Chapter 54

sa nanāda mahānādaṃ samudramabhinādayan |
janayanniva nirghātān vidhamanniva parvatān || 1 ||
[Analyze grammar]

tamavadhyaṃ maghavatā yamena varuṇena ca |
prekṣya bhīmākṣamāyāntaṃ vānarā vipradudruvuḥ || 2 ||
[Analyze grammar]

tāṃstu vidravato dṛṣṭvā vāliputro'ṅgado'bravīt |
nalaṃ nīlaṃ gavākṣaṃ ca kumudaṃ ca mahābalam || 3 ||
[Analyze grammar]

ātmānamatra vismṛtya vīryāṇyabhijanāni ca |
kva gacchata bhayatrastāḥ prākṛtā harayo yathā || 4 ||
[Analyze grammar]

sādhu saumyā nivartadhvaṃ kiṃ prāṇānparirakṣatha |
nālaṃ yuddhāya vai rakṣo mahatīyaṃ vibhīṣikāḥ || 5 ||
[Analyze grammar]

mahatīmutthitāmenāṃ rākṣasānāṃ vibhīṣikām |
vikramādvidhamiṣyāmo nivartadhvaṃ plavaṃgamāḥ || 6 ||
[Analyze grammar]

kṛcchreṇa tu samāśvāsya saṃgamya ca tatastataḥ |
vṛkṣādrihastā harayaḥ saṃpratasthū raṇājiram || 7 ||
[Analyze grammar]

te nivṛtya tu saṃkruddhāḥ kumbhakarṇaṃ vanaukasaḥ |
nijaghnuḥ paramakruddhāḥ samadā iva kuñjarāḥ |
prāṃśubhirgiriśṛṅgaiśca śilābhiśca mahābalāḥ || 8 ||
[Analyze grammar]

pādapaiḥ puṣpitāgraiśca hanyamāno na kampate |
tasya gātreṣu patitā bhidyante śataśaḥ śilāḥ |
pādapāḥ puṣpitāgrāśca bhagnāḥ peturmahītale || 9 ||
[Analyze grammar]

so'pi sainyāni saṃkruddho vānarāṇāṃ mahaujasām |
mamantha paramāyatto vanānyagnirivotthitaḥ || 10 ||
[Analyze grammar]

lohitārdrāstu bahavaḥ śerate vānararṣabhāḥ |
nirastāḥ patitā bhūmau tāmrapuṣpā iva drumāḥ || 11 ||
[Analyze grammar]

laṅghayantaḥ pradhāvanto vānarā nāvalokayan |
ke cit samudre patitāḥ ke cidgaganamāśritāḥ || 12 ||
[Analyze grammar]

vadhyamānāstu te vīrā rākṣasena balīyasā |
sāgaraṃ yena te tīrṇāḥ pathā tenaiva dudruvuḥ || 13 ||
[Analyze grammar]

te sthalāni tathā nimnaṃ viṣaṇṇavadanā bhayāt |
ṛkṣā vṛkṣān samārūḍhāḥ ke cit parvatamāśritāḥ || 14 ||
[Analyze grammar]

mamajjurarṇave ke cidguhāḥ ke cit samāśritāḥ |
niṣeduḥ plavagāḥ ke cit ke cinnaivāvatasthire || 15 ||
[Analyze grammar]

tān samīkṣyāṅgado bhaṅgān vānarānidamabravīt |
avatiṣṭhata yudhyāmo nivartadhvaṃ plavaṃgamāḥ || 16 ||
[Analyze grammar]

bhagnānāṃ vo na paśyāmi parigamya mahīmimām |
sthānaṃ sarve nivartadhvaṃ kiṃ prāṇānparirakṣatha || 17 ||
[Analyze grammar]

nirāyudhānāṃ dravatāmasaṃgagatipauruṣāḥ |
dārā hyapahasiṣyanti sa vai ghātastu jīvitām || 18 ||
[Analyze grammar]

kuleṣu jātāḥ sarve sma vistīrṇeṣu mahatsu ca |
anāryāḥ khalu yadbhītāstyaktvā vīryaṃ pradhāvata || 19 ||
[Analyze grammar]

vikatthanāni vo yāni yadā vai janasaṃsadi |
tāni vaḥ kva ca yatāni sodagrāṇi mahānti ca || 20 ||
[Analyze grammar]

bhīrupravādāḥ śrūyante yastu jīvati dhikkṛtaḥ |
mārgaḥ satpuruṣairjuṣṭaḥ sevyatāṃ tyajyatāṃ bhayam || 21 ||
[Analyze grammar]

śayāmahe vā nihatāḥ pṛthivyāmalpajīvitāḥ |
duṣprāpaṃ brahmalokaṃ vā prāpnumo yudhi sūditāḥ |
saṃprāpnuyāmaḥ kīrtiṃ vā nihatya śatrumāhave || 22 ||
[Analyze grammar]

na kumbhakarṇaḥ kākutsthaṃ dṛṣṭvā jīvan gamiṣyati |
dīpyamānamivāsādya pataṃgo jvalanaṃ yathā || 23 ||
[Analyze grammar]

palāyanena coddiṣṭāḥ prāṇān rakṣāmahe vayam |
ekena bahavo bhagnā yaśo nāśaṃ gamiṣyati || 24 ||
[Analyze grammar]

evaṃ bruvāṇaṃ taṃ śūramaṅgadaṃ kanakāṅgadam |
dravamāṇāstato vākyamūcuḥ śūravigarhitam || 25 ||
[Analyze grammar]

kṛtaṃ naḥ kadanaṃ ghoraṃ kumbhakarṇena rakṣasā |
na sthānakālo gacchāmo dayitaṃ jīvitaṃ hi naḥ || 26 ||
[Analyze grammar]

etāvaduktvā vacanaṃ sarve te bhejire diśaḥ |
bhīmaṃ bhīmākṣamāyāntaṃ dṛṣṭvā vānarayūthapāḥ || 27 ||
[Analyze grammar]

dravamāṇāstu te vīrā aṅgadena valīmukhāḥ |
sāntvaiśca bahumānaiśca tataḥ sarve nivartitāḥ || 28 ||
[Analyze grammar]

ṛṣabhaśarabhamaindadhūmranīlāḥ kumudasuṣeṇagavākṣarambhatārāḥ |
dvividapanasavāyuputramukhyāstvaritatarābhimukhaṃ raṇaṃ prayātāḥ || 29 ||
[Analyze grammar]