Chapter 65

nikumbhaṃ ca hataṃ śrutvā kumbhaṃ ca vinipātitam |
rāvaṇaḥ paramāmarṣī prajajvālānalo yathā || 1 ||
[Analyze grammar]

nairṛtaḥ krodhaśokābhyāṃ dvābhyāṃ tu parimūrchitaḥ |
kharaputraṃ viśālākṣaṃ makarākṣamacodayat || 2 ||
[Analyze grammar]

gaccha putra mayājñapto balenābhisamanvitaḥ |
rāghavaṃ lakṣmaṇaṃ caiva jahi tau savanaukasau || 3 ||
[Analyze grammar]

rāvaṇasya vacaḥ śrutvā śūro mānī kharātmajaḥ |
bāḍhamityabravīddhṛṣṭo makarākṣo niśācaraḥ || 4 ||
[Analyze grammar]

so'bhivādya daśagrīvaṃ kṛtvā cāpi pradakṣiṇam |
nirjagāma gṛhācchubhrād rāvaṇasyājñayā balī || 5 ||
[Analyze grammar]

samīpasthaṃ balādhyakṣaṃ kharaputro'bravīdidam |
rathamānīyatāṃ śīghraṃ sainyaṃ cānīyatāṃ tvarāt || 6 ||
[Analyze grammar]

tasya tadvacanaṃ śrutvā balādhyakṣo niśācaraḥ |
syandanaṃ ca balaṃ caiva samīpaṃ pratyapādayat || 7 ||
[Analyze grammar]

pradakṣiṇaṃ rathaṃ kṛtvā āruroha niśācaraḥ |
sūtaṃ saṃcodayāmāsa śīghraṃ me rathamāvaha || 8 ||
[Analyze grammar]

atha tān rākṣasān sarvānmakarākṣo'bravīdidam |
yūyaṃ sarve prayudhyadhvaṃ purastānmama rākṣasāḥ || 9 ||
[Analyze grammar]

ahaṃ rākṣasarājena rāvaṇena mahātmanā |
ājñaptaḥ samare hantuṃ tāv ubhau rāmalakṣmaṇau || 10 ||
[Analyze grammar]

adya rāmaṃ vadhiṣyāmi lakṣmaṇaṃ ca niśācarāḥ |
śākhāmṛgaṃ ca sugrīvaṃ vānarāṃśca śarottamaiḥ || 11 ||
[Analyze grammar]

adya śūlanipātaiśca vānarāṇāṃ mahācamūm |
pradahiṣyāmi saṃprāptāṃ śuṣkendhanamivānalaḥ || 12 ||
[Analyze grammar]

makarākṣasya tacchrutvā vacanaṃ te niśācarāḥ |
sarve nānāyudhopetā balavantaḥ samāhitāḥ || 13 ||
[Analyze grammar]

te kāmarūpiṇaḥ śūrā daṃṣṭriṇaḥ piṅgalekṣaṇāḥ |
mātaṃgā iva nardanto dhvastakeśā bhayānakāḥ || 14 ||
[Analyze grammar]

parivārya mahākāyā mahākāyaṃ kharātmajam |
abhijagmustadā hṛṣṭāścālayanto vasuṃdharām || 15 ||
[Analyze grammar]

śaṅkhabherīsahasrāṇāmāhatānāṃ samantataḥ |
kṣveḍitāsphoṭitānāṃ ca tataḥ śabdo mahānabhūt || 16 ||
[Analyze grammar]

prabhraṣṭo'tha karāttasya pratodaḥ sārathestadā |
papāta sahasā caiva dhvajastasya ca rakṣasaḥ || 17 ||
[Analyze grammar]

tasya te rathasaṃyuktā hayā vikramavarjitāḥ |
caraṇairākulairgatvā dīnāḥ sāsramukhā yayuḥ || 18 ||
[Analyze grammar]

pravāti pavanastasya sapāṃsuḥ kharadāruṇaḥ |
niryāṇe tasya raudrasya makarākṣasya durmateḥ || 19 ||
[Analyze grammar]

tāni dṛṣṭvā nimittāni rākṣasā vīryavattamāḥ |
acintyanirgatāḥ sarve yatra tau rāmalakṣmaṇau || 20 ||
[Analyze grammar]

ghanagajamahiṣāṅgatulyavarṇāḥ samaramukheṣvasakṛdgadāsibhinnāḥ |
ahamahamiti yuddhakauśalāste rajanicarāḥ paribabhramurnadantaḥ || 21 ||
[Analyze grammar]