Chapter 58

tasya tadvacanaṃ śrutvā vālisūnurabhāṣata |
jāmbavatpramukhān sarvānanujñāpya mahākapīn || 1 ||
[Analyze grammar]

asminnevaṃgate kārye bhavatāṃ ca nivedite |
nyāyyaṃ sma saha vaidehyā draṣṭuṃ tau pārthivātmajau || 2 ||
[Analyze grammar]

ahameko'pi paryāptaḥ sarākṣasagaṇāṃ purīm |
tāṃ laṅkāṃ tarasā hantuṃ rāvaṇaṃ ca mahābalam || 3 ||
[Analyze grammar]

kiṃ punaḥ sahito vīrairbalavadbhiḥ kṛtātmabhiḥ |
kṛtāstraiḥ plavagaiḥ śaktairbhavadbhirvijayaiṣibhiḥ || 4 ||
[Analyze grammar]

ahaṃ tu rāvaṇaṃ yuddhe sasainyaṃ sapuraḥsaram |
saputraṃ vidhamiṣyāmi sahodarayutaṃ yudhi || 5 ||
[Analyze grammar]

brāhmamaindraṃ ca raudraṃ ca vāyavyaṃ vāruṇaṃ tathā |
yadi śakrajito'strāṇi durnirīkṣyāṇi saṃyuge |
tānyahaṃ vidhamiṣyāmi nihaniṣyāmi rākṣasān || 6 ||
[Analyze grammar]

bhavatāmabhyanujñāto vikramo me ruṇaddhi tam || 7 ||
[Analyze grammar]

mayātulā visṛṣṭā hi śailavṛṣṭirnirantarā |
devānapi raṇe hanyāt kiṃ punastānniśācarān || 8 ||
[Analyze grammar]

sāgaro'pyatiyādvelāṃ mandaraḥ pracaledapi |
na jāmbavantaṃ samare kampayedarivāhinī || 9 ||
[Analyze grammar]

sarvarākṣasasaṃghānāṃ rākṣasā ye ca pūrvakāḥ |
alameko vināśāya vīro vāyusutaḥ kapiḥ || 10 ||
[Analyze grammar]

panasasyoruvegena nīlasya ca mahātmanaḥ |
mandaro'pyavaśīryeta kiṃ punaryudhi rākṣasāḥ || 11 ||
[Analyze grammar]

sadevāsurayuddheṣu gandharvoragapakṣiṣu |
maindasya pratiyoddhāraṃ śaṃsata dvividasya vā || 12 ||
[Analyze grammar]

aśviputrau mahāvegāvetau plavagasattamau |
pitāmahavarotsekāt paramaṃ darpamāsthitau || 13 ||
[Analyze grammar]

aśvinormānanārthaṃ hi sarvalokapitāmahaḥ |
sarvāvadhyatvamatulamanayordattavānpurā || 14 ||
[Analyze grammar]

varotsekena mattau ca pramathya mahatīṃ camūm |
surāṇāmamṛtaṃ vīrau pītavantau plavaṃgamau || 15 ||
[Analyze grammar]

etāveva hi saṃkruddhau savājirathakuñjarām |
laṅkāṃ nāśayituṃ śaktau sarve tiṣṭhantu vānarāḥ || 16 ||
[Analyze grammar]

ayuktaṃ tu vinā devīṃ dṛṣṭabadbhiḥ plavaṃgamāḥ |
samīpaṃ gantumasmābhī rāghavasya mahātmanaḥ || 17 ||
[Analyze grammar]

dṛṣṭā devī na cānītā iti tatra nivedanam |
ayuktamiva paśyāmi bhavadbhiḥ khyātavikramaiḥ || 18 ||
[Analyze grammar]

na hi vaḥ plavate kaścinnāpi kaścit parākrame |
tulyaḥ sāmaradaityeṣu lokeṣu harisattamāḥ || 19 ||
[Analyze grammar]

teṣvevaṃ hatavīreṣu rākṣaseṣu hanūmatā |
kimanyadatra kartavyaṃ gṛhītvā yāma jānakīm || 20 ||
[Analyze grammar]

tamevaṃ kṛtasaṃkalpaṃ jāmbavān harisattamaḥ |
uvāca paramaprīto vākyamarthavadarthavit || 21 ||
[Analyze grammar]

na tāvadeṣā matirakṣamā no yathā bhavānpaśyati rājaputra |
yathā tu rāmasya matirniviṣṭā tathā bhavānpaśyatu kāryasiddhim || 22 ||
[Analyze grammar]