Chapter 60

tato hatān rākṣasapuṃgavāṃstāndevāntakāditriśiro'tikāyān |
rakṣogaṇāstatra hatāvaśiṣṭāste rāvaṇāya tvaritaṃ śaśaṃsuḥ || 1 ||
[Analyze grammar]

tato hatāṃstān sahasā niśamya rājā mumohāśrupariplutākṣaḥ |
putrakṣayaṃ bhrātṛvadhaṃ ca ghoraṃ vicintya rājā vipulaṃ pradadhyau || 2 ||
[Analyze grammar]

tatastu rājānamudīkṣya dīnaṃ śokārṇave saṃparipupluvānam |
atharṣabho rākṣasarājasūnurathendrajidvākyamidaṃ babhāṣe || 3 ||
[Analyze grammar]

na tāta mohaṃ pratigantumarhasi yatrendrajijjīvati rākṣasendra |
nendrāribāṇābhihato hi kaścit prāṇān samarthaḥ samare'bhidhartum || 4 ||
[Analyze grammar]

paśyādya rāmaṃ sahalakṣmaṇena madbāṇanirbhinnavikīrṇadeham |
gatāyuṣaṃ bhūmitale śayānaṃ śaraiḥ śitairācitasarvagātram || 5 ||
[Analyze grammar]

imāṃ pratijñāṃ śṛṇu śakraśatroḥ suniścitāṃ pauruṣadaivayuktām |
adyaiva rāmaṃ sahalakṣmaṇena saṃtāpayiṣyāmi śarairamoghaiḥ || 6 ||
[Analyze grammar]

adyendravaivasvataviṣṇumitra sādhyāśvivaiśvānaracandrasūryāḥ |
drakṣyanti me vikramamaprameyaṃ viṣṇorivograṃ baliyajñavāṭe || 7 ||
[Analyze grammar]

sa evamuktvā tridaśendraśatrurāpṛcchya rājānamadīnasattvaḥ |
samārurohānilatulyavegaṃ rathaṃ kharaśreṣṭhasamādhiyuktam || 8 ||
[Analyze grammar]

samāsthāya mahātejā rathaṃ harirathopamam |
jagāma sahasā tatra yatra yuddhamariṃdama || 9 ||
[Analyze grammar]

taṃ prasthitaṃ mahātmānamanujagmurmahābalāḥ |
saṃharṣamāṇā bahavo dhanuḥpravarapāṇayaḥ || 10 ||
[Analyze grammar]

gajaskandhagatāḥ ke cit ke cit paramavājibhiḥ |
prāsamudgaranistriṃśa paraśvadhagadādharāḥ || 11 ||
[Analyze grammar]

sa śaṅkhaninadairbhīmairbherīṇāṃ ca mahāsvanaiḥ |
jagāma tridaśendrāriḥ stūyamāno niśācaraiḥ || 12 ||
[Analyze grammar]

sa śaṅkhaśaśivarṇena chatreṇa ripusādanaḥ |
rarāja paripūrṇena nabhaścandramasā yathā || 13 ||
[Analyze grammar]

avījyata tato vīro haimairhemavibhūṣitaiḥ |
cārucāmaramukhyaiśca mukhyaḥ sarvadhanuṣmatām || 14 ||
[Analyze grammar]

tatastvindrajitā laṅkā sūryapratimatejasā |
rarājāprativīryeṇa dyaurivārkeṇa bhāsvatā || 15 ||
[Analyze grammar]

sa tu dṛṣṭvā viniryāntaṃ balena mahatā vṛtam |
rākṣasādhipatiḥ śrīmān rāvaṇaḥ putramabravīt || 16 ||
[Analyze grammar]

tvamapratirathaḥ putra jitaste yudhi vāsavaḥ |
kiṃ punarmānuṣaṃ dhṛṣyaṃ na vadhiṣyasi rāghavam || 17 ||
[Analyze grammar]

tathokto rākṣasendreṇa pratigṛhya mahāśiṣaḥ |
rathenāśvayujā vīraḥ śīghraṃ gatvā nikumbhilām || 18 ||
[Analyze grammar]

sa saṃprāpya mahātejā yuddhabhūmimariṃdamaḥ |
sthāpayāmāsa rakṣāṃsi rathaṃ prati samantataḥ || 19 ||
[Analyze grammar]

tatastu hutabhoktāraṃ hutabhuk sadṛśaprabhaḥ |
juhuve rākṣasaśreṣṭho mantravadvidhivattadā || 20 ||
[Analyze grammar]

sa havirjālasaṃskārairmālyagandhapuraskṛtaiḥ |
juhuve pāvakaṃ tatra rākṣasendraḥ pratāpavān || 21 ||
[Analyze grammar]

śastrāṇi śarapatrāṇi samidho'tha vibhītakaḥ |
lohitāni ca vāsāṃsi sruvaṃ kārṣṇāyasaṃ tathā || 22 ||
[Analyze grammar]

sa tatrāgniṃ samāstīrya śarapatraiḥ satomaraiḥ |
chāgasya sarvakṛṣṇasya galaṃ jagrāha jīvataḥ || 23 ||
[Analyze grammar]

sakṛdeva samiddhasya vidhūmasya mahārciṣaḥ |
babhūvustāni liṅgāni vijayaṃ yānyadarśayan || 24 ||
[Analyze grammar]

pradakṣiṇāvartaśikhastaptakāñcanasaṃnibhaḥ |
havistat pratijagrāha pāvakaḥ svayamutthitaḥ || 25 ||
[Analyze grammar]

