Chapter 62

sugrīveṇaivamuktastu hṛṣṭo dadhimukhaḥ kapiḥ |
rāghavaṃ lakṣmaṇaṃ caiva sugrīvaṃ cābhyavādayat || 1 ||
[Analyze grammar]

sa praṇamya ca sugrīvaṃ rāghavau ca mahābalau |
vānaraiḥ sahitaiḥ śūrairdivamevotpapāta ha || 2 ||
[Analyze grammar]

sa yathaivāgataḥ pūrvaṃ tathaiva tvarito gataḥ |
nipatya gaganādbhūmau tadvanaṃ praviveśa ha || 3 ||
[Analyze grammar]

sa praviṣṭo madhuvanaṃ dadarśa hariyūthapān |
vimadānuddhatān sarvānmehamānānmadhūdakam || 4 ||
[Analyze grammar]

sa tānupāgamadvīro baddhvā karapuṭāñjalim |
uvāca vacanaṃ ślakṣṇamidaṃ hṛṣṭavadaṅgadam || 5 ||
[Analyze grammar]

saumya roṣo na kartavyo yadebhirabhivāritaḥ |
ajñānād rakṣibhiḥ krodhādbhavantaḥ pratiṣedhitāḥ || 6 ||
[Analyze grammar]

yuvarājastvamīśaśca vanasyāsya mahābala |
maurkhyāt pūrvaṃ kṛto doṣastadbhavān kṣantumarhati || 7 ||
[Analyze grammar]

yathaiva hi pitā te'bhūt pūrvaṃ harigaṇeśvaraḥ |
tathā tvamapi sugrīvo nānyastu harisattama || 8 ||
[Analyze grammar]

ākhyātaṃ hi mayā gatvā pitṛvyasya tavānagha |
ihopayānaṃ sarveṣāmeteṣāṃ vanacāriṇām || 9 ||
[Analyze grammar]

sa tvadāgamanaṃ śrutvā sahaibhirhariyūthapaiḥ |
prahṛṣṭo na tu ruṣṭo'sau vanaṃ śrutvā pradharṣitam || 10 ||
[Analyze grammar]

prahṛṣṭo māṃ pitṛvyaste sugrīvo vānareśvaraḥ |
śīghraṃ preṣaya sarvāṃstāniti hovāca pārthivaḥ || 11 ||
[Analyze grammar]

śrutvā dadhimukhasyaitadvacanaṃ ślakṣṇamaṅgadaḥ |
abravīttān hariśreṣṭho vākyaṃ vākyaviśāradaḥ || 12 ||
[Analyze grammar]

śaṅke śruto'yaṃ vṛttānto rāmeṇa hariyūthapāḥ |
tat kṣamaṃ neha naḥ sthātuṃ kṛte kārye paraṃtapāḥ || 13 ||
[Analyze grammar]

pītvā madhu yathākāmaṃ viśrāntā vanacāriṇaḥ |
kiṃ śeṣaṃ gamanaṃ tatra sugrīvo yatra me guruḥ || 14 ||
[Analyze grammar]

sarve yathā māṃ vakṣyanti sametya hariyūthapāḥ |
tathāsmi kartā kartavye bhavadbhiḥ paravānaham || 15 ||
[Analyze grammar]

nājñāpayitumīśo'haṃ yuvarājo'smi yadyapi |
ayuktaṃ kṛtakarmāṇo yūyaṃ dharṣayituṃ mayā || 16 ||
[Analyze grammar]

bruvataścāṅgadaścaivaṃ śrutvā vacanamavyayam |
prahṛṣṭamanaso vākyamidamūcurvanaukasaḥ || 17 ||
[Analyze grammar]

evaṃ vakṣyati ko rājanprabhuḥ san vānararṣabha |
aiśvaryamadamatto hi sarvo'hamiti manyate || 18 ||
[Analyze grammar]

tava cedaṃ susadṛśaṃ vākyaṃ nānyasya kasya cit |
saṃnatirhi tavākhyāti bhaviṣyacchubhabhāgyatām || 19 ||
[Analyze grammar]

sarve vayamapi prāptāstatra gantuṃ kṛtakṣaṇāḥ |
sa yatra harivīrāṇāṃ sugrīvaḥ patiravyayaḥ || 20 ||
[Analyze grammar]

tvayā hyanuktairharibhirnaiva śakyaṃ padāt padam |
kva cidgantuṃ hariśreṣṭha brūmaḥ satyamidaṃ tu te || 21 ||
[Analyze grammar]

evaṃ tu vadatāṃ teṣāmaṅgadaḥ pratyabhāṣata |
bāḍhaṃ gacchāma ityuktvā utpapāta mahītalāt || 22 ||
[Analyze grammar]

utpatantamanūtpetuḥ sarve te hariyūthapāḥ |
kṛtvākāśaṃ nirākāśaṃ yajñotkṣiptā ivānalāḥ || 23 ||
[Analyze grammar]

te'mbaraṃ sahasotpatya vegavantaḥ plavaṃgamāḥ |
vinadanto mahānādaṃ ghanā vāteritā yathā || 24 ||
[Analyze grammar]

aṅgade hyananuprāpte sugrīvo vānarādhipaḥ |
uvāca śokopahataṃ rāmaṃ kamalalocanam || 25 ||
[Analyze grammar]

samāśvasihi bhadraṃ te dṛṣṭā devī na saṃśayaḥ |
nāgantumiha śakyaṃ tairatīte samaye hi naḥ || 26 ||
[Analyze grammar]

na matsakāśamāgacchet kṛtye hi vinipātite |
yuvarājo mahābāhuḥ plavatāṃ pravaro'ṅgadaḥ || 27 ||
[Analyze grammar]

yadyapyakṛtakṛtyānāmīdṛśaḥ syādupakramaḥ |
bhavettu dīnavadano bhrāntaviplutamānasaḥ || 28 ||
[Analyze grammar]

pitṛpaitāmahaṃ caitat pūrvakairabhirakṣitam |
na me madhuvanaṃ hanyādahṛṣṭaḥ plavageśvaraḥ || 29 ||
[Analyze grammar]

kausalyā suprajā rāma samāśvasihi suvrata |
dṛṣṭā devī na saṃdeho na cānyena hanūmatā |
na hyanyaḥ karmaṇo hetuḥ sādhane tadvidho bhavet || 30 ||
[Analyze grammar]

hanūmati hi siddhiśca matiśca matisattama |
vyavasāyaśca vīryaṃ ca sūrye teja iva dhruvam || 31 ||
[Analyze grammar]

jāmbavānyatra netā syādaṅgadaśca baleśvaraḥ |
hanūmāṃścāpyadhiṣṭhātā na tasya gatiranyathā || 32 ||
[Analyze grammar]

mā bhūścintā samāyuktaḥ saṃpratyamitavikrama || 33 ||
[Analyze grammar]

tataḥ kila kilā śabdaṃ śuśrāvāsannamambare |
hanūmat karmadṛptānāṃ nardatāṃ kānanaukasām |
kiṣkindhāmupayātānāṃ siddhiṃ kathayatāmiva || 34 ||
[Analyze grammar]

tataḥ śrutvā ninādaṃ taṃ kapīnāṃ kapisattamaḥ |
āyatāñcitalāṅgūlaḥ so'bhavaddhṛṣṭamānasaḥ || 35 ||
[Analyze grammar]

ājagmuste'pi harayo rāmadarśanakāṅkṣiṇaḥ |
aṅgadaṃ purataḥ kṛtvā hanūmantaṃ ca vānaram || 36 ||
[Analyze grammar]

te'ṅgadapramukhā vīrāḥ prahṛṣṭāśca mudānvitāḥ |
nipeturharirājasya samīpe rāghavasya ca || 37 ||
[Analyze grammar]

hanūmāṃśca mahābahuḥ praṇamya śirasā tataḥ |
niyatāmakṣatāṃ devīṃ rāghavāya nyavedayat || 38 ||
[Analyze grammar]

niścitārthaṃ tatastasmin sugrīvaṃ pavanātmaje |
lakṣmaṇaḥ prītimānprītaṃ bahumānādavaikṣata || 39 ||
[Analyze grammar]

prītyā ca ramamāṇo'tha rāghavaḥ paravīrahā |
bahu mānena mahatā hanūmantamavaikṣata || 40 ||
[Analyze grammar]