Chapter 14

tasya rāmasya suptasya kuśāstīrṇe mahītale |
niyamādapramattasya niśāstisro'ticakramuḥ || 1 ||
[Analyze grammar]

na ca darśayate mandastadā rāmasya sāgaraḥ |
prayatenāpi rāmeṇa yathārhamabhipūjitaḥ || 2 ||
[Analyze grammar]

samudrasya tataḥ kruddho rāmo raktāntalocanaḥ |
samīpasthamuvācedaṃ lakṣmaṇaṃ śubhalakṣmaṇam || 3 ||
[Analyze grammar]

paśya tāvadanāryasya pūjyamānasya lakṣmaṇa |
avalepaṃ samudrasya na darśayati yat svayam || 4 ||
[Analyze grammar]

praśamaśca kṣamā caiva ārjavaṃ priyavāditā |
asāmarthyaṃ phalantyete nirguṇeṣu satāṃ guṇāḥ || 5 ||
[Analyze grammar]

ātmapraśaṃsinaṃ duṣṭaṃ dhṛṣṭaṃ viparidhāvakam |
sarvatrotsṛṣṭadaṇḍaṃ ca lokaḥ satkurute naram || 6 ||
[Analyze grammar]

na sāmnā śakyate kīrtirna sāmnā śakyate yaśaḥ |
prāptuṃ lakṣmaṇa loke'smiñjayo vā raṇamūdhani || 7 ||
[Analyze grammar]

adya madbāṇanirbhinnairmakarairmakarālayam |
niruddhatoyaṃ saumitre plavadbhiḥ paśya sarvataḥ || 8 ||
[Analyze grammar]

mahābhogāni matsyānāṃ kariṇāṃ ca karāniha |
bhogāṃśca paśya nāgānāṃ mayā bhinnāni lakṣmaṇa || 9 ||
[Analyze grammar]

saśaṅkhaśuktikā jālaṃ samīnamakaraṃ śaraiḥ |
adya yuddhena mahatā samudraṃ pariśoṣaye || 10 ||
[Analyze grammar]

kṣamayā hi samāyuktaṃ māmayaṃ makarālayaḥ |
asamarthaṃ vijānāti dhikkṣamāmīdṛśe jane || 11 ||
[Analyze grammar]

cāpamānaya saumitre śarāṃścāśīviṣopamān |
adyākṣobhyamapi kruddhaḥ kṣobhayiṣyāmi sāgaram || 12 ||
[Analyze grammar]

velāsu kṛtamaryādaṃ sahasormisamākulam |
nirmaryādaṃ kariṣyāmi sāyakairvaruṇālayam || 13 ||
[Analyze grammar]

evamuktvā dhanuṣpāṇiḥ krodhavisphāritekṣaṇaḥ |
babhūva rāmo durdharṣo yugāntāgniriva jvalan || 14 ||
[Analyze grammar]

saṃpīḍya ca dhanurghoraṃ kampayitvā śarairjagat |
mumoca viśikhānugrān vajrāṇīva śatakratuḥ || 15 ||
[Analyze grammar]

te jvalanto mahāvegāstejasā sāyakottamāḥ |
praviśanti samudrasya salilaṃ trastapannagam || 16 ||
[Analyze grammar]

tato vegaḥ samudrasya sanakramakaro mahān |
saṃbabhūva mahāghoraḥ samārutaravastadā || 17 ||
[Analyze grammar]

mahormimālāvitataḥ śaṅkhaśuktisamākulaḥ |
sadhūmaparivṛttormiḥ sahasābhūnmahodadhiḥ || 18 ||
[Analyze grammar]

vyathitāḥ pannagāścāsandīptāsyā dīptalocanāḥ |
dānavāśca mahāvīryāḥ pātālatalavāsinaḥ || 19 ||
[Analyze grammar]

ūrmayaḥ sindhurājasya sanakramakarāstadā |
vindhyamandarasaṃkāśāḥ samutpetuḥ sahasraśaḥ || 20 ||
[Analyze grammar]

āghūrṇitataraṅgaughaḥ saṃbhrāntoragarākṣasaḥ |
udvartita mahāgrāhaḥ saṃvṛttaḥ salilāśayaḥ || 21 ||
[Analyze grammar]