so'stramāhārayāmāsa brāhmamastravidāṃ varaḥ |
dhanuścātmarathaṃ caiva sarvaṃ tatrābhyamantrayat || 26 ||
[Analyze grammar]

tasminnāhūyamāne'stre hūyamāne ca pāvake |
sārkagrahendu nakṣatraṃ vitatrāsa nabhastalam || 27 ||
[Analyze grammar]

sa pāvakaṃ pāvakadīptatejā hutvā mahendrapratimaprabhāvaḥ |
sacāpabāṇāsirathāśvasūtaḥ khe'ntardadha ātmānamacintyarūpaḥ || 28 ||
[Analyze grammar]

sa sainyamutsṛjya sametya tūrṇaṃ mahāraṇe vānaravāhinīṣu |
adṛśyamānaḥ śarajālamugraṃ vavarṣa nīlāmbudharo yathāmbu || 29 ||
[Analyze grammar]

te śakrajidbāṇaviśīrṇadehā māyāhatā visvaramunnadantaḥ |
raṇe nipeturharayo'drikalpā yathendravajrābhihatā nagendrāḥ || 30 ||
[Analyze grammar]

te kevalaṃ saṃdadṛśuḥ śitāgrānbāṇān raṇe vānaravāhinīṣu |
māyā nigūḍhaṃ ca surendraśatruṃ na cātra taṃ rākṣasamabhyapaśyan || 31 ||
[Analyze grammar]

tataḥ sa rakṣo'dhipatirmahātmā sarvā diśo bāṇagaṇaiḥ śitāgraiḥ |
pracchādayāmāsa raviprakāśairviṣādayāmāsa ca vānarendrān || 32 ||
[Analyze grammar]

sa śūlanistriṃśa paraśvadhāni vyāvidhya dīptānalasaṃnibhāni |
savisphuliṅgojjvalapāvakāni vavarṣa tīvraṃ plavagendrasainye || 33 ||
[Analyze grammar]

tato jvalanasaṃkāśaiḥ śitairvānarayūthapāḥ |
tāḍitāḥ śakrajidbāṇaiḥ praphullā iva kiṃśukāḥ || 34 ||
[Analyze grammar]

anyonyamabhisarpanto ninadantaśca visvaram |
rākṣasendrāstranirbhinnā nipeturvānararṣabhāḥ || 35 ||
[Analyze grammar]

udīkṣamāṇā gaganaṃ ke cinnetreṣu tāḍitāḥ |
śarairviviśuranyonyaṃ petuśca jagatītale || 36 ||
[Analyze grammar]

hanūmantaṃ ca sugrīvamaṅgadaṃ gandhamādanam |
jāmbavantaṃ suṣeṇaṃ ca vegadarśinameva ca || 37 ||
[Analyze grammar]

maindaṃ ca dvividaṃ nīlaṃ gavākṣaṃ gajagomukhau |
kesariṃ harilomānaṃ vidyuddaṃṣṭraṃ ca vānaram || 38 ||
[Analyze grammar]

sūryānanaṃ jyotimukhaṃ tathā dadhimukhaṃ harim |
pāvakākṣaṃ nalaṃ caiva kumudaṃ caiva vānaram || 39 ||
[Analyze grammar]

prāsaiḥ śūlaiḥ śitairbāṇairindrajinmantrasaṃhitaiḥ |
vivyādha hariśārdūlān sarvāṃstān rākṣasottamaḥ || 40 ||
[Analyze grammar]

sa vai gadābhirhariyūthamukhyānnirbhidya bāṇaistapanīyapuṅkhaiḥ |
vavarṣa rāmaṃ śaravṛṣṭijālaiḥ salakṣmaṇaṃ bhāskararaśmikalpaiḥ || 41 ||
[Analyze grammar]

sa bāṇavarṣairabhivarṣyamāṇo dhārānipātāniva tān vicintya |
samīkṣamāṇaḥ paramādbhutaśrī rāmastadā lakṣmaṇamityuvāca || 42 ||
[Analyze grammar]

asau punarlakṣmaṇa rākṣasendro brahmāstramāśritya surendraśatruḥ |
nipātayitvā harisainyamugramasmāñ śarairardayati prasaktam || 43 ||
[Analyze grammar]

svayambhuvā dattavaro mahātmā khamāsthito'ntarhitabhīmakāyaḥ |
kathaṃ nu śakyo yudhi naṣṭadeho nihantumadyendrajidudyatāstraḥ || 44 ||
[Analyze grammar]

manye svayambhūrbhagavānacintyo yasyaitadastraṃ prabhavaśca yo'sya |
bāṇāvapātāṃstvamihādya dhīmanmayā sahāvyagramanāḥ sahasva || 45 ||
[Analyze grammar]

pracchādayatyeṣa hi rākṣasendraḥ sarvā diśaḥ sāyakavṛṣṭijālaiḥ |
etacca sarvaṃ patitāgryavīraṃ na bhrājate vānararājasainyam || 46 ||
[Analyze grammar]

āvāṃ tu dṛṣṭvā patitau visaṃjñau nivṛttayuddhau hataroṣaharṣau |
dhruvaṃ pravekṣyatyamarārivāsaṃ asau samādāya raṇāgralakṣmīm || 47 ||
[Analyze grammar]

tatastu tāvindrajidastrajālairbabhūvatustatra tadā viśastau |
sa cāpi tau tatra viṣādayitvā nanāda harṣād yudhi rākṣasendraḥ || 48 ||
[Analyze grammar]

sa tattadā vānararājasainyaṃ rāmaṃ ca saṃkhye sahalakṣmaṇena |
viṣādayitvā sahasā viveśa purīṃ daśagrīvabhujābhiguptām || 49 ||
[Analyze grammar]