Chapter 5

sā tu nīlena vidhivat svārakṣā susamāhitā |
sāgarasyottare tīre sādhu senā niveśitā || 1 ||
[Analyze grammar]

maindaśca dvividhaścobhau tatra vānarapuṃgavau |
viceratuśca tāṃ senāṃ rakṣārthaṃ sarvato diśam || 2 ||
[Analyze grammar]

niviṣṭāyāṃ tu senāyāṃ tīre nadanadīpateḥ |
pārśvasthaṃ lakṣmaṇaṃ dṛṣṭvā rāmo vacanamabravīt || 3 ||
[Analyze grammar]

śokaśca kila kālena gacchatā hyapagacchati |
mama cāpaśyataḥ kāntāmahanyahani vardhate || 4 ||
[Analyze grammar]

na me duḥkhaṃ priyā dūre na me duḥkhaṃ hṛteti ca |
etadevānuśocāmi vayo'syā hyativartate || 5 ||
[Analyze grammar]

vāhi vāta yataḥ kanyā tāṃ spṛṣṭvā māmapi spṛśa |
tvayi me gātrasaṃsparśaścandre dṛṣṭisamāgamaḥ || 6 ||
[Analyze grammar]

tanme dahati gātrāṇi viṣaṃ pītamivāśaye |
hā nātheti priyā sā māṃ hriyamāṇā yadabravīt || 7 ||
[Analyze grammar]

tadviyogendhanavatā taccintāvipulārciṣā |
rātriṃ divaṃ śarīraṃ me dahyate madanāgninā || 8 ||
[Analyze grammar]

avagāhyārṇavaṃ svapsye saumitre bhavatā vinā |
kathaṃ cit prajvalan kāmaḥ samāsuptaṃ jale dahet || 9 ||
[Analyze grammar]

bahvetat kāmayānasya śakyametena jīvitum |
yadahaṃ sā ca vāmorurekāṃ dharaṇimāśritau || 10 ||
[Analyze grammar]

kedārasyeva kedāraḥ sodakasya nirūdakaḥ |
upasnehena jīvāmi jīvantīṃ yacchṛṇomi tām || 11 ||
[Analyze grammar]

kadā tu khalu susśoṇīṃ śatapatrāyatekṣaṇām |
vijitya śatrūndrakṣyāmi sītāṃ sphītāmiva śriyam || 12 ||
[Analyze grammar]

kadā nu cārubimbauṣṭhaṃ tasyāḥ padmamivānanam |
īṣadunnamya pāsyāmi rasāyanamivāturaḥ || 13 ||
[Analyze grammar]

tau tasyāḥ saṃhatau pīnau stanau tālaphalopamau |
kadā nu khalu sotkampau hasantyā māṃ bhajiṣyataḥ || 14 ||
[Analyze grammar]

sā nūnamasitāpāṅgī rakṣomadhyagatā satī |
mannāthā nāthahīneva trātāraṃ nādhigacchati || 15 ||
[Analyze grammar]

kadā vikṣobhya rakṣāṃsi sā vidhūyotpatiṣyati |
vidhūya jaladānnīlāñ śaśilekhā śaratsviva || 16 ||
[Analyze grammar]

svabhāvatanukā nūnaṃ śokenānaśanena ca |
bhūyastanutarā sītā deśakālaviparyayāt || 17 ||
[Analyze grammar]

kadā nu rākṣasendrasya nidhāyorasi sāyakān |
sītāṃ pratyāhariṣyāmi śokamutsṛjya mānasaṃ || 18 ||
[Analyze grammar]

kadā nu khalu māṃ sādhvī sītāmarasutopamā |
sotkaṇṭhā kaṇṭhamālambya mokṣyatyānandajaṃ jalam || 19 ||
[Analyze grammar]

kadā śokamimaṃ ghoraṃ maithilī viprayogajam |
sahasā vipramokṣyāmi vāsaḥ śukletaraṃ yathā || 20 ||
[Analyze grammar]

evaṃ vilapatastasya tatra rāmasya dhīmataḥ |
dinakṣayānmandavapurbhāskaro'stamupāgamat || 21 ||
[Analyze grammar]

āśvāsito lakṣmaṇena rāmaḥ saṃdhyāmupāsata |
smaran kamalapatrākṣīṃ sītāṃ śokākulīkṛtaḥ || 22 ||
[Analyze grammar]