Chapter 30

tāṃ rātrimuṣitāstatra suvele haripuṃgavāḥ |
laṅkāyāṃ dadṛśurvīrā vanānyupavanāni ca || 1 ||
[Analyze grammar]

samasaumyāni ramyāṇi viśālānyāyatāni ca |
dṛṣṭiramyāṇi te dṛṣṭvā babhūvurjātavismayāḥ || 2 ||
[Analyze grammar]

campakāśokapuṃnāgasālatālasamākulā |
tamālavanasaṃchannā nāgamālāsamāvṛtā || 3 ||
[Analyze grammar]

hintālairarjunairnīpaiḥ saptaparṇaiśca puṣpitaiḥ |
tilakaiḥ karṇikāraiśca paṭālaiśca samantataḥ || 4 ||
[Analyze grammar]

śuśubhe puṣpitāgraiśca latāparigatairdrumaiḥ |
laṅkā bahuvidhairdivyairyathendrasyāmarāvatī || 5 ||
[Analyze grammar]

vicitrakusumopetai raktakomalapallavaiḥ |
śādvalaiśca tathā nīlaiścitrābhirvanarājibhiḥ || 6 ||
[Analyze grammar]

gandhāḍhyānyabhiramyāṇi puṣpāṇi ca phalāni ca |
dhārayantyagamāstatra bhūṣaṇānīva mānavāḥ || 7 ||
[Analyze grammar]

taccaitrarathasaṃkāśaṃ manojñaṃ nandanopamam |
vanaṃ sarvartukaṃ ramyaṃ śuśubhe ṣaṭpadāyutam || 8 ||
[Analyze grammar]

natyūhakoyaṣṭibhakairnṛtyamānaiśca barhibhiḥ |
rutaṃ parabhṛtānāṃ ca śuśruve vananirjhare || 9 ||
[Analyze grammar]

nityamattavihaṃgāni bhramarācaritāni ca |
kokilākulaṣaṇḍāni vihagābhirutāni ca || 10 ||
[Analyze grammar]

bhṛṅgarājābhigītāni bhramaraiḥ sevitāni ca |
koṇālakavighuṣṭāni sārasābhirutāni ca || 11 ||
[Analyze grammar]

viviśuste tatastāni vanānyupavanāni ca |
hṛṣṭāḥ pramuditā vīrā harayaḥ kāmarūpiṇaḥ || 12 ||
[Analyze grammar]

teṣāṃ praviśatāṃ tatra vānarāṇāṃ mahaujasām |
puṣpasaṃsargasurabhirvavau ghrāṇasukho'nilaḥ || 13 ||
[Analyze grammar]

anye tu harivīrāṇāṃ yūthānniṣkramya yūthapāḥ |
sugrīveṇābhyanujñātā laṅkāṃ jagmuḥ patākinīm || 14 ||
[Analyze grammar]

vitrāsayanto vihagāṃstrāsayanto mṛgadvipān |
kampayantaśca tāṃ laṅkāṃ nādaiḥ svairnadatāṃ varāḥ || 15 ||
[Analyze grammar]

kurvantaste mahāvegā mahīṃ cāraṇapīḍitām |
rajaśca sahasaivordhvaṃ jagāma caraṇoddhatam || 16 ||
[Analyze grammar]

ṛkṣāḥ siṃhā varāhāśca mahiṣā vāraṇā mṛgāḥ |
tena śabdena vitrastā jagmurbhītā diśo daśa || 17 ||
[Analyze grammar]

śikharaṃ tu trikūṭasya prāṃśu caikaṃ divispṛśam |
samantāt puṣpasaṃchannaṃ mahārajatasaṃnibham || 18 ||
[Analyze grammar]

śatayojanavistīrṇaṃ vimalaṃ cārudarśanam |
ślakṣṇaṃ śrīmanmahaccaiva duṣprāpaṃ śakunairapi || 19 ||
[Analyze grammar]

manasāpi durārohaṃ kiṃ punaḥ karmaṇā janaiḥ |
niviṣṭā tatra śikhare laṅkā rāvaṇapālitā || 20 ||
[Analyze grammar]

sā purī gopurairuccaiḥ pāṇḍurāmbudasaṃnibhaiḥ |
kāñcanena ca sālena rājatena ca śobhitā || 21 ||
[Analyze grammar]

prāsādaiśca vimānaiśca laṅkā paramabhūṣitā |
ghanairivātapāpāye madhyamaṃ vaiṣṇavaṃ padam || 22 ||
[Analyze grammar]

yasyāṃ stambhasahasreṇa prāsādaḥ samalaṃkṛtaḥ |
kailāsaśikharākāro dṛśyate khamivollikhan || 23 ||
[Analyze grammar]

caityaḥ sa rākṣasendrasya babhūva purabhūṣaṇam |
śatena rakṣasāṃ nityaṃ yaḥ samagreṇa rakṣyate || 24 ||
[Analyze grammar]

tāṃ samṛddhāṃ samṛddhārtho lakṣmīvāṃl lakṣmaṇāgrajaḥ |
rāvaṇasya purīṃ rāmo dadarśa saha vānaraiḥ || 25 ||
[Analyze grammar]

tāṃ ratnapūrṇāṃ bahusaṃvidhānāṃ prāsādamālābhiralaṃkṛtāṃ ca |
purīṃ mahāyantrakavāṭamukhyāṃ dadarśa rāmo mahatā balena || 26 ||
[Analyze grammar]