Chapter 12

atha rāmaḥ prasannātmā śrutvā vāyusutasya ha |
pratyabhāṣata durdharṣaḥ śrutavānātmani sthitam || 1 ||
[Analyze grammar]

mamāpi tu vivakṣāsti kā cit prati vibhīṣaṇam |
śrutamicchāmi tat sarvaṃ bhavadbhiḥ śreyasi sthitaiḥ || 2 ||
[Analyze grammar]

mitrabhāvena saṃprāptaṃ na tyajeyaṃ kathaṃ cana |
doṣo yadyapi tasya syāt satāmetadagarhitam || 3 ||
[Analyze grammar]

rāmasya vacanaṃ śrutvā sugrīvaḥ plavageśvaraḥ |
pratyabhāṣata kākutsthaṃ sauhārdenābhicoditaḥ || 4 ||
[Analyze grammar]

kimatra citraṃ dharmajña lokanāthaśikhāmaṇe |
yattvamāryaṃ prabhāṣethāḥ sattvavān sapathe sthitaḥ || 5 ||
[Analyze grammar]

mama cāpyantarātmāyaṃ śuddhiṃ vetti vibhīṣaṇam |
anumanācca bhāvācca sarvataḥ suparīkṣitaḥ || 6 ||
[Analyze grammar]

tasmāt kṣipraṃ sahāsmābhistulyo bhavatu rāghava |
vibhīṣaṇo mahāprājñaḥ sakhitvaṃ cābhyupaitu naḥ || 7 ||
[Analyze grammar]

sa sugrīvasya tadvākyaṃ rāmaḥ śrutvā vimṛśya ca |
tataḥ śubhataraṃ vākyamuvāca haripuṃgavam || 8 ||
[Analyze grammar]

suduṣṭo vāpyaduṣṭo vā kimeṣa rajanīcaraḥ |
sūkṣmamapyahitaṃ kartuṃ mamāśaktaḥ kathaṃ cana || 9 ||
[Analyze grammar]

piśācāndānavānyakṣānpṛthivyāṃ caiva rākṣasān |
aṅgulyagreṇa tān hanyāmicchan harigaṇeśvara || 10 ||
[Analyze grammar]

śrūyate hi kapotena śatruḥ śaraṇamāgataḥ |
arcitaśca yathānyāyaṃ svaiśca māṃsairnimantritaḥ || 11 ||
[Analyze grammar]

sa hi taṃ pratijagrāha bhāryā hartāramāgatam |
kapoto vānaraśreṣṭha kiṃ punarmadvidho janaḥ || 12 ||
[Analyze grammar]

ṛṣeḥ kaṇvasya putreṇa kaṇḍunā paramarṣiṇā |
śṛṇu gāthāṃ purā gītāṃ dharmiṣṭhāṃ satyavādinā || 13 ||
[Analyze grammar]

baddhāñjalipuṭaṃ dīnaṃ yācantaṃ śaraṇāgatam |
na hanyādānṛśaṃsyārthamapi śatruṃ paraṃ pata || 14 ||
[Analyze grammar]

ārto vā yadi vā dṛptaḥ pareṣāṃ śaraṇaṃ gataḥ |
ariḥ prāṇānparityajya rakṣitavyaḥ kṛtātmanā || 15 ||
[Analyze grammar]

sa cedbhayādvā mohādvā kāmādvāpi na rakṣati |
svayā śaktyā yathātattvaṃ tat pāpaṃ lokagarhitam || 16 ||
[Analyze grammar]

vinaṣṭaḥ paśyatastasya rakṣiṇaḥ śaraṇāgataḥ |
ādāya sukṛtaṃ tasya sarvaṃ gacchedarakṣitaḥ || 17 ||
[Analyze grammar]

evaṃ doṣo mahānatra prapannānāmarakṣaṇe |
asvargyaṃ cāyaśasyaṃ ca balavīryavināśanam || 18 ||
[Analyze grammar]

kariṣyāmi yathārthaṃ tu kaṇḍorvacanamuttamam |
dharmiṣṭhaṃ ca yaśasyaṃ ca svargyaṃ syāttu phalodaye || 19 ||
[Analyze grammar]

sakṛdeva prapannāya tavāsmīti ca yācate |
abhayaṃ sarvabhūtebhyo dadāmyetadvrataṃ mama || 20 ||
[Analyze grammar]

ānayainaṃ hariśreṣṭha dattamasyābhayaṃ mayā |
vibhīṣaṇo vā sugrīva yadi vā rāvaṇaḥ svayam || 21 ||
[Analyze grammar]

tatastu sugrīvavaco niśamya taddharīśvareṇābhihitaṃ nareśvaraḥ |
vibhīṣaṇenāśu jagāma saṃgamaṃ patatrirājena yathā puraṃdaraḥ || 22 ||
[Analyze grammar]