Chapter 20

śukena tu samākhyātāṃstāndṛṣṭvā hariyūthapān |
samīpasthaṃ ca rāmasya bhrātaraṃ svaṃ vibhīṣaṇam || 1 ||
[Analyze grammar]

lakṣmaṇaṃ ca mahāvīryaṃ bhujaṃ rāmasya dakṣiṇam |
sarvavānararājaṃ ca sugrīvaṃ bhīmavikramam || 2 ||
[Analyze grammar]

kiṃ cidāvignahṛdayo jātakrodhaśca rāvaṇaḥ |
bhartsayāmāsa tau vīrau kathānte śukasāraṇau || 3 ||
[Analyze grammar]

adhomukhau tau praṇatāvabravīcchukasāraṇau |
roṣagadgadayā vācā saṃrabdhaḥ paruṣaṃ vacaḥ || 4 ||
[Analyze grammar]

na tāvat sadṛśaṃ nāma sacivairupajīvibhiḥ |
vipriyaṃ nṛpatervaktuṃ nigrahapragrahe vibhoḥ || 5 ||
[Analyze grammar]

ripūṇāṃ pratikūlānāṃ yuddhārthamabhivartatām |
ubhābhyāṃ sadṛśaṃ nāma vaktumaprastave stavam || 6 ||
[Analyze grammar]

ācāryā guravo vṛddhā vṛthā vāṃ paryupāsitāḥ |
sāraṃ yad rājaśāstrāṇāmanujīvyaṃ na gṛhyate || 7 ||
[Analyze grammar]

gṛhīto vā na vijñāto bhāro jñānasya vochyate |
īdṛśaiḥ sacivairyukto mūrkhairdiṣṭyā dharāmyaham || 8 ||
[Analyze grammar]

kiṃ nu mṛtyorbhayaṃ nāsti māṃ vaktuṃ paruṣaṃ vacaḥ |
yasya me śāsato jihvā prayacchati śubhāśubham || 9 ||
[Analyze grammar]

apyeva dahanaṃ spṛṣṭvā vane tiṣṭhanti pādapāḥ |
rājadoṣaparāmṛṣṭāstiṣṭhante nāparādhinaḥ || 10 ||
[Analyze grammar]

hanyāmahamimau pāpau śatrupakṣapraśaṃsakau |
yadi pūrvopakārairme na krodho mṛdutāṃ vrajet || 11 ||
[Analyze grammar]

apadhvaṃsata gacchadhvaṃ saṃnikarṣādito mama |
na hi vāṃ hantumicchāmi smarannupakṛtāni vām |
hatāveva kṛtaghnau tau mayi snehaparāṅmukhau || 12 ||
[Analyze grammar]

evamuktau tu savrīḍau tāv ubhau śukasāraṇau |
rāvaṇaṃ jayaśabdena pratinandyābhiniḥsṛtau || 13 ||
[Analyze grammar]

abravīt sa daśagrīvaḥ samīpasthaṃ mahodaram |
upasthāpaya śīghraṃ me cārānnītiviśāradān || 14 ||
[Analyze grammar]

tataścarāḥ saṃtvaritāḥ prāptāḥ pārthivaśāsanāt |
upasthitāḥ prāñjalayo vardhayitvā jayāśiṣā || 15 ||
[Analyze grammar]

tānabravīttato vākyaṃ rāvaṇo rākṣasādhipaḥ |
cārānpratyayikāñ śūrānbhaktān vigatasādhvasān || 16 ||
[Analyze grammar]

ito gacchata rāmasya vyavasāyaṃ parīkṣatha |
mantreṣvabhyantarā ye'sya prītyā tena samāgatāḥ || 17 ||
[Analyze grammar]

kathaṃ svapiti jāgarti kimanyacca kariṣyati |
vijñāya nipuṇaṃ sarvamāgantavyamaśeṣataḥ || 18 ||
[Analyze grammar]

cāreṇa viditaḥ śatruḥ paṇḍitairvasudhādhipaiḥ |
yuddhe svalpena yatnena samāsādya nirasyate || 19 ||
[Analyze grammar]

cārāstu te tathetyuktvā prahṛṣṭā rākṣaseśvaram |
kṛtvā pradakṣiṇaṃ jagmuryatra rāmaḥ salakṣmaṇaḥ || 20 ||
[Analyze grammar]

te suvelasya śailasya samīpe rāmalakṣmaṇau |
pracchannā dadṛśurgatvā sasugrīvavibhīṣaṇau || 21 ||
[Analyze grammar]

te tu dharmātmanā dṛṣṭā rākṣasendreṇa rākṣasāḥ |
vibhīṣaṇena tatrasthā nigṛhītā yadṛcchayā || 22 ||
[Analyze grammar]

vānarairarditāste tu vikrāntairlaghuvikramaiḥ |
punarlaṅkāmanuprāptāḥ śvasanto naṣṭacetasaḥ || 23 ||
[Analyze grammar]

tato daśagrīvamupasthitāste cārā bahirnityacarā niśācarāḥ |
gireḥ suvelasya samīpavāsinaṃ nyavedayanbhīmabalaṃ mahābalāḥ || 24 ||
[Analyze grammar]