Chapter 58

narāntakaṃ hataṃ dṛṣṭvā cukruśurnairṛtarṣabhāḥ |
devāntakastrimūrdhā ca paulastyaśca mahodaraḥ || 1 ||
[Analyze grammar]

ārūḍho meghasaṃkāśaṃ vāraṇendraṃ mahodaraḥ |
vāliputraṃ mahāvīryamabhidudrāva vīryavān || 2 ||
[Analyze grammar]

bhrātṛvyasanasaṃtaptastadā devāntako balī |
ādāya parighaṃ dīptamaṅgadaṃ samabhidravat || 3 ||
[Analyze grammar]

rathamādityasaṃkāśaṃ yuktaṃ paramavājibhiḥ |
āsthāya triśirā vīro vāliputramathābhyayāt || 4 ||
[Analyze grammar]

sa tribhirdevadarpaghnairnairṛtendrairabhidrutaḥ |
vṛkṣamutpāṭayāmāsa mahāviṭapamaṅgadaḥ || 5 ||
[Analyze grammar]

devāntakāya taṃ vīraścikṣepa sahasāṅgadaḥ |
mahāvṛkṣaṃ mahāśākhaṃ śakro dīptamivāśanim || 6 ||
[Analyze grammar]

triśirāstaṃ praciccheda śarairāśīviṣopamaiḥ |
sa vṛkṣaṃ kṛttamālokya utpapāta tato'ṅgadaḥ || 7 ||
[Analyze grammar]

sa vavarṣa tato vṛkṣāñ śilāśca kapikuñjaraḥ |
tānpraciccheda saṃkruddhastriśirā niśitaiḥ śaraiḥ || 8 ||
[Analyze grammar]

parighāgreṇa tān vṛkṣānbabhañja ca surāntakaḥ |
triśirāścāṅgadaṃ vīramabhidudrāva sāyakaiḥ || 9 ||
[Analyze grammar]

gajena samabhidrutya vāliputraṃ mahodaraḥ |
jaghānorasi saṃkruddhastomarairvajrasaṃnibhaiḥ || 10 ||
[Analyze grammar]

devāntakaśca saṃkruddhaḥ parigheṇa tadāṅgadam |
upagamyābhihatyāśu vyapacakrāma vegavān || 11 ||
[Analyze grammar]

sa tribhirnairṛtaśreṣṭhairyugapat samabhidrutaḥ |
na vivyathe mahātejā vāliputraḥ pratāpavān || 12 ||
[Analyze grammar]

talena bhṛśamutpatya jaghānāsya mahāgajam |
petaturlocane tasya vinanāda sa vāraṇaḥ || 13 ||
[Analyze grammar]

viṣāṇaṃ cāsya niṣkṛṣya vāliputro mahābalaḥ |
devāntakamabhidrutya tāḍayāmāsa saṃyuge || 14 ||
[Analyze grammar]

sa vihvalitasarvāṅgo vātoddhata iva drumaḥ |
lākṣārasasavarṇaṃ ca susrāva rudhiraṃ mukhāt || 15 ||
[Analyze grammar]

athāśvāsya mahātejāḥ kṛcchrāddevāntako balī |
āvidhya parighaṃ ghoramājaghāna tadāṅgadam || 16 ||
[Analyze grammar]

parighābhihataścāpi vānarendrātmajastadā |
jānubhyāṃ patito bhūmau punarevotpapāta ha || 17 ||
[Analyze grammar]

samutpatantaṃ triśirāstribhirāśīviṣopamaiḥ |
ghorairharipateḥ putraṃ lalāṭe'bhijaghāna ha || 18 ||
[Analyze grammar]

tato'ṅgadaṃ parikṣiptaṃ tribhirnairṛtapuṃgavaiḥ |
hanūmānapi vijñāya nīlaścāpi pratasthatuḥ || 19 ||
[Analyze grammar]

tataścikṣepa śailāgraṃ nīlastriśirase tadā |
tad rāvaṇasuto dhīmānbibheda niśitaiḥ śaraiḥ || 20 ||
[Analyze grammar]

tadbāṇaśatanirbhinnaṃ vidāritaśilātalam |
savisphuliṅgaṃ sajvālaṃ nipapāta gireḥ śiraḥ || 21 ||
[Analyze grammar]

tato jṛmbhitamālokya harṣāddevāntakastadā |
parigheṇābhidudrāva mārutātmajamāhave || 22 ||
[Analyze grammar]

tamāpatantamutpatya hanūmānmārutātmajaḥ |
ājaghāna tadā mūrdhni vajravegena muṣṭinā || 23 ||
[Analyze grammar]

sa muṣṭiniṣpiṣṭavikīrṇamūrdhā nirvāntadantākṣivilambijihvaḥ |
devāntako rākṣasarājasūnurgatāsururvyāṃ sahasā papāta || 24 ||
[Analyze grammar]

tasmin hate rākṣasayodhamukhye mahābale saṃyati devaśatrau |
kruddhastrimūrdhā niśitāgramugraṃ vavarṣa nīlorasi bāṇavarṣam || 25 ||
[Analyze grammar]

sa taiḥ śaraughairabhivarṣyamāṇo vibhinnagātraḥ kapisainyapālaḥ |
nīlo babhūvātha visṛṣṭagātro viṣṭambhitastena mahābalena || 26 ||
[Analyze grammar]

tatastu nīlaḥ pratilabhya saṃjñāṃ śailaṃ samutpāṭya savṛkṣaṣaṇḍam |
tataḥ samutpatya bhṛśogravego mahodaraṃ tena jaghāna mūrdhni || 27 ||
[Analyze grammar]

tataḥ sa śailābhinipātabhagno mahodarastena saha dvipena |
vipothito bhūmitale gatāsuḥ papāta varjābhihato yathādriḥ || 28 ||
[Analyze grammar]

pitṛvyaṃ nihataṃ dṛṣṭvā triśirāścāpamādade |
hanūmantaṃ ca saṃkruddho vivyādha niśitaiḥ śaraiḥ || 29 ||
[Analyze grammar]

hanūmāṃstu samutpatya hayāṃstriśirasastadā |
vidadāra nakhaiḥ kruddho gajendraṃ mṛgarāḍiva || 30 ||
[Analyze grammar]

atha śaktiṃ samādāya kālarātrimivāntakaḥ |
cikṣepānilaputrāya triśirā rāvaṇātmajaḥ || 31 ||
[Analyze grammar]

divi kṣiptāmivolkāṃ tāṃ śaktiṃ kṣiptāmasaṃgatām |
gṛhītvā hariśārdūlo babhañja ca nanāda ca || 32 ||
[Analyze grammar]

tāṃ dṛṣṭvā ghorasaṃkāśāṃ śaktiṃ bhagnāṃ hanūmatā |
prahṛṣṭā vānaragaṇā vinedurjaladā iva || 33 ||
[Analyze grammar]

tataḥ khaḍgaṃ samudyamya triśirā rākṣasottamaḥ |
nicakhāna tadā roṣādvānarendrasya vakṣasi || 34 ||
[Analyze grammar]

khaḍgaprahārābhihato hanūmānmārutātmajaḥ |
ājaghāna trimūrdhānaṃ talenorasi vīryavān || 35 ||
[Analyze grammar]

sa talabhihatastena srastahastāmbaro bhuvi |
nipapāta mahātejāstriśirāstyaktacetanaḥ || 36 ||
[Analyze grammar]

sa tasya patataḥ khaḍgaṃ samācchidya mahākapiḥ |
nanāda girisaṃkāśastrāsayan sarvanairṛtān || 37 ||
[Analyze grammar]

amṛṣyamāṇastaṃ ghoṣamutpapāta niśācaraḥ |
utpatya ca hanūmantaṃ tāḍayāmāsa muṣṭinā || 38 ||
[Analyze grammar]

tena muṣṭiprahāreṇa saṃcukopa mahākapiḥ |
kupitaśca nijagrāha kirīṭe rākṣasarṣabham || 39 ||
[Analyze grammar]

sa tasya śīrṣāṇyasinā śitena kirīṭajuṣṭāni sakuṇḍalāni |
kruddhaḥ praciccheda suto'nilasya tvaṣṭuḥ sutasyeva śirāṃsi śakraḥ || 40 ||
[Analyze grammar]

tānyāyatākṣāṇyagasaṃnibhāni pradīptavaiśvānaralocanāni |
petuḥ śirāṃsīndraripordharaṇyāṃ jyotīṃṣi muktāni yathārkamārgāt || 41 ||
[Analyze grammar]

tasmin hate devaripau triśīrṣe hanūmata śakraparākrameṇa |
neduḥ plavaṃgāḥ pracacāla bhūmī rakṣāṃsyatho dudruvire samantāt || 42 ||
[Analyze grammar]

hataṃ triśirasaṃ dṛṣṭvā tathaiva ca mahodaram |
hatau prekṣya durādharṣau devāntakanarāntakau || 43 ||
[Analyze grammar]

cukopa paramāmarṣī mahāpārśvo mahābalaḥ |
jagrāhārciṣmatīṃ cāpi gadāṃ sarvāyasīṃ śubhām || 44 ||
[Analyze grammar]

hemapaṭṭaparikṣiptāṃ māṃsaśoṇitalepanām |
virājamānāṃ vapuṣā śatruśoṇitarañjitām || 45 ||
[Analyze grammar]

tejasā saṃpradīptāgrāṃ raktamālyavibhūṣitām |
airāvatamahāpadmasārvabhauma bhayāvahām || 46 ||
[Analyze grammar]

gadāmādāya saṃkruddho mahāpārśvo mahābalaḥ |
harīn samabhidudrāva yugāntāgniriva jvalan || 47 ||
[Analyze grammar]

atharṣayaḥ samutpatya vānaro ravaṇānujam |
mahāpārśvamupāgamya tasthau tasyāgrato balī || 48 ||
[Analyze grammar]

taṃ purastāt sthitaṃ dṛṣṭvā vānaraṃ parvatopamam |
ājaghānorasi kruddho gadayā vajrakalpayā || 49 ||
[Analyze grammar]

sa tayābhihatastena gadayā vānararṣabhaḥ |
bhinnavakṣāḥ samādhūtaḥ susrāva rudhiraṃ bahu || 50 ||
[Analyze grammar]

sa saṃprāpya cirāt saṃjñāmṛṣabho vānararṣabhaḥ |
kruddho visphuramāṇauṣṭho mahāpārśvamudaikṣata || 51 ||
[Analyze grammar]

tāṃ gṛhītvā gadāṃ bhīmāmāvidhya ca punaḥ punaḥ |
mattānīkaṃ mahāpārśvaṃ jaghāna raṇamūrdhani || 52 ||
[Analyze grammar]

sa svayā gadayā bhinno vikīrṇadaśanekṣaṇaḥ |
nipapāta mahāpārśvo vajrāhata ivācalaḥ || 53 ||
[Analyze grammar]

tasmin hate bhrātari rāvaṇasya tannairṛtānāṃ balamarṇavābham |
tyaktāyudhaṃ kevalajīvitārthaṃ dudrāva bhinnārṇavasaṃnikāśam || 54 ||
[Analyze grammar]