Chapter 66

saṃstūyamāno hanumān vyavardhata mahābalaḥ |
samāvidhya ca lāṅgūlaṃ harṣācca balameyivān || 1 ||
[Analyze grammar]

tasya saṃstūyamānasya sarvairvānarapuṃgavaiḥ |
tejasāpūryamāṇasya rūpamāsīdanuttamam || 2 ||
[Analyze grammar]

yathā vijṛmbhate siṃho vivṛddho girigahvare |
mārutasyaurasaḥ putrastathā saṃprati jṛmbhate || 3 ||
[Analyze grammar]

aśobhata mukhaṃ tasya jṛmbhamāṇasya dhīmataḥ |
ambarīṣopamaṃ dīptaṃ vidhūma iva pāvakaḥ || 4 ||
[Analyze grammar]

harīṇāmutthito madhyāt saṃprahṛṣṭatanūruhaḥ |
abhivādya harīn vṛddhān hanumānidamabravīt || 5 ||
[Analyze grammar]

arujanparvatāgrāṇi hutāśanasakho'nilaḥ |
balavānaprameyaśca vāyurākāśagocaraḥ || 6 ||
[Analyze grammar]

tasyāhaṃ śīghravegasya śīghragasya mahātmanaḥ |
mārutasyaurasaḥ putraḥ plavane nāsti me samaḥ || 7 ||
[Analyze grammar]

utsaheyaṃ hi vistīrṇamālikhantamivāmbaram |
meruṃ girimasaṃgena parigantuṃ sahasraśaḥ || 8 ||
[Analyze grammar]

bāhuvegapraṇunnena sāgareṇāhamutsahe |
samāplāvayituṃ lokaṃ saparvatanadīhradam || 9 ||
[Analyze grammar]

mamorujaṅghāvegena bhaviṣyati samutthitaḥ |
saṃmūrchitamahāgrāhaḥ samudro varuṇālayaḥ || 10 ||
[Analyze grammar]

pannagāśanamākāśe patantaṃ pakṣisevitam |
vainateyamahaṃ śaktaḥ parigantuṃ sahasraśaḥ || 11 ||
[Analyze grammar]

udayāt prasthitaṃ vāpi jvalantaṃ raśmimālinam |
anastamitamādityamabhigantuṃ samutsahe || 12 ||
[Analyze grammar]

tato bhūmimasaṃspṛśya punarāgantumutsahe |
pravegenaiva mahatā bhīmena plavagarṣabhāḥ || 13 ||
[Analyze grammar]

utsaheyamatikrāntuṃ sarvānākāśagocarān |
sāgaraṃ kṣobhayiṣyāmi dārayiṣyāmi medinīm || 14 ||
[Analyze grammar]

parvatān kampayiṣyāmi plavamānaḥ plavaṃgamāḥ |
hariṣye coruvegena plavamāno mahārṇavam || 15 ||
[Analyze grammar]

latānāṃ vīrudhāṃ puṣpaṃ pādapānāṃ ca sarvaśaḥ |
anuyāsyati māmadya plavamānaṃ vihāyasā |
bhaviṣyati hi me panthāḥ svāteḥ panthā ivāmbare || 16 ||
[Analyze grammar]

carantaṃ ghoramākāśamutpatiṣyantameva ca |
drakṣyanti nipatantaṃ ca sarvabhūtāni vānarāḥ || 17 ||
[Analyze grammar]

mahāmerupratīkāśaṃ māṃ drakṣyadhvaṃ plavaṃgamāḥ |
divamāvṛtya gacchantaṃ grasamānamivāmbaram || 18 ||
[Analyze grammar]

vidhamiṣyāmi jīmūtān kampayiṣyāmi parvatān |
sāgaraṃ kṣobhayiṣyāmi plavamānaḥ samāhitaḥ || 19 ||
[Analyze grammar]

vainateyasya vā śaktirmama vā mārutasya vā |
ṛte suparṇarājānaṃ mārutaṃ vā mahābalam |
na hi bhūtaṃ prapaśyāmi yo māṃ plutamanuvrajet || 20 ||
[Analyze grammar]

nimeṣāntaramātreṇa nirālambhanamambaram |
sahasā nipatiṣyāmi ghanādvidyudivotthitā || 21 ||
[Analyze grammar]

bhaviṣyati hi me rūpaṃ plavamānasya sāgaram |
viṣṇoḥ prakramamāṇasya tadā trīn vikramāniva || 22 ||
[Analyze grammar]

buddhyā cāhaṃ prapaśyāmi manaśceṣṭā ca me tathā |
ahaṃ drakṣyāmi vaidehīṃ pramodadhvaṃ plavaṃgamāḥ || 23 ||
[Analyze grammar]

mārutasya samo vege garuḍasya samo jave |
ayutaṃ yojanānāṃ tu gamiṣyāmīti me matiḥ || 24 ||
[Analyze grammar]

vāsavasya savajrasya brahmaṇo vā svayambhuvaḥ |
vikramya sahasā hastādamṛtaṃ tadihānaye |
laṅkāṃ vāpi samutkṣipya gaccheyamiti me matiḥ || 25 ||
[Analyze grammar]

tamevaṃ vānaraśreṣṭhaṃ garjantamamitaujasaṃ |
uvāca parisaṃhṛṣṭo jāmbavān harisattamaḥ || 26 ||
[Analyze grammar]

vīra kesariṇaḥ putra vegavanmārutātmaja |
jñātīnāṃ vipulaṃ śokastvayā tāta praṇāśitaḥ || 27 ||
[Analyze grammar]

tava kalyāṇarucayaḥ kapimukhyāḥ samāgatāḥ |
maṅgalaṃ kāryasiddhyarthaṃ kariṣyanti samāhitāḥ || 28 ||
[Analyze grammar]

ṛṣīṇāṃ ca prasādena kapivṛddhamatena ca |
gurūṇāṃ ca prasādena plavasva tvaṃ mahārṇavam || 29 ||
[Analyze grammar]

sthāsyāmaścaikapādena yāvadāgamanaṃ tava |
tvadgatāni ca sarveṣāṃ jīvitāni vanaukasām || 30 ||
[Analyze grammar]

tatastu hariśārdūlastānuvāca vanaukasaḥ |
neyaṃ mama mahī vegaṃ plavane dhārayiṣyati || 31 ||
[Analyze grammar]

etāni hi nagasyāsya śilāsaṃkaṭaśālinaḥ |
śikharāṇi mahendrasya sthirāṇi ca mahānti ca || 32 ||
[Analyze grammar]

etāni mama niṣpeṣaṃ pādayoḥ patatāṃ varāḥ |
plavato dhārayiṣyanti yojanānāmitaḥ śatam || 33 ||
[Analyze grammar]

tatastu mārutaprakhyaḥ sa harirmārutātmajaḥ |
āruroha nagaśreṣṭhaṃ mahendramarimardanaḥ || 34 ||
[Analyze grammar]

vṛtaṃ nānāvidhairvṛkṣairmṛgasevitaśādvalam |
latākusumasaṃbādhaṃ nityapuṣpaphaladrumam || 35 ||
[Analyze grammar]

siṃhaśārdūlacaritaṃ mattamātaṅgasevitam |
mattadvijagaṇodghuṣṭaṃ salilotpīḍasaṃkulam || 36 ||
[Analyze grammar]

mahadbhirucchritaṃ śṛṅgairmahendraṃ sa mahābalaḥ |
vicacāra hariśreṣṭho mahendrasamavikramaḥ || 37 ||
[Analyze grammar]

pādābhyāṃ pīḍitastena mahāśailo mahātmanā |
rarāsa siṃhābhihato mahānmatta iva dvipaḥ || 38 ||
[Analyze grammar]

mumoca salilotpīḍān viprakīrṇaśiloccayaḥ |
vitrastamṛgamātaṅgaḥ prakampitamahādrumaḥ || 39 ||
[Analyze grammar]

nānāgandharvamithunaiḥ pānasaṃsargakarkaśaiḥ |
utpatadbhirvihaṃgaiśca vidyādharagaṇairapi || 40 ||
[Analyze grammar]

tyajyamānamahāsānuḥ saṃnilīnamahoragaḥ |
śailaśṛṅgaśilodghātastadābhūt sa mahāgiriḥ || 41 ||
[Analyze grammar]

niḥśvasadbhistadā taistu bhujagairardhaniḥsṛtaiḥ |
sapatāka ivābhāti sa tadā dharaṇīdharaḥ || 42 ||
[Analyze grammar]

ṛṣibhistrāsa saṃbhrāntaistyajyamānaḥ śiloccayaḥ |
sīdanmahati kāntāre sārthahīna ivādhvagaḥ || 43 ||
[Analyze grammar]

sa vegavān vegasamāhitātmā haripravīraḥ paravīrahantā |
manaḥ samādhāya mahānubhāvo jagāma laṅkāṃ manasā manasvī || 44 ||
[Analyze grammar]