Chapter 21

tatastamakṣobhya balaṃ laṅkādhipataye carāḥ |
suvele rāghavaṃ śaile niviṣṭaṃ pratyavedayan || 1 ||
[Analyze grammar]

cārāṇāṃ rāvaṇaḥ śrutvā prāptaṃ rāmaṃ mahābalam |
jātodvego'bhavat kiṃ cicchārdūlaṃ vākyamabravīt || 2 ||
[Analyze grammar]

ayathāvacca te varṇo dīnaścāsi niśācara |
nāsi kaccidamitrāṇāṃ kruddhānāṃ vaśamāgataḥ || 3 ||
[Analyze grammar]

iti tenānuśiṣṭastu vācaṃ mandamudīrayat |
tadā rākṣasaśārdūlaṃ śārdūlo bhayavihvalaḥ || 4 ||
[Analyze grammar]

na te cārayituṃ śakyā rājan vānarapuṃgavāḥ |
vikrāntā balavantaśca rāghaveṇa ca rakṣitāḥ || 5 ||
[Analyze grammar]

nāpi saṃbhāṣituṃ śakyāḥ saṃpraśno'tra na labhyate |
sarvato rakṣyate panthā vānaraiḥ parvatopamaiḥ || 6 ||
[Analyze grammar]

praviṣṭamātre jñāto'haṃ bale tasminnacārite |
balādgṛhīto bahubhirbahudhāsmi vidāritaḥ || 7 ||
[Analyze grammar]

jānubhirmuṣṭibhirdantaistalaiścābhihato bhṛśam |
pariṇīto'smi haribhirbalavadbhiramarṣaṇaiḥ || 8 ||
[Analyze grammar]

pariṇīya ca sarvatra nīto'haṃ rāmasaṃsadam |
rudhirādigdhasarvāṅgo vihvalaścalitendriyaḥ || 9 ||
[Analyze grammar]

haribhirvadhyamānaśca yācamānaḥ kṛtāñjaliḥ |
rāghaveṇa paritrāto jīvāmi ha yadṛcchayā || 10 ||
[Analyze grammar]

eṣa śailaiḥ śilābhiśca pūrayitvā mahārṇavam |
dvāramāśritya laṅkāyā rāmastiṣṭhati sāyudhaḥ || 11 ||
[Analyze grammar]

garuḍavyūhamāsthāya sarvato haribhirvṛtaḥ |
māṃ visṛjya mahātejā laṅkāmevābhivartate || 12 ||
[Analyze grammar]

purā prākāramāyāti kṣipramekataraṃ kuru |
sītāṃ cāsmai prayacchāśu suyuddhaṃ vā pradīyatām || 13 ||
[Analyze grammar]

manasā saṃtatāpātha tacchrutvā rākṣasādhipaḥ |
śārdūlasya mahadvākyamathovāca sa rāvaṇaḥ || 14 ||
[Analyze grammar]

yadi māṃ pratiyudhyerandevagandharvadānavāḥ |
naiva sītāṃ pradāsyāmi sarvalokabhayādapi || 15 ||
[Analyze grammar]

evamuktvā mahātejā rāvaṇaḥ punarabravīt |
cāritā bhavatā senā ke'tra śūrāḥ plavaṃgamāḥ || 16 ||
[Analyze grammar]

kīdṛśāḥ kiṃprabhāvāśca vānarā ye durāsadāḥ |
kasya putrāśca pautrāśca tattvamākhyāhi rākṣasa || 17 ||
[Analyze grammar]

tatratra pratipatsyāmi jñātvā teṣāṃ balābalam |
avaśyaṃ balasaṃkhyānaṃ kartavyaṃ yuddhamicchatā || 18 ||
[Analyze grammar]

athaivamuktaḥ śārdūlo rāvaṇenottamaścaraḥ |
idaṃ vacanamārebhe vaktuṃ rāvaṇasaṃnidhau || 19 ||
[Analyze grammar]

atharkṣarajasaḥ putro yudhi rājan sudurjayaḥ |
gadgadasyātha putro'tra jāmbavāniti viśrutaḥ || 20 ||
[Analyze grammar]

gadgadasyaiva putro'nyo guruputraḥ śatakratoḥ |
kadanaṃ yasya putreṇa kṛtamekena rakṣasām || 21 ||
[Analyze grammar]

suṣeṇaścāpi dharmātmā putro dharmasya vīryavān |
saumyaḥ somātmajaścātra rājandadhimukhaḥ kapiḥ || 22 ||
[Analyze grammar]

sumukho durmukhaścātra vegadarśī ca vānaraḥ |
mṛtyurvānararūpeṇa nūnaṃ sṛṣṭaḥ svayambhuvā || 23 ||
[Analyze grammar]

putro hutavahasyātha nīlaḥ senāpatiḥ svayam |
anilasya ca putro'tra hanūmāniti viśrutaḥ || 24 ||
[Analyze grammar]

naptā śakrasya durdharṣo balavānaṅgado yuvā |
maindaśca dvividaścobhau balināvaśvisaṃbhavau || 25 ||
[Analyze grammar]

putrā vaivasvatasyātra pañcakālāntakopamāḥ |
gajo gavākṣo gavayaḥ śarabho gandhamādanaḥ || 26 ||
[Analyze grammar]

śveto jyotirmukhaścātra bhāskarasyātmasaṃbhavau |
varuṇasya ca putro'tha hemakūṭaḥ plavaṃgamaḥ || 27 ||
[Analyze grammar]

viśvakarmasuto vīro nalaḥ plavagasattamaḥ |
vikrānto vegavānatra vasuputraḥ sudurdharaḥ || 28 ||
[Analyze grammar]

daśavānarakoṭyaśca śūrāṇāṃ yuddhakāṅkṣiṇām |
śrīmatāṃ devaputrāṇāṃ śeṣānnākhyātumutsahe || 29 ||
[Analyze grammar]

putro daśarathasyaiṣa siṃhasaṃhanano yuvā |
dūṣaṇo nihato yena kharaśca triśirāstathā || 30 ||
[Analyze grammar]

nāsti rāmasya sadṛśo vikrame bhuvi kaścana |
virādho nihato yena kabandhaścāntakopamaḥ || 31 ||
[Analyze grammar]

vaktuṃ na śakto rāmasya naraḥ kaścidguṇān kṣitau |
janasthānagatā yena tāvanto rākṣasā hatāḥ || 32 ||
[Analyze grammar]

lakṣmaṇaścātra dharmātmā mātaṃgānāmivarṣabhaḥ |
yasya bāṇapathaṃ prāpya na jīvedapi vāsavaḥ || 33 ||
[Analyze grammar]

rākṣasānāṃ variṣṭhaśca tava bhrātā vibhīṣaṇaḥ |
parigṛhya purīṃ laṅkāṃ rāghavasya hite rataḥ || 34 ||
[Analyze grammar]

iti sarvaṃ samākhyātaṃ tavedaṃ vānaraṃ balam |
suvele'dhiṣṭhitaṃ śaile śeṣakārye bhavān gatiḥ || 35 ||
[Analyze grammar]