Chapter 65

anekaśatasāhasrīṃ viṣaṇṇāṃ harivāhinīm |
jāmbavān samudīkṣyaivaṃ hanumantamathābravīt || 1 ||
[Analyze grammar]

vīra vānaralokasya sarvaśāstravidāṃ vara |
tūṣṇīmekāntamāśritya hanuman kiṃ na jalpasi || 2 ||
[Analyze grammar]

hanuman harirājasya sugrīvasya samo hyasi |
rāmalakṣmaṇayoścāpi tejasā ca balena ca || 3 ||
[Analyze grammar]

ariṣṭaneminaḥ putrau vainateyo mahābalaḥ |
garutmāniva vikhyāta uttamaḥ sarvapakṣiṇām || 4 ||
[Analyze grammar]

bahuśo hi mayā dṛṣṭaḥ sāgare sa mahābalaḥ |
bhujagānuddharanpakṣī mahāvego mahāyaśāḥ || 5 ||
[Analyze grammar]

pakṣayoryadbalaṃ tasya tāvadbhujabalaṃ tava |
vikramaścāpi vegaśca na te tenāpahīyate || 6 ||
[Analyze grammar]

balaṃ buddhiśca tejaśca sattvaṃ ca harisattama |
viśiṣṭaṃ sarvabhūteṣu kimātmānaṃ na budhyase || 7 ||
[Analyze grammar]

apsarāpsarasāṃ śreṣṭhā vikhyātā puñjikasthalā |
ajñaneti parikhyātā patnī kesariṇo hareḥ || 8 ||
[Analyze grammar]

abhiśāpādabhūttāta vānarī kāmarūpiṇī |
duhitā vānarendrasya kuñjarasya mahātmanaḥ || 9 ||
[Analyze grammar]

kapitve cārusarvāṅgī kadā cit kāmarūpiṇī |
mānuṣaṃ vigrahaṃ kṛtvā yauvanottamaśālinī || 10 ||
[Analyze grammar]

acarat parvatasyāgre prāvṛḍambudasaṃnibhe |
vicitramālyābharaṇā mahārhakṣaumavāsinī || 11 ||
[Analyze grammar]

tasyā vastraṃ viśālākṣyāḥ pītaṃ raktadaśaṃ śubham |
sthitāyāḥ parvatasyāgre māruto'paharacchanaiḥ || 12 ||
[Analyze grammar]

sa dadarśa tatastasyā vṛttāv ūrū susaṃhatau |
stanau ca pīnau sahitau sujātaṃ cāru cānanam || 13 ||
[Analyze grammar]

tāṃ viśālāyataśroṇīṃ tanumadhyāṃ yaśasvinīm |
dṛṣṭvaiva śubhasarvāgnīṃ pavanaḥ kāmamohitaḥ || 14 ||
[Analyze grammar]

sa tāṃ bhujābhyāṃ pīnābhyāṃ paryaṣvajata mārutaḥ |
manmathāviṣṭasarvāṅgo gatātmā tāmaninditām || 15 ||
[Analyze grammar]

sā tu tatraiva saṃbhrāntā suvṛttā vākyamabravīt |
ekapatnīvratamidaṃ ko nāśayitumicchati || 16 ||
[Analyze grammar]

añjanāyā vacaḥ śrutvā mārutaḥ pratyabhāṣata |
na tvāṃ hiṃsāmi suśroṇi mā bhūtte subhage bhayam || 17 ||
[Analyze grammar]

manasāsmi gato yattvāṃ pariṣvajya yaśasvini |
vīryavānbuddhisaṃpannaḥ putrastava bhaviṣyati || 18 ||
[Analyze grammar]

abhyutthitaṃ tataḥ sūryaṃ bālo dṛṣṭvā mahāvane |
phalaṃ ceti jighṛkṣustvamutplutyābhyapato divam || 19 ||
[Analyze grammar]

śatāni trīṇi gatvātha yojanānāṃ mahākape |
tejasā tasya nirdhūto na viṣādaṃ tato gataḥ || 20 ||
[Analyze grammar]

tāvadāpatatastūrṇamantarikṣaṃ mahākape |
kṣiptamindreṇa te vajraṃ krodhāviṣṭena dhīmatā || 21 ||
[Analyze grammar]

tataḥ śailāgraśikhare vāmo hanurabhajyata |
tato hi nāmadheyaṃ te hanumāniti kīrtyate || 22 ||
[Analyze grammar]

tatastvāṃ nihataṃ dṛṣṭvā vāyurgandhavahaḥ svayam |
trailokye bhṛśasaṃkruddho na vavau vai prabhañjanaḥ || 23 ||
[Analyze grammar]

saṃbhrāntāśca surāḥ sarve trailokye kṣubhite sati |
prasādayanti saṃkruddhaṃ mārutaṃ bhuvaneśvarāḥ || 24 ||
[Analyze grammar]

prasādite ca pavane brahmā tubhyaṃ varaṃ dadau |
aśastravadhyatāṃ tāta samare satyavikrama || 25 ||
[Analyze grammar]

vajrasya ca nipātena virujaṃ tvāṃ samīkṣya ca |
sahasranetraḥ prītātmā dadau te varamuