Chapter 27

tattu mālyavato vākyaṃ hitamuktaṃ daśānanaḥ |
na marṣayati duṣṭātmā kālasya vaśamāgataḥ || 1 ||
[Analyze grammar]

sa baddhvā bhrukuṭiṃ vaktre krodhasya vaśamāgataḥ |
amarṣāt parivṛttākṣo mālyavantamathābravīt || 2 ||
[Analyze grammar]

hitabuddhyā yadahitaṃ vacaḥ paruṣamucyate |
parapakṣaṃ praviśyaiva naitacchrotragataṃ mama || 3 ||
[Analyze grammar]

mānuṣaṃ kṛpaṇaṃ rāmamekaṃ śākhāmṛgāśrayam |
samarthaṃ manyase kena tyaktaṃ pitrā vanālayam || 4 ||
[Analyze grammar]

rakṣasāmīśvaraṃ māṃ ca devatānāṃ bhayaṃkaram |
hīnaṃ māṃ manyase kena ahīnaṃ sarvavikramaiḥ || 5 ||
[Analyze grammar]

vīradveṣeṇa vā śaṅke pakṣapātena vā ripoḥ |
tvayāhaṃ paruṣāṇyuktaḥ paraprotsāhanena vā || 6 ||
[Analyze grammar]

prabhavantaṃ padasthaṃ hi paruṣaṃ ko'bhidhāsyati |
paṇḍitaḥ śāstratattvajño vinā protsāhanād ripoḥ || 7 ||
[Analyze grammar]

ānīya ca vanāt sītāṃ padmahīnāmiva śriyam |
kimarthaṃ pratidāsyāmi rāghavasya bhayādaham || 8 ||
[Analyze grammar]

vṛtaṃ vānarakoṭībhiḥ sasugrīvaṃ salakṣmaṇam |
paśya kaiścidahobhistvaṃ rāghavaṃ nihataṃ mayā || 9 ||
[Analyze grammar]

dvandve yasya na tiṣṭhanti daivatānyapi saṃyuge |
sa kasmād rāvaṇo yuddhe bhayamāhārayiṣyati || 10 ||
[Analyze grammar]

dvidhā bhajyeyamapyevaṃ na nameyaṃ tu kasya cit |
eṣa me sahajo doṣaḥ svabhāvo duratikramaḥ || 11 ||
[Analyze grammar]

yadi tāvat samudre tu seturbaddho yadṛcchayā |
rāmeṇa vismayaḥ ko'tra yena te bhayamāgatam || 12 ||
[Analyze grammar]

sa tu tīrtvārṇavaṃ rāmaḥ saha vānarasenayā |
pratijānāmi te satyaṃ na jīvanpratiyāsyati || 13 ||
[Analyze grammar]

evaṃ bruvāṇaṃ saṃrabdhaṃ ruṣṭaṃ vijñāya rāvaṇam |
vrīḍito mālyavān vākyaṃ nottaraṃ pratyapadyata || 14 ||
[Analyze grammar]

jayāśiṣā ca rājānaṃ vardhayitvā yathocitam |
mālyavānabhyanujñāto jagāma svaṃ niveśanam || 15 ||
[Analyze grammar]

rāvaṇastu sahāmātyo mantrayitvā vimṛśya ca |
laṅkāyāmatulāṃ guptiṃ kārayāmāsa rākṣasaḥ || 16 ||
[Analyze grammar]

vyādideśa ca pūrvasyāṃ prahastaṃ dvāri rākṣasaṃ |
dakṣiṇasyāṃ mahāvīryau mahāpārśva mahodarau || 17 ||
[Analyze grammar]

paścimāyāmatho dvāri putramindrajitaṃ tathā |
vyādideśa mahāmāyaṃ rākṣasairbahubhirvṛtam || 18 ||
[Analyze grammar]

uttarasyāṃ puradvāri vyādiśya śukasāraṇau |
svayaṃ cātra bhaviṣyāmi mantriṇastānuvāca ha || 19 ||
[Analyze grammar]

rākṣasaṃ tu virūpākṣaṃ mahāvīryaparākramam |
madhyame'sthāpayadgulme bahubhiḥ saha rākṣasaiḥ || 20 ||
[Analyze grammar]

evaṃvidhānaṃ laṅkāyāṃ kṛtvā rākṣasapuṃgavaḥ |
mene kṛtārthamātmānaṃ kṛtāntavaśamāgataḥ || 21 ||
[Analyze grammar]

visarjayāmāsa tataḥ sa mantriṇo vidhānamājñāpya purasya puṣkalam |
jayāśiṣā mantragaṇena pūjito viveśa so'ntaḥpuramṛddhimanmahat || 22 ||
[Analyze grammar]