Chapter 15

tato madhyāt samudrasya sāgaraḥ svayamutthitaḥ |
udayan hi mahāśailānmeroriva divākaraḥ |
pannagaiḥ saha dīptāsyaiḥ samudraḥ pratyadṛśyata || 1 ||
[Analyze grammar]

snigdhavaidūryasaṃkāśo jāmbūnadavibhūṣitaḥ |
raktamālyāmbaradharaḥ padmapatranibhekṣaṇaḥ || 2 ||
[Analyze grammar]

sāgaraḥ samatikramya pūrvamāmantrya vīryavān |
abravīt prāñjalirvākyaṃ rāghavaṃ śarapāṇinam || 3 ||
[Analyze grammar]

pṛthivī vāyurākāśamāpo jyotiśca rāghavaḥ |
svabhāve saumya tiṣṭhanti śāśvataṃ mārgamāśritāḥ || 4 ||
[Analyze grammar]

tat svabhāvo mamāpyeṣa yadagādho'hamaplavaḥ |
vikārastu bhaved rādha etatte pravadāmyaham || 5 ||
[Analyze grammar]

na kāmānna ca lobhādvā na bhayāt pārthivātmaja |
grāhanakrākulajalaṃ stambhayeyaṃ kathaṃ cana || 6 ||
[Analyze grammar]

vidhāsye rāma yenāpi viṣahiṣye hyahaṃ tathā |
grāhā na prahariṣyanti yāvat senā tariṣyati || 7 ||
[Analyze grammar]

ayaṃ saumya nalo nāma tanujo viśvakarmaṇaḥ |
pitrā dattavaraḥ śrīmānpratimo viśvakarmaṇaḥ || 8 ||
[Analyze grammar]

eṣa setuṃ mahotsāhaḥ karotu mayi vānaraḥ |
tamahaṃ dhārayiṣyāmi tathā hyeṣa yathā pitā || 9 ||
[Analyze grammar]

evamuktvodadhirnaṣṭaḥ samutthāya nalastataḥ |
abravīdvānaraśreṣṭho vākyaṃ rāmaṃ mahābalaḥ || 10 ||
[Analyze grammar]

ahaṃ setuṃ kariṣyāmi vistīrṇe varuṇālaye |
pituḥ sāmarthyamāsthāya tattvamāha mahodadhiḥ || 11 ||
[Analyze grammar]

mama māturvaro datto mandare viśvakarmaṇā |
aurasastasya putro'haṃ sadṛśo viśvakarmaṇā || 12 ||
[Analyze grammar]

na cāpyahamanukto vai prabrūyāmātmano guṇān |
kāmamadyaiva badhnantu setuṃ vānarapuṃgavāḥ || 13 ||
[Analyze grammar]

tato nisṛṣṭarāmeṇa sarvato hariyūthapāḥ |
abhipeturmahāraṇyaṃ hṛṣṭāḥ śatasahasraśaḥ || 14 ||
[Analyze grammar]

te nagānnagasaṃkāśāḥ śākhāmṛgagaṇarṣabhāḥ |
babhañjurvānarāstatra pracakarṣuśca sāgaram || 15 ||
[Analyze grammar]

te sālaiścāśvakarṇaiśca dhavairvaṃśaiśca vānarāḥ |
kuṭajairarjunaistālaistikalaistimiśairapi || 16 ||
[Analyze grammar]

bilvakaiḥ saptaparṇaiśca karṇikāraiśca puṣpitaiḥ |
cūtaiścāśokavṛkṣaiśca sāgaraṃ samapūrayan || 17 ||
[Analyze grammar]

samūlāṃśca vimūlāṃśca pādapān harisattamāḥ |
indraketūnivodyamya prajahrurharayastarūn || 18 ||
[Analyze grammar]

prakṣipyamāṇairacalaiḥ sahasā jalamuddhatam |
samutpatitamākāśamapāsarpattatastataḥ || 19 ||
[Analyze grammar]

daśayojanavistīrṇaṃ śatayojanamāyatam |
nalaścakre mahāsetuṃ madhye nadanadīpateḥ || 20 ||
[Analyze grammar]

śilānāṃ kṣipyamāṇānāṃ śailānāṃ tatra pātyatām |
babhūva tumulaḥ śabdastadā tasminmahodadhau || 21 ||
[Analyze grammar]

sa nalena kṛtaḥ setuḥ sāgare makarālaye |
śuśubhe subhagaḥ śrīmān svātīpatha ivāmbare || 22 ||
[Analyze grammar]

tato devāḥ sagandharvāḥ siddhāśca paramarṣayaḥ || 23 ||
[Analyze grammar]

āplavantaḥ plavantaśca garjantaśca plavaṃgamāḥ |
tamacintyamasahyaṃ ca adbhutaṃ lomaharṣaṇam |
dadṛśuḥ sarvabhūtāni sāgare setubandhanam || 24 ||
[Analyze grammar]

tāni koṭisahasrāṇi vānarāṇāṃ mahaujasām |
badhnantaḥ sāgare setuṃ jagmuḥ pāraṃ mahodadheḥ || 25 ||
[Analyze grammar]

viśālaḥ sukṛtaḥ śrīmān subhūmiḥ susamāhitaḥ |
aśobhata mahāsetuḥ sīmanta iva sāgare || 26 ||
[Analyze grammar]

tataḥ pare samudrasya gadāpāṇirvibhīṣaṇaḥ |
pareṣāmabhighatārthamatiṣṭhat sacivaiḥ saha || 27 ||
[Analyze grammar]

agratastasya sainyasya śrīmān rāmaḥ salakṣmaṇaḥ |
jagāma dhanvī dharmātmā sugrīveṇa samanvitaḥ || 28 ||
[Analyze grammar]

anye madhyena gacchanti pārśvato'nye plavaṃgamāḥ |
salile prapatantyanye mārgamanye na lebhire |
ke cidvaihāyasa gatāḥ suparṇā iva pupluvuḥ || 29 ||
[Analyze grammar]

ghoṣeṇa mahatā ghoṣaṃ sāgarasya samucchritam |
bhīmamantardadhe bhīmā tarantī harivāhinī || 30 ||
[Analyze grammar]

vānarāṇāṃ hi sā tīrṇā vāhinī nala setunā |
tīre niviviśe rājñā bahumūlaphalodake || 31 ||
[Analyze grammar]

tadadbhutaṃ rāghava karma duṣkaraṃ samīkṣya devāḥ saha siddhacāraṇaiḥ |
upetya rāmaṃ sahitā maharṣibhiḥ samabhyaṣiñcan suśubhairjalaiḥ pṛthak || 32 ||
[Analyze grammar]

jayasva śatrūnnaradeva medinīṃ sasāgarāṃ pālaya śāśvatīḥ samāḥ |
itīva rāmaṃ naradevasatkṛtaṃ śubhairvacobhirvividhairapūjayan || 33 ||
[Analyze grammar]