Chapter 53

saṃdīpyamānāṃ vidhvastāṃ trastarakṣo gaṇāṃ purīm |
avekṣya hānumāṃl laṅkāṃ cintayāmāsa vānaraḥ || 1 ||
[Analyze grammar]

tasyābhūt sumahāṃstrāsaḥ kutsā cātmanyajāyata |
laṅkāṃ pradahatā karma kiṃsvit kṛtamidaṃ mayā || 2 ||
[Analyze grammar]

dhanyāste puruṣaśreṣṭha ye buddhyā kopamutthitam |
nirundhanti mahātmāno dīptamagnimivāmbhasā || 3 ||
[Analyze grammar]

yadi dagdhā tviyaṃ laṅkā nūnamāryāpi jānakī |
dagdhā tena mayā bharturhataṃ kāryamajānatā || 4 ||
[Analyze grammar]

yadarthamayamārambhastat kāryamavasāditam |
mayā hi dahatā laṅkāṃ na sītā parirakṣitā || 5 ||
[Analyze grammar]

īṣatkāryamidaṃ kāryaṃ kṛtamāsīnna saṃśayaḥ |
tasya krodhābhibhūtena mayā mūlakṣayaḥ kṛtaḥ || 6 ||
[Analyze grammar]

vinaṣṭā jānakī vyaktaṃ na hyadagdhaḥ pradṛśyate |
laṅkāyāḥ kaściduddeśaḥ sarvā bhasmīkṛtā purī || 7 ||
[Analyze grammar]

yadi tadvihataṃ kāryaṃ mayā prajñāviparyayāt |
ihaiva prāṇasaṃnyāso mamāpi hyatirocate || 8 ||
[Analyze grammar]

kimagnau nipatāmyadya āhosvidvaḍavāmukhe |
śarīramāho sattvānāṃ dadmi sāgaravāsinām || 9 ||
[Analyze grammar]

kathaṃ hi jīvatā śakyo mayā draṣṭuṃ harīśvaraḥ |
tau vā puruṣaśārdūlau kāryasarvasvaghātinā || 10 ||
[Analyze grammar]

mayā khalu tadevedaṃ roṣadoṣāt pradarśitam |
prathitaṃ triṣu lokeṣu kapitamanavasthitam || 11 ||
[Analyze grammar]

dhigastu rājasaṃ bhāvamanīśamanavasthitam |
īśvareṇāpi yad rāgānmayā sītā na rakṣitā || 12 ||
[Analyze grammar]

vinaṣṭāyāṃ tu sītāyāṃ tāv ubhau vinaśiṣyataḥ |
tayorvināśe sugrīvaḥ sabandhurvinaśiṣyati || 13 ||
[Analyze grammar]

etadeva vacaḥ śrutvā bharato bhrātṛvatsalaḥ |
dharmātmā sahaśatrughnaḥ kathaṃ śakṣyati jīvitum || 14 ||
[Analyze grammar]

ikṣvākuvaṃśe dharmiṣṭhe gate nāśamasaṃśayam |
bhaviṣyanti prajāḥ sarvāḥ śokasaṃtāpapīḍitāḥ || 15 ||
[Analyze grammar]

tadahaṃ bhāgyarahito luptadharmārthasaṃgrahaḥ |
roṣadoṣaparītātmā vyaktaṃ lokavināśanaḥ || 16 ||
[Analyze grammar]

iti cintayatastasya nimittānyupapedire |
pūramapyupalabdhāni sākṣāt punaracintayat || 17 ||
[Analyze grammar]

atha vā cārusarvāṅgī rakṣitā svena tejasā |
na naśiṣyati kalyāṇī nāgniragnau pravartate || 18 ||
[Analyze grammar]

na hi dharmānmanastasya bhāryāmamitatejasaḥ |
svacāritrābhiguptāṃ tāṃ spraṣṭumarhati pāvakaḥ || 19 ||
[Analyze grammar]

nūnaṃ rāmaprabhāvena vaidehyāḥ sukṛtena ca |
yanmāṃ dahanakarmāyaṃ nādahaddhavyavāhanaḥ || 20 ||
[Analyze grammar]

trayāṇāṃ bharatādīnāṃ bhrātṝṇāṃ devatā ca yā |
rāmasya ca manaḥkāntā sā kathaṃ vinaśiṣyati || 21 ||
[Analyze grammar]

yadvā dahanakarmāyaṃ sarvatra prabhuravyayaḥ |
na me dahati lāṅgūlaṃ kathamāryāṃ pradhakṣyati || 22 ||
[Analyze grammar]

tapasā satyavākyena ananyatvācca bhartari |
api sā nirdahedagniṃ na tāmagniḥ pradhakṣyati || 23 ||
[Analyze grammar]

sa tathā cintayaṃstatra devyā dharmaparigraham |
śuśrāva hanumān vākyaṃ cāraṇānāṃ mahātmanām || 24 ||
[Analyze grammar]

aho khalu kṛtaṃ karma durviṣahyaṃ hanūmatā |
agniṃ visṛjatābhīkṣṇaṃ bhīmaṃ rākṣasasadmani || 25 ||
[Analyze grammar]

dagdheyaṃ nagarī laṅkā sāṭṭaprākāratoraṇā |
jānakī na ca dagdheti vismayo'dbhuta eva naḥ || 26 ||
[Analyze grammar]

sa nimittaiśca dṛṣṭārthaiḥ kāraṇaiśca mahāguṇaiḥ |
ṛṣivākyaiśca hanumānabhavat prītamānasaḥ || 27 ||
[Analyze grammar]

tataḥ kapiḥ prāptamanorathārthastāmakṣatāṃ rājasutāṃ viditvā |
pratyakṣatastāṃ punareva dṛṣṭvā pratiprayāṇāya matiṃ cakāra || 28 ||
[Analyze grammar]