Chapter 38

bhartāraṃ nihataṃ dṛṣṭvā lakṣmaṇaṃ ca mahābalam |
vilalāpa bhṛśaṃ sītā karuṇaṃ śokakarśitā || 1 ||
[Analyze grammar]

ūcurlakṣaṇikā ye māṃ putriṇyavidhaveti ca |
te'sya sarve hate rāme'jñānino'nṛtavādinaḥ || 2 ||
[Analyze grammar]

yajvano mahiṣīṃ ye māmūcuḥ patnīṃ ca satriṇaḥ |
te'dya sarve hate rāme'jñānino'nṛtavādinaḥ || 3 ||
[Analyze grammar]

vīrapārthivapatnī tvaṃ ye dhanyeti ca māṃ viduḥ |
te'dya sarve hate rāme'jñānino'nṛtavādinaḥ || 4 ||
[Analyze grammar]

ūcuḥ saṃśravaṇe ye māṃ dvijāḥ kārtāntikāḥ śubhām |
te'dya sarve hate rāme'jñānino'nṛtavādinaḥ || 5 ||
[Analyze grammar]

imāni khalu padmāni pādayoryaiḥ kila striyaḥ |
adhirājye'bhiṣicyante narendraiḥ patibhiḥ saha || 6 ||
[Analyze grammar]

vaidhavyaṃ yānti yairnāryo'lakṣaṇairbhāgyadurlabhāḥ |
nātmanastāni paśyāmi paśyantī hatalakṣaṇā || 7 ||
[Analyze grammar]

satyānīmāni padmāni strīṇāmuktvāni lakṣaṇe |
tānyadya nihate rāme vitathāni bhavanti me || 8 ||
[Analyze grammar]

keśāḥ sūkṣmāḥ samā nīlā bhruvau cāsaṃgate mama |
vṛtte cālomaśe jaṅghe dantāścāviralā mama || 9 ||
[Analyze grammar]

śaṅkhe netre karau pādau gulphāv ūrū ca me citau |
anuvṛttā nakhāḥ snigdhāḥ samāścāṅgulayo mama || 10 ||
[Analyze grammar]

stanau cāviralau pīnau mamemau magnacūcukau |
magnā cotsaṅginī nābhiḥ pārśvoraskaṃ ca me citam || 11 ||
[Analyze grammar]

mama varṇo maṇinibho mṛdūnyaṅgaruhāṇi ca |
pratiṣṭhitāṃ dvadaśabhirmāmūcuḥ śubhalakṣaṇām || 12 ||
[Analyze grammar]

samagrayavamacchidraṃ pāṇipādaṃ ca varṇavat |
mandasmitetyeva ca māṃ kanyālakṣaṇikā viduḥ || 13 ||
[Analyze grammar]

adhirājye'bhiṣeko me brāhmaṇaiḥ patinā saha |
kṛtāntakuśalairuktaṃ tat sarvaṃ vitathīkṛtam || 14 ||
[Analyze grammar]

śodhayitvā janasthānaṃ pravṛttimupalabhya ca |
tīrtvā sāgaramakṣobhyaṃ bhrātarau goṣpade hatau || 15 ||
[Analyze grammar]

nanu vāruṇamāgneyamaindraṃ vāyavyameva ca |
astraṃ brahmaśiraścaiva rāghavau pratyapadyatām || 16 ||
[Analyze grammar]

adṛśyamānena raṇe māyayā vāsavopamau |
mama nāthāvanāthāyā nihatau rāmalakṣmaṇau || 17 ||
[Analyze grammar]

na hi dṛṣṭipathaṃ prāpya rāghavasya raṇe ripuḥ |
jīvanpratinivarteta yadyapi syānmanojavaḥ || 18 ||
[Analyze grammar]

na kālasyātibhāro'sti kṛtāntaśca sudurjayaḥ |
yatra rāmaḥ saha bhrātrā śete yudhi nipāthitaḥ || 19 ||
[Analyze grammar]

nāhaṃ śocāmi bhartāraṃ nihataṃ na ca lakṣmaṇam |
nātmānaṃ jananī cāpi yathā śvaśrūṃ tapasvinīm || 20 ||
[Analyze grammar]

sā hi cintayate nityaṃ samāptavratamāgatam |
kadā drakṣyāmi sītāṃ ca rāmaṃ ca sahalakṣmaṇam || 21 ||
[Analyze grammar]

paridevayamānāṃ tāṃ rākṣasī trijaṭābravīt |
mā viṣādaṃ kṛthā devi bhartāyaṃ tava jīvati || 22 ||
[Analyze grammar]

kāraṇāni ca vakṣyāmi mahānti sadṛśāni ca |
yathemau jīvato devi bhrātarau rāmalakṣmaṇau || 23 ||
[Analyze grammar]

na hi kopaparītāni harṣaparyutsukāni ca |
bhavanti yudhi yodhānāṃ mukhāni nihate patau || 24 ||
[Analyze grammar]

idaṃ vimānaṃ vaidehi puṣpakaṃ nāma nāmataḥ |
divyaṃ tvāṃ dhārayennedaṃ yadyetau gajajīvitau || 25 ||
[Analyze grammar]

hatavīrapradhānā hi hatotsāhā nirudyamā |
senā bhramati saṃkhyeṣu hatakarṇeva naurjale || 26 ||
[Analyze grammar]

iyaṃ punarasaṃbhrāntā nirudvignā tarasvinī |
senā rakṣati kākutsthau māyayā nirjitau raṇe || 27 ||
[Analyze grammar]

sā tvaṃ bhava suvisrabdhā anumānaiḥ sukhodayaiḥ |
ahatau paśya kākutsthau snehādetadbravīmi te || 28 ||
[Analyze grammar]

anṛtaṃ noktapūrvaṃ me na ca vakṣye kadā cana |
cāritrasukhaśīlatvāt praviṣṭāsi mano mama || 29 ||
[Analyze grammar]

nemau śakyau raṇe jetuṃ sendrairapi surāsuraiḥ |
etayorānanaṃ dṛṣṭvā mayā cāveditaṃ tava || 30 ||
[Analyze grammar]

idaṃ ca sumahaccihnaṃ śanaiḥ paśyasva maithili |
niḥsaṃjñāvapyubhāvetau naiva lakṣmīrviyujyate || 31 ||
[Analyze grammar]

prāyeṇa gatasattvānāṃ puruṣāṇāṃ gatāyuṣām |
dṛśyamāneṣu vaktreṣu paraṃ bhavati vaikṛtam || 32 ||
[Analyze grammar]

tyaja śokaṃ ca duḥkhaṃ ca mohaṃ ca janakātmaje |
rāmalakṣmaṇayorarthe nādya śakyamajīvitum || 33 ||
[Analyze grammar]

śrutvā tu vacanaṃ tasyāḥ sītā surasutopamā |
kṛtāñjaliruvācedamevamastviti maithilī || 34 ||
[Analyze grammar]

vimānaṃ puṣpakaṃ tattu samivartya manojavam |
dīnā trijaṭayā sītā laṅkāmeva praveśitā || 35 ||
[Analyze grammar]

tatastrijaṭayā sārdhaṃ puṣpakādavaruhya sā |
aśokavanikāmeva rakṣasībhiḥ praveśitā || 36 ||
[Analyze grammar]

praviśya sītā bahuvṛkṣaṣaṇḍāṃ tāṃ rākṣasendrasya vihārabhūmim |
saṃprekṣya saṃcintya ca rājaputrau paraṃ viṣādaṃ samupājagāma || 37 ||
[Analyze grammar]