvakaṃ juhuve ndrajit || 4 ||
[Analyze grammar]

juhvataścāpi tatrāgniṃ raktoṣṇīṣadharāḥ striyaḥ |
ājagmustatra saṃbhrāntā rākṣasyo yatra rāvaṇiḥ || 5 ||
[Analyze grammar]

śastrāṇi śarapatrāṇi samidho'tha vibhītakāḥ |
lohitāni ca vāsāṃsi sruvaṃ kārṣṇāyasaṃ tathā || 6 ||
[Analyze grammar]

sarvato'gniṃ samāstīrya śarapatraiḥ samantataḥ |
chāgasya sarvakṛṣṇasya galaṃ jagrāha jīvataḥ || 7 ||
[Analyze grammar]

caruhomasamiddhasya vidhūmasya mahārciṣaḥ |
babhūvustāni liṅgāni vijayaṃ darśayanti ca || 8 ||
[Analyze grammar]

pradakṣiṇāvartaśikhastaptahāṭakasaṃnibhaḥ |
havistat pratijagrāha pāvakaḥ svayamutthitaḥ || 9 ||
[Analyze grammar]

hutvāgniṃ tarpayitvātha devadānavarākṣasān |
āruroha rathaśreṣṭhamantardhānagataṃ śubham || 10 ||
[Analyze grammar]

sa vājibhiścaturbhistu bāṇaiśca niśitairyutaḥ |
āropitamahācāpaḥ śuśubhe syandanottame || 11 ||
[Analyze grammar]

jājvalyamāno vapuṣā tapanīyaparicchadaḥ |
śaraiścandrārdhacandraiśca sa rathaḥ samalaṃkṛtaḥ || 12 ||
[Analyze grammar]

jāmbūnadamahākamburdīptapāvakasaṃnibhaḥ |
babhūvendrajitaḥ keturvaidūryasamalaṃkṛtaḥ || 13 ||
[Analyze grammar]

tena cādityakalpena brahmāstreṇa ca pālitaḥ |
sa babhūva durādharṣo rāvaṇiḥ sumahābalaḥ || 14 ||
[Analyze grammar]

so'bhiniryāya nagarādindrajit samitiṃjayaḥ |
hutvāgniṃ rākṣasairmantrairantardhānagato'bravīt || 15 ||
[Analyze grammar]

adya hatvāhave yau tau mithyā pravrajitau vane |
jayaṃ pitre pradāsyāmi rāvaṇāya raṇādhikam || 16 ||
[Analyze grammar]

kṛtvā nirvānarāmurvīṃ hatvā rāmaṃ salakṣmaṇam |
kariṣye paramāṃ prītimityuktvāntaradhīyata || 17 ||
[Analyze grammar]

āpapātātha saṃkruddho daśagrīveṇa coditaḥ |
tīkṣṇakārmukanārācaistīkṣṇastvindraripū raṇe || 18 ||
[Analyze grammar]

sa dadarśa mahāvīryau nāgau triśirasāviva |
sṛjantāviṣujālāni vīrau vānaramadhyagau || 19 ||
[Analyze grammar]

imau tāviti saṃcintya sajyaṃ kṛtvā ca kārmukam |
saṃtatāneṣudhārābhiḥ parjanya iva vṛṣṭimān || 20 ||
[Analyze grammar]

sa tu vaihāyasaṃ prāpya saratho rāmalakṣmaṇau |
acakṣurviṣaye tiṣṭhan vivyādha niśitaiḥ śaraiḥ || 21 ||
[Analyze grammar]

tau tasya śaravegena parītau rāmalakṣmaṇau |
dhanuṣī saśare kṛtvā divyamastraṃ pracakratuḥ || 22 ||
[Analyze grammar]

pracchādayantau gaganaṃ śarajālairmahābalau |
tamastraiḥ surasaṃkāśau naiva pasparśatuḥ śaraiḥ || 23 ||
[Analyze grammar]

sa hi dhūmāndhakāraṃ ca cakre pracchādayannabhaḥ |
diśaścāntardadhe śrīmānnīhāratamasāvṛtaḥ || 24 ||
[Analyze grammar]

naiva jyātalanirghoṣo na ca nemikhurasvanaḥ |
śuśruve caratastasya na ca rūpaṃ prakāśate || 25 ||
[Analyze grammar]

ghanāndhakāre timire śaravarṣamivādbhutam |
sa vavarṣa mahābāhurnārācaśaravṛṣṭibhiḥ || 26 ||
[Analyze grammar]

sa rāmaṃ sūryasaṃkāśaiḥ śarairdattavaro bhṛśam |
vivyādha samare kruddhaḥ sarvagātreṣu rāvaṇiḥ || 27 ||
[Analyze grammar]

tau hanyamānau nārācairdhārābhiriva parvatau |
hemapuṅkhānnaravyāghrau tigmānmumucatuḥ śarān || 28 ||
[Analyze grammar]

antarikṣaṃ samāsādya rāvaṇiṃ kaṅkapatriṇaḥ |
nikṛtya patagā bhūmau petuste śoṇitokṣitāḥ || 29 ||
[Analyze grammar]

atimātraṃ śaraugheṇa pīḍyamānau narottamau |
tāniṣūnpatato bhallairanekairnicakartatuḥ || 30 ||
[Analyze grammar]

yato hi dadṛśāte tau śarānnipatitāñ śitān |
tatastato dāśarathī sasṛjāte'stramuttamam || 31 ||
[Analyze grammar]

rāvaṇistu diśaḥ sarvā rathenātirathaḥ patan |
vivyādha tau dāśarathī laghvastro niśitaiḥ śaraiḥ || 32 ||
[Analyze grammar]

tenātividdhau tau vīrau rukmapuṅkhaiḥ susaṃhataiḥ |
babhūvaturdāśarathī puṣpitāviva kiṃśukau || 33 ||
[Analyze grammar]

nāsya veda gatiṃ kaścinna ca rūpaṃ dhanuḥ śarān |
na cānyadviditaṃ kiṃ cit sūryasyevābhrasaṃplave || 34 ||
[Analyze grammar]

tena viddhāśca harayo nihatāśca gatāsavaḥ |
babhūvuḥ śataśastatra patitā dharaṇītale || 35 ||
[Analyze grammar]

lakṣmaṇastu susaṃkruddho bhrātaraṃ vākyamabravīt |
brāhmamastraṃ prayokṣyāmi vadhārthaṃ sarvarakṣasām || 36 ||
[Analyze grammar]

tamuvāca tato rāmo lakṣmaṇaṃ śubhalakṣaṇam |
naikasya heto rakṣāṃsi pṛthivyāṃ hantumarhasi || 37 ||
[Analyze grammar]

ayudhyamānaṃ pracchannaṃ prāñjaliṃ śaraṇāgatam |
palāyantaṃ pramattaṃ vā na tvaṃ hantumihārhasi || 38 ||
[Analyze grammar]

asyaiva tu vadhe yatnaṃ kariṣyāvo mahābala |
ādekṣyāvo mahāvegānastrānāśīviṣopamān || 39 ||
[Analyze grammar]

tamenaṃ māyinaṃ kṣudramantarhitarathaṃ balāt |
rākṣasaṃ nihaniṣyanti dṛṣṭvā vānarayūthapāḥ || 40 ||
[Analyze grammar]

yadyeṣa bhūmiṃ viśate divaṃ vā rasātalaṃ vāpi nabhastalaṃ vā |
evaṃ nigūḍho'pi mamāstradagdhaḥ patiṣyate bhūmitale gatāsuḥ || 41 ||
[Analyze grammar]

ityevamuktvā vacanaṃ mahātmā raghupravīraḥ plavagarṣabhairvṛtaḥ |
vadhāya raudrasya nṛśaṃsakarmaṇastadā mahātmā tvaritaṃ nirīkṣate || 42 ||
[Analyze grammar]