Chapter 66

nirgataṃ makarākṣaṃ te dṛṣṭvā vānarapuṃgavāḥ |
āplutya sahasā sarve yoddhukāmā vyavasthitāḥ || 1 ||
[Analyze grammar]

tataḥ pravṛttaṃ sumahattad yuddhaṃ lomaharṣaṇam |
niśācaraiḥ plavaṃgānāṃ devānāṃ dānavairiva || 2 ||
[Analyze grammar]

vṛkṣaśūlanipātaiśca śilāparighapātanaiḥ |
anyonyaṃ mardayanti sma tadā kapiniśācarāḥ || 3 ||
[Analyze grammar]

śaktiśūlagadākhaḍgaistomaraiśca niśācarāḥ |
paṭṭasairbhindipālaiśca bāṇapātaiḥ samantataḥ || 4 ||
[Analyze grammar]

pāśamudgaradaṇḍaiśca nirghātaiścāparaistathā |
kadanaṃ kapisiṃhānāṃ cakruste rajanīcarāḥ || 5 ||
[Analyze grammar]

bāṇaughairarditāścāpi kharaputreṇa vānarāḥ |
saṃbhrāntamanasaḥ sarve dudruvurbhayapīḍitāḥ || 6 ||
[Analyze grammar]

tāndṛṣṭvā rākṣasāḥ sarve dravamāṇān vanaukasaḥ |
neduste siṃhavaddhṛṣṭā rākṣasā jitakāśinaḥ || 7 ||
[Analyze grammar]

vidravatsu tadā teṣu vānareṣu samantataḥ |
rāmastān vārayāmāsa śaravarṣeṇa rākṣasān || 8 ||
[Analyze grammar]

vāritān rākṣasāndṛṣṭvā makarākṣo niśācaraḥ |
krodhānalasamāviṣṭo vacanaṃ cedamabravīt || 9 ||
[Analyze grammar]

tiṣṭha rāma mayā sārdhaṃ dvandvayuddhaṃ dadāmi te |
tyājayiṣyāmi te prāṇāndhanurmuktaiḥ śitaiḥ śaraiḥ || 10 ||
[Analyze grammar]

yattadā daṇḍakāraṇye pitaraṃ hatavānmama |
madagrataḥ svakarmasthaṃ smṛtvā roṣo'bhivardhate || 11 ||
[Analyze grammar]

dahyante bhṛśamaṅgāni durātmanmama rāghava |
yanmayāsi na dṛṣṭastvaṃ tasmin kāle mahāvane || 12 ||
[Analyze grammar]

diṣṭyāsi darśanaṃ rāma mama tvaṃ prāptavāniha |
kāṅkṣito'si kṣudhārtasya siṃhasyevetaro mṛgaḥ || 13 ||
[Analyze grammar]

adya madbāṇavegena pretarāḍviṣayaṃ gataḥ |
ye tvayā nihatāḥ śūrāḥ saha taistvaṃ sameṣyasi || 14 ||
[Analyze grammar]

bahunātra kimuktena śṛṇu rāma vaco mama |
paśyantu sakalā lokāstvāṃ māṃ caiva raṇājire || 15 ||
[Analyze grammar]

astrairvā gadayā vāpi bāhubhyāṃ vā mahāhave |
abhyastaṃ yena vā rāma tena vā vartatāṃ yudhi || 16 ||
[Analyze grammar]

makarākṣavacaḥ śrutvā rāmo daśarathātmajaḥ |
abravīt prahasan vākyamuttarottaravādinam || 17 ||
[Analyze grammar]

caturdaśasahasrāṇi rakṣasāṃ tvatpitā ca yaḥ |
triśirā dūṣaṇaścāpi daṇḍake nihatā mayā || 18 ||
[Analyze grammar]

svāśitāstava māṃsena gṛdhragomāyuvāyasāḥ |
bhaviṣyantyadya vai pāpa tīkṣṇatuṇḍanakhāṅkuśāḥ || 19 ||
[Analyze grammar]

evamuktastu rāmeṇa kharaputro niśācaraḥ |
bāṇaughānasṛjattasmai rāghavāya raṇājire || 20 ||
[Analyze grammar]

tāñ śarāñ śaravarṣeṇa rāmaściccheda naikadhā |
nipeturbhuvi te chinnā rukmapuṅkhāḥ sahasraśaḥ || 21 ||
[Analyze grammar]

tad yuddhamabhavattatra sametyānyonyamojasā |
khara rākṣasaputrasya sūnordaśarathasya ca || 22 ||
[Analyze grammar]

jīmūtayorivākāśe śabdo jyātalayostadā |
dhanurmuktaḥ svanotkṛṣṭaḥ śrūyate ca raṇājire || 23 ||
[Analyze grammar]

devadānavagandharvāḥ kiṃnarāśca mahoragāḥ |
antarikṣagatāḥ sarve draṣṭukāmāstadadbhutam || 24 ||
[Analyze grammar]

viddhamanyonyagātreṣu dviguṇaṃ vardhate balam |
kṛtapratikṛtānyonyaṃ kurvāte tau raṇājire || 25 ||
[Analyze grammar]

rāmamuktāstu bāṇaughān rākṣasastvacchinad raṇe |
rakṣomuktāṃstu rāmo vai naikadhā prācchinaccharaiḥ || 26 ||
[Analyze grammar]

bāṇaughavitatāḥ sarvā diśaśca vidiśastathā |
saṃchannā vasudhā caiva samantānna prakāśate || 27 ||
[Analyze grammar]

tataḥ kruddho mahābāhurdhanuściccheda rakṣasaḥ |
aṣṭābhiratha nārācaiḥ sūtaṃ vivyādha rāghavaḥ |
bhittvā śarai rathaṃ rāmo rathāśvān samapātayat || 28 ||
[Analyze grammar]

viratho vasudhāṃ tiṣṭhanmakarākṣo niśācaraḥ |
atiṣṭhadvasudhāṃ rakṣaḥ śūlaṃ jagrāha pāṇinā |
trāsanaṃ sarvabhūtānāṃ yugāntāgnisamaprabham || 29 ||
[Analyze grammar]

vibhrāmya ca mahacchūlaṃ prajvalantaṃ niśācaraḥ |
sa krodhāt prāhiṇottasmai rāghavāya mahāhave || 30 ||
[Analyze grammar]

tamāpatantaṃ jvalitaṃ kharaputrakarāccyutam |
bāṇaistu tribhirākāśe śūlaṃ ciccheda rāghavaḥ || 31 ||
[Analyze grammar]

sacchinno naikadhā śūlo divyahāṭakamaṇḍitaḥ |
vyaśīryata mahokleva rāmabāṇārdito bhuvi || 32 ||
[Analyze grammar]

tacchūlaṃ nihataṃ dṛṣṭvā rāmeṇādbhutakarmaṇā |
sādhu sādhviti bhūtāni vyāharanti nabhogatāḥ || 33 ||
[Analyze grammar]

taddṛṣṭvā nihataṃ śūlaṃ makarākṣo niśācaraḥ |
muṣṭimudyamya kākutsthaṃ tiṣṭha tiṣṭheti cābravīt || 34 ||
[Analyze grammar]

sa taṃ dṛṣṭvā patantaṃ vai prahasya raghunandanaḥ |
pāvakāstraṃ tato rāmaḥ saṃdadhe svaśarāsane || 35 ||
[Analyze grammar]

tenāstreṇa hataṃ rakṣaḥ kākutsthena tadā raṇe |
saṃchinnahṛdayaṃ tatra papāta ca mamāra ca || 36 ||
[Analyze grammar]

dṛṣṭvā te rākṣasāḥ sarve makarākṣasya pātanam |
laṅkāmeva pradhāvanta rāmabālārditāstadā || 37 ||
[Analyze grammar]

daśarathanṛpaputrabāṇavegai rajanicaraṃ nihataṃ kharātmajaṃ tam |
dadṛśuratha ca devatāḥ prahṛṣṭā girimiva vajrahataṃ yathā viśīrṇam || 38 ||
[Analyze grammar]