Chapter 19

sāraṇasya vacaḥ śrutvā rāvaṇaṃ rākṣasādhipam |
balamālokayan sarvaṃ śuko vākyamathābravīt || 1 ||
[Analyze grammar]

sthitānpaśyasi yānetānmattāniva mahādvipān |
nyagrodhāniva gāṅgeyān sālān haimavatīniva || 2 ||
[Analyze grammar]

ete duṣprasahā rājanbalinaḥ kāmarūpiṇaḥ |
daityadānavasaṃkāśā yuddhe devaparākramāḥ || 3 ||
[Analyze grammar]

eṣāṃ koṭisahasrāṇi nava pañcaca sapta ca |
tathā śaṅkhasahasrāṇi tathā vṛndaśatāni ca || 4 ||
[Analyze grammar]

ete sugrīvasacivāḥ kiṣkindhānilayāḥ sadā |
harayo devagandharvairutpannāḥ kāmarūpiṇaḥ || 5 ||
[Analyze grammar]

yau tau paśyasi tiṣṭhantau kumārau devarūpiṇau |
maindaśca dvividaścobhau tābhyāṃ nāsti samo yudhi || 6 ||
[Analyze grammar]

brahmaṇā samanujñātāvamṛtaprāśināv ubhau |
āśaṃsete yudhā laṅkāmetau marditumojasā || 7 ||
[Analyze grammar]

yāvetāvetayoḥ pārśve sthitau parvatasaṃnibhau |
sumukho vimukhaścaiva mṛtyuputrau pituḥ samau || 8 ||
[Analyze grammar]

yaṃ tu paśyasi tiṣṭhantaṃ prabhinnamiva kuñjaram |
yo balāt kṣobhayet kruddhaḥ samudramapi vānaraḥ || 9 ||
[Analyze grammar]

eṣo'bhigantā laṅkāyā vaidehyāstava ca prabho |
enaṃ paśya purā dṛṣṭaṃ vānaraṃ punarāgatam || 10 ||
[Analyze grammar]

jyeṣṭhaḥ kesariṇaḥ putro vātātmaja iti śrutaḥ |
hanūmāniti vikhyāto laṅghito yena sāgaraḥ || 11 ||
[Analyze grammar]

kāmarūpī hariśreṣṭho balarūpasamanvitaḥ |
anivāryagatiścaiva yathā satatagaḥ prabhuḥ || 12 ||
[Analyze grammar]

udyantaṃ bhāskaraṃ dṛṣṭvā bālaḥ kila pipāsitaḥ |
triyojanasahasraṃ tu adhvānamavatīrya hi || 13 ||
[Analyze grammar]

ādityamāhariṣyāmi na me kṣut pratiyāsyati |
iti saṃcintya manasā puraiṣa baladarpitaḥ || 14 ||
[Analyze grammar]

anādhṛṣyatamaṃ devamapi devarṣidānavaiḥ |
anāsādyaiva patito bhāskarodayane girau || 15 ||
[Analyze grammar]

patitasya kaperasya hanurekā śilātale |
kiṃ cidbhinnā dṛḍhahanorhanūmāneṣa tena vai || 16 ||
[Analyze grammar]

satyamāgamayogena mamaiṣa vidito hariḥ |
nāsya śakyaṃ balaṃ rūpaṃ prabhāvo vānubhāṣitum || 17 ||
[Analyze grammar]

eṣa āśaṃsate laṅkāmeko marditumojasā |
yaścaiṣo'nantaraḥ śūraḥ śyāmaḥ padmanibhekṣaṇaḥ || 18 ||
[Analyze grammar]

ikṣvākūṇāmatiratho loke vikhyāta pauruṣaḥ |
yasminna calate dharmo yo dharmaṃ nātivartate || 19 ||
[Analyze grammar]

yo brāhmamastraṃ vedāṃśca veda vedavidāṃ varaḥ |
yo bhindyādgaganaṃ bāṇaiḥ parvatāṃścāpi dārayet || 20 ||
[Analyze grammar]

yasya mṛtyoriva krodhaḥ śakrasyeva parākramaḥ |
sa eṣa rāmastvāṃ yoddhuṃ rājan samabhivartate || 21 ||
[Analyze grammar]

yaścaiṣa dakṣiṇe pārśve śuddhajāmbūnadaprabhaḥ |
viśālavakṣāstāmrākṣo nīlakuñcitamūrdhajaḥ || 22 ||
[Analyze grammar]

eṣo'sya lakṣmaṇo nāma bhrātā prāṇasamaḥ priyaḥ |
naye yuddhe ca kuśalaḥ sarvaśāstraviśāradaḥ || 23 ||
[Analyze grammar]

amarṣī durjayo jetā vikrānto buddhimānbalī |
rāmasya dakṣiṇo bāhurnityaṃ prāṇo bahiścaraḥ || 24 ||
[Analyze grammar]

na hyeṣa rāghavasyārthe jīvitaṃ parirakṣati |
eṣaivāśaṃsate yuddhe nihantuṃ sarvarākṣasān || 25 ||
[Analyze grammar]

yastu savyamasau pakṣaṃ rāmasyāśritya tiṣṭhati |
rakṣogaṇaparikṣipto rājā hyeṣa vibhīṣaṇaḥ || 26 ||
[Analyze grammar]

śrīmatā rājarājena laṅkāyāmabhiṣecitaḥ |
tvāmeva pratisaṃrabdho yuddhāyaiṣo'bhivartate || 27 ||
[Analyze grammar]

yaṃ tu paśyasi tiṣṭhantaṃ madhye girimivācalam |
sarvaśākhāmṛgendrāṇāṃ bhartāramaparājitam || 28 ||
[Analyze grammar]

tejasā yaśasā buddhyā jñānenābhijanena ca |
yaḥ kapīnati babhrāja himavāniva parvatān || 29 ||
[Analyze grammar]

kiṣkindhāṃ yaḥ samadhyāste guhāṃ sagahanadrumām |
durgāṃ parvatadurgasthāṃ pradhānaiḥ saha yūthapaiḥ || 30 ||
[Analyze grammar]

yasyaiṣā kāñcanī mālā śobhate śatapuṣkarā |
kāntā devamanuṣyāṇāṃ yasyāṃ lakṣmīḥ pratiṣṭhitā || 31 ||
[Analyze grammar]

etāṃ ca mālāṃ tārāṃ ca kapirājyaṃ ca śāśvatam |
sugrīvo vālinaṃ hatvā rāmeṇa pratipāditaḥ || 32 ||
[Analyze grammar]

evaṃ koṭisahasreṇa śaṅkūnāṃ ca śatena ca |
sugrīvo vānarendrastvāṃ yuddhārthamabhivartate || 33 ||
[Analyze grammar]

imāṃ mahārājasamīkṣya vāhinīmupasthitāṃ prajvalitagrahopamām |
tataḥ prayatnaḥ paramo vidhīyatāṃ yathā jayaḥ syānna paraiḥ parājayaḥ || 34 ||
[Analyze grammar]