Chapter 22

tatastamakṣobhyabalaṃ laṅkāyāṃ nṛpateścaraḥ |
suvele rāghavaṃ śaile niviṣṭaṃ pratyavedayan || 1 ||
[Analyze grammar]

cārāṇāṃ rāvaṇaḥ śrutvā prāptaṃ rāmaṃ mahābalam |
jātodvego'bhavat kiṃ cit sacivāṃścedamabravīt || 2 ||
[Analyze grammar]

mantriṇaḥ śīghramāyāntu sarve vai susamāhitāḥ |
ayaṃ no mantrakālo hi saṃprāpta iva rākṣasāḥ || 3 ||
[Analyze grammar]

tasya tacchāsanaṃ śrutvā mantriṇo'bhyāgamandrutam |
tataḥ saṃmantrayāmāsa sacivai rākṣasaiḥ saha || 4 ||
[Analyze grammar]

mantrayitvā sa durdharṣaḥ kṣamaṃ yat samanantaram |
visarjayitvā sacivānpraviveśa svamālayam || 5 ||
[Analyze grammar]

tato rākṣasamāhūya vidyujjihvaṃ mahābalam |
māyāvidaṃ mahāmāyaḥ prāviśad yatra maithilī || 6 ||
[Analyze grammar]

vidyujjihvaṃ ca māyājñamabravīd rākṣasādhipaḥ |
mohayiṣyāmahe sītāṃ māyayā janakātmajām || 7 ||
[Analyze grammar]

śiro māyāmayaṃ gṛhya rāghavasya niśācara |
māṃ tvaṃ samupatiṣṭhasva mahacca saśaraṃ dhanuḥ || 8 ||
[Analyze grammar]

evamuktastathetyāha vidyujjihvo niśācaraḥ |
tasya tuṣṭo'bhavad rājā pradadau ca vibhūṣaṇam || 9 ||
[Analyze grammar]

aśokavanikāyāṃ tu praviveśa mahābalaḥ |
tato dīnāmadainyārhāṃ dadarśa dhanadānujaḥ |
adhomukhīṃ śokaparāmupaviṣṭāṃ mahītale || 10 ||
[Analyze grammar]

bhartārameva dhyāyantīmaśokavanikāṃ gatām |
upāsyamānāṃ ghorābhī rākṣasībhiradūrataḥ || 11 ||
[Analyze grammar]

upasṛtya tataḥ sītāṃ praharṣannāma kīrtayan |
idaṃ ca vacanaṃ dhṛṣṭamuvāca janakātmajām || 12 ||
[Analyze grammar]

sāntvyamānā mayā bhadre yamupāśritya valgase |
khara hantā sa te bhartā rāghavaḥ samare hataḥ || 13 ||
[Analyze grammar]

chinnaṃ te sarvato mūlaṃ darpaste nihato mayā |
vyasanenātmanaḥ sīte mama bhāryā bhaviṣyasi || 14 ||
[Analyze grammar]

alpapuṇye nivṛttārthe mūḍhe paṇḍitamānini |
śṛṇu bhartṛbadhaṃ sīte ghoraṃ vṛtravadhaṃ yathā || 15 ||
[Analyze grammar]

samāyātaḥ samudrāntaṃ māṃ hantuṃ kila rāghavaḥ |
vānarendrapraṇītena balena mahatā vṛtaḥ || 16 ||
[Analyze grammar]

saṃniviṣṭaḥ samudrasya tīramāsādya dakṣiṇam |
balena mahatā rāmo vrajatyastaṃ divākare || 17 ||
[Analyze grammar]

athādhvani pariśrāntamardharātre sthitaṃ balam |
sukhasuptaṃ samāsādya cāritaṃ prathamaṃ caraiḥ || 18 ||
[Analyze grammar]

tat prahastapraṇītena balena mahatā mama |
balamasya hataṃ rātrau yatra rāmaḥ sulakṣmaṇaḥ || 19 ||
[Analyze grammar]

paṭṭasānparighān khaḍgāṃścakrāndaṇḍānmahāyasān |
bāṇajālāni śūlāni bhāsvarān kūṭamudgarān || 20 ||
[Analyze grammar]

yaṣṭīśca tomarānprāsaṃścakrāṇi musalāni ca |
udyamyodyamya rakṣobhirvānareṣu nipātitāḥ || 21 ||
[Analyze grammar]

atha suptasya rāmasya prahastena pramāthinā |
asaktaṃ kṛtahastena śiraśchinnaṃ mahāsinā || 22 ||
[Analyze grammar]

vibhīṣaṇaḥ samutpatya nigṛhīto yadṛcchayā |
diśaḥ pravrājitaḥ sarvairlakṣmaṇaḥ plavagaiḥ saha || 23 ||
[Analyze grammar]

sugrīvo grīvayā śete bhagnayā plavagādhipaḥ |
nirastahanukaḥ śete hanūmān rākṣasairhataḥ || 24 ||
[Analyze grammar]

jāmbavānatha jānubhyāmutpatannihato yudhi |
paṭṭasairbahubhiśchinno nikṛttaḥ pādapo yathā || 25 ||
[Analyze grammar]

maindaśca dvividaścobhau nihatau vānararṣabhau |
niḥśvasantau rudantau ca rudhireṇa samukṣitau || 26 ||
[Analyze grammar]

asinābhyāhataśchinno madhye ripuniṣūdanaḥ |
abhiṣṭanati medinyāṃ panasaḥ panaso yathā || 27 ||
[Analyze grammar]

nārācairbahubhiśchinnaḥ śete daryāṃ darīmukhaḥ |
kumudastu mahātejā niṣkūjan sāyakairhataḥ || 28 ||
[Analyze grammar]

aṅgado bahubhiśchinnaḥ śarairāsādya rākṣasaiḥ |
pātito rudhirodgārī kṣitau nipatito'ṅgadaḥ || 29 ||
[Analyze grammar]

harayo mathitā nāgai rathajālaistathāpare |
śāyitā mṛditāstatra vāyuvegairivāmbudāḥ || 30 ||
[Analyze grammar]

pradrutāśca pare trastā hanyamānā jaghanyataḥ |
abhidrutāstu rakṣobhiḥ siṃhairiva mahādvipāḥ || 31 ||
[Analyze grammar]

sāgare patitāḥ ke cit ke cidgaganamāśritāḥ |
ṛkṣā vṛkṣānupārūḍhā vānaraistu vimiśritāḥ || 32 ||
[Analyze grammar]

sāgarasya ca tīreṣu śaileṣu ca vaneṣu ca |
piṅgākṣāste virūpākṣairbahubhirbahavo hatāḥ || 33 ||
[Analyze grammar]

evaṃ tava hato bhartā sasainyo mama senayā |
kṣatajārdraṃ rajodhvastamidaṃ cāsyāhṛtaṃ śiraḥ || 34 ||
[Analyze grammar]

tataḥ paramadurdharṣo rāvaṇo rākṣaseśvaraḥ |
sītāyāmupaśṛṇvantyāṃ rākṣasīmidamabravīt || 35 ||
[Analyze grammar]

rākṣasaṃ krūrakarmāṇaṃ vidyujjihvaṃ tvamānaya |
yena tad rāghavaśiraḥ saṃgrāmāt svayamāhṛtam || 36 ||
[Analyze grammar]

vidyujjihvastato gṛhya śirastat saśarāsanam |
praṇāmaṃ śirasā kṛtvā rāvaṇasyāgrataḥ sthitaḥ || 37 ||
[Analyze grammar]

tamabravīttato rājā rāvaṇo rākṣasaṃ sthitam |
vidyujjihvaṃ mahājihvaṃ samīpaparivartinam || 38 ||
[Analyze grammar]

agrataḥ kuru sītāyāḥ śīghraṃ dāśaratheḥ śiraḥ |
avasthāṃ paścimāṃ bhartuḥ kṛpaṇā sādhu paśyatu || 39 ||
[Analyze grammar]

evamuktaṃ tu tad rakṣaḥ śirastat priyadarśanam |
upanikṣipya sītāyāḥ kṣipramantaradhīyata || 40 ||
[Analyze grammar]

rāvaṇaścāpi cikṣepa bhāsvaraṃ kārmukaṃ mahat |
triṣu lokeṣu vikhyātaṃ sītāmidamuvāca ha || 41 ||
[Analyze grammar]

idaṃ tattava rāmasya kārmukaṃ jyāsamanvitam |
iha prahastenānītaṃ hatvā taṃ niśi mānuṣam || 42 ||
[Analyze grammar]

sa vidyujjihvena sahaiva tacchiro dhanuśca bhūmau vinikīrya rāvaṇaḥ |
videharājasya sutāṃ yaśasvinīṃ tato'bravīttāṃ bhava me vaśānugā || 43 ||
[Analyze grammar]