Chapter 18

tāṃstu te'haṃ pravakṣyāmi prekṣamāṇasya yūthapān |
rāghavārthe parākrāntā ye na rakṣanti jīvitam || 1 ||
[Analyze grammar]

snigdhā yasya bahuśyāmā bālā lāṅgūlamāśritāḥ |
tāmrāḥ pītāḥ sitāḥ śvetāḥ prakīrṇā ghorakarmaṇaḥ || 2 ||
[Analyze grammar]

pragṛhītāḥ prakāśante sūryasyeva marīcayaḥ |
pṛthivyāṃ cānukṛṣyante haro nāmaiṣa yūthapaḥ || 3 ||
[Analyze grammar]

yaṃ pṛṣṭhato'nugacchanti śataśo'tha sahasraśaḥ |
drumānudyamya sahitā laṅkārohaṇatatparāḥ || 4 ||
[Analyze grammar]

eṣa koṭīsahasreṇa vānarāṇāṃ mahaujasām |
ākāṅkṣate tvāṃ saṃgrāme jetuṃ parapuraṃjaya || 5 ||
[Analyze grammar]

nīlāniva mahāmeghāṃstiṣṭhato yāṃstu paśyasi |
asitāñjanasaṃkāśānyuddhe satyaparākramān || 6 ||
[Analyze grammar]

nakhadaṃṣṭrāyudhān vīrāṃstīkṣṇakopānbhayāvahān |
asaṃkhyeyānanirdeśyānparaṃ pāramivodadheḥ || 7 ||
[Analyze grammar]

parvateṣu ca ye ke cidviṣameṣu nadīṣu ca |
ete tvāmabhivartante rājannṛṣkāḥ sudāruṇāḥ || 8 ||
[Analyze grammar]

eṣāṃ madhye sthito rājanbhīmākṣo bhīmadarśanaḥ |
parjanya iva jīmūtaiḥ samantāt parivāritaḥ || 9 ||
[Analyze grammar]

ṛkṣavantaṃ giriśreṣṭhamadhyāste narmadāṃ piban |
sarvarkṣāṇāmadhipatirdhūmro nāmaiṣa yūthapaḥ || 10 ||
[Analyze grammar]

yavīyānasya tu bhrātā paśyainaṃ parvatopamam |
bhrātrā samāno rūpeṇa viśiṣṭastu parākrame || 11 ||
[Analyze grammar]

sa eṣa jāmbavānnāma mahāyūthapayūthapaḥ |
praśānto guruvartī ca saṃprahāreṣvamarṣaṇaḥ || 12 ||
[Analyze grammar]

etena sāhyaṃ sumahat kṛtaṃ śakrasya dhīmatā |
devāsure jāmbavatā labdhāśca bahavo varāḥ || 13 ||
[Analyze grammar]

āruhya parvatāgrebhyo mahābhravipulāḥ śilāḥ |
muñcanti vipulākārā na mṛtyorudvijanti ca || 14 ||
[Analyze grammar]

rākṣasānāṃ ca sadṛśāḥ piśācānāṃ ca romaśāḥ |
etasya sainye bahavo vicarantyagnitejasaḥ || 15 ||
[Analyze grammar]

yaṃ tvenamabhisaṃrabdhaṃ plavamānamiva sthitam |
prekṣante vānarāḥ sarve sthitaṃ yūthapayūthapam || 16 ||
[Analyze grammar]

eṣa rājan sahasrākṣaṃ paryupāste harīśvaraḥ |
balena balasaṃpanno rambho nāmaiṣa yūthapaḥ || 17 ||
[Analyze grammar]

yaḥ sthitaṃ yojane śailaṃ gacchanpārśvena sevate |
ūrdhvaṃ tathaiva kāyena gataḥ prāpnoti yojanam || 18 ||
[Analyze grammar]

yasmānna paramaṃ rūpaṃ catuṣpādeṣu vidyate |
śrutaḥ saṃnādano nāma vānarāṇāṃ pitāmahaḥ || 19 ||
[Analyze grammar]

yena yuddhaṃ tadā dattaṃ raṇe śakrasya dhīmatā |
parājayaśca na prāptaḥ so'yaṃ yūthapayūthapaḥ |
yasya vikramamāṇasya śakrasyeva parākramaḥ || 20 ||
[Analyze grammar]

eṣa gandharvakanyāyāmutpannaḥ kṛṣṇavartmanā |
purā devāsure yuddhe sāhyārthaṃ tridivaukasām || 21 ||
[Analyze grammar]

yasya vaiśravaṇo rājā jambūmupaniṣevate |
yo rājā parvatendrāṇāṃ bahukiṃnarasevinām || 22 ||
[Analyze grammar]

vihārasukhado nityaṃ bhrātuste rākṣasādhipa |
tatraiṣa vasati śrīmānbalavān vānararṣabhaḥ |
yuddheṣvakatthano nityaṃ krathano nāma yūthapaḥ || 23 ||
[Analyze grammar]

vṛtaḥ koṭisahasreṇa harīṇāṃ samupasthitaḥ |
eṣaivāśaṃsate laṅkāṃ svenānīkena marditum || 24 ||
[Analyze grammar]

yo gaṅgāmanu paryeti trāsayan hastiyūthapān |
hastināṃ vānarāṇāṃ ca pūrvavairamanusmaran || 25 ||
[Analyze grammar]

eṣa yūthapatirnetā gacchan giriguhāśayaḥ |
harīṇāṃ vāhinī mukhyo nadīṃ haimavatīmanu || 26 ||
[Analyze grammar]

uśīra bījamāśritya parvataṃ mandaropamam |
ramate vānaraśreṣṭho divi śakra iva svayam || 27 ||
[Analyze grammar]

enaṃ śatasahasrāṇāṃ sahasramabhivartate |
eṣa durmarṣaṇo rājanpramāthī nāma yūthapaḥ || 28 ||
[Analyze grammar]

vātenevoddhataṃ meghaṃ yamenamanupaśyasi |
vivartamānaṃ bahuśo yatraitadbahulaṃ rajaḥ || 29 ||
[Analyze grammar]

ete'sitamukhā ghorā golāṅgūlā mahābalāḥ |
śataṃ śatasahasrāṇi dṛṣṭvā vai setubandhanam || 30 ||
[Analyze grammar]

golāṅgūlaṃ mahāvegaṃ gavākṣaṃ nāma yūthapam |
parivāryābhivartante laṅkāṃ marditumojasā || 31 ||
[Analyze grammar]

bhramarācaritā yatra sarvakāmaphaladrumāḥ |
yaṃ sūryatulyavarṇābhamanuparyeti parvatam || 32 ||
[Analyze grammar]

yasya bhāsā sadā bhānti tadvarṇā mṛgapakṣiṇaḥ |
yasya prasthaṃ mahātmāno na tyajanti maharṣayaḥ || 33 ||
[Analyze grammar]

tatraiṣa ramate rājan ramye kāñcanaparvate |
mukhyo vānaramukhyānāṃ kesarī nāma yūthapaḥ || 34 ||
[Analyze grammar]

ṣaṣṭirgirisahasrāṇāṃ ramyāḥ kāñcanaparvatāḥ |
teṣāṃ madhye girivarastvamivānagha rakṣasām || 35 ||
[Analyze grammar]

tatraite kapilāḥ śvetāstāmrāsyā madhupiṅgalāḥ |
nivasantyuttamagirau tīkṣṇadaṃṣṭrānakhāyudhāḥ || 36 ||
[Analyze grammar]

siṃha iva caturdaṃṣṭrā vyāghrā iva durāsadāḥ |
sarve vaiśvanarasamā jvalitāśīviṣopamāḥ || 37 ||
[Analyze grammar]

sudīrghāñcitalāṅgūlā mattamātaṃgasaṃnibhāḥ |
mahāparvatasaṃkāśā mahājīmūtanisvanāḥ || 38 ||
[Analyze grammar]

eṣa caiṣāmadhipatirmadhye tiṣṭhati vīryavān |
nāmnā pṛthivyāṃ vikhyāto rājañ śatabalīti yaḥ |
eṣaivāśaṃsate laṅkāṃ svenānīkena marditum || 39 ||
[Analyze grammar]

gajo gavākṣo gavayo nalo nīlaśca vānaraḥ |
ekaika eva yūthānāṃ koṭibhirdaśabhirvṛtaḥ || 40 ||
[Analyze grammar]

tathānye vānaraśreṣṭhā vindhyaparvatavāsinaḥ |
na śakyante bahutvāttu saṃkhyātuṃ laghuvikramāḥ || 41 ||
[Analyze grammar]

sarve mahārāja mahāprabhāvāḥ sarve mahāśailanikāśakāyāḥ |
sarve samarthāḥ pṛthivīṃ kṣaṇena kartuṃ pravidhvastavikīrṇaśailām || 42 ||
[Analyze grammar]