Chapter 16

sabale sāgaraṃ tīrṇe rāme daśarathātmaje |
amātyau rāvaṇaḥ śrīmānabravīcchukasāraṇau || 1 ||
[Analyze grammar]

samagraṃ sāgaraṃ tīrṇaṃ dustaraṃ vānaraṃ balam |
abhūtapūrvaṃ rāmeṇa sāgare setubandhanam || 2 ||
[Analyze grammar]

sāgare setubandhaṃ tu na śraddadhyāṃ kathaṃ cana |
avaśyaṃ cāpi saṃkhyeyaṃ tanmayā vānaraṃ balam || 3 ||
[Analyze grammar]

bhavantau vānaraṃ sainyaṃ praviśyānupalakṣitau |
parimāṇaṃ ca vīryaṃ ca ye ca mukhyāḥ plavaṃgamāḥ || 4 ||
[Analyze grammar]

mantriṇo ye ca rāmasya sugrīvasya ca saṃmatāḥ |
ye pūrvamabhivartante ye ca śūrāḥ plavaṃgamāḥ || 5 ||
[Analyze grammar]

sa ca seturyathā baddhaḥ sāgare salilārṇave |
niveśaśca yathā teṣāṃ vānarāṇāṃ mahātmanām || 6 ||
[Analyze grammar]

rāmasya vyavasāyaṃ ca vīryaṃ praharaṇāni ca |
lakṣmaṇasya ca vīrasya tattvato jñātumarhatha || 7 ||
[Analyze grammar]

kaśca senāpatisteṣāṃ vānarāṇāṃ mahaujasām |
etajjñātvā yathātattvaṃ śīghramagantumarhathaḥ || 8 ||
[Analyze grammar]

iti pratisamādiṣṭau rākṣasau śukasāraṇau |
harirūpadharau vīrau praviṣṭau vānaraṃ balam || 9 ||
[Analyze grammar]

tatastadvānaraṃ sainyamacintyaṃ lomaharṣaṇam |
saṃkhyātuṃ nādhyagacchetāṃ tadā tau śukasāraṇau || 10 ||
[Analyze grammar]

tat sthitaṃ parvatāgreṣu nirdareṣu guhāsu ca |
samudrasya ca tīreṣu vaneṣūpavaneṣu ca || 11 ||
[Analyze grammar]

taramāṇaṃ ca tīrṇaṃ ca tartukāmaṃ ca sarvaśaḥ |
niviṣṭaṃ niviśaccaiva bhīmanādaṃ mahābalam || 12 ||
[Analyze grammar]

tau dadarśa mahātejāḥ pracchannau ca vibhīṣaṇaḥ |
ācacakṣe'tha rāmāya gṛhītvā śukasāraṇau |
laṅkāyāḥ samanuprāptau cārau parapuraṃjayau || 13 ||
[Analyze grammar]

tau dṛṣṭvā vyathitau rāmaṃ nirāśau jīvite tadā |
kṛtāñjalipuṭau bhītau vacanaṃ cedamūcatuḥ || 14 ||
[Analyze grammar]

āvāmihāgatau saumya rāvaṇaprahitāv ubhau |
parijñātuṃ balaṃ kṛtsnaṃ tavedaṃ raghunandana || 15 ||
[Analyze grammar]

tayostadvacanaṃ śrutvā rāmo daśarathātmajaḥ |
abravīt prahasan vākyaṃ sarvabhūtahite rataḥ || 16 ||
[Analyze grammar]

yadi dṛṣṭaṃ balaṃ kṛtsnaṃ vayaṃ vā susamīkṣitāḥ |
yathoktaṃ vā kṛtaṃ kāryaṃ chandataḥ pratigamyatām || 17 ||
[Analyze grammar]

praviśya nagarīṃ laṅkāṃ bhavadbhyāṃ dhanadānujaḥ |
vaktavyo rakṣasāṃ rājā yathoktaṃ vacanaṃ mama || 18 ||
[Analyze grammar]

yadbalaṃ ca samāśritya sītāṃ me hṛtavānasi |
taddarśaya yathākāmaṃ sasainyaḥ sahabāndhavaḥ || 19 ||
[Analyze grammar]

śvaḥkāle nagarīṃ laṅkāṃ saprākārāṃ satoraṇām |
rākṣasaṃ ca balaṃ paśya śarairvidhvaṃsitaṃ mayā || 20 ||
[Analyze grammar]

ghoraṃ roṣamahaṃ mokṣye balaṃ dhāraya rāvaṇa |
śvaḥkāle vajravān vajraṃ dānaveṣviva vāsavaḥ || 21 ||
[Analyze grammar]

iti pratisamādiṣṭau rākṣasau śukasāraṇau |
āgamya nagarīṃ laṅkāmabrūtāṃ rākṣasādhipam || 22 ||
[Analyze grammar]

vibhīṣaṇagṛhītau tu vadhārhau rākṣaseśvara |
dṛṣṭvā dharmātmanā muktau rāmeṇāmitatejasā || 23 ||
[Analyze grammar]

ekasthānagatā yatra catvāraḥ puruṣarṣabhāḥ |
lokapālopamāḥ śūrāḥ kṛtāstrā dṛḍhavikramāḥ || 24 ||
[Analyze grammar]

rāmo dāśarathiḥ śrīmāṃl lakṣmaṇaśca vibhīṣaṇaḥ |
sugrīvaśca mahātejā mahendrasamavikramaḥ || 25 ||
[Analyze grammar]

ete śaktāḥ purīṃ laṅkāṃ saprākārāṃ satoraṇām |
utpāṭya saṃkrāmayituṃ sarve tiṣṭhantu vānarāḥ || 26 ||
[Analyze grammar]

yādṛśaṃ tasya rāmasya rūpaṃ praharaṇāni ca |
vadhiṣyati purīṃ laṅkāmekastiṣṭhantu te trayaḥ || 27 ||
[Analyze grammar]

rāmalakṣmaṇaguptā sā sugrīveṇa ca vāhinī |
babhūva durdharṣatarā sarvairapi surāsuraiḥ || 28 ||
[Analyze grammar]

prahṛṣṭarūpā dhvajinī vanaukasāṃ mahātmanāṃ saṃprati yoddhumicchatām |
alaṃ virodhena śamo vidhīyatāṃ pradīyatāṃ dāśarathāya maithilī || 29 ||
[Analyze grammar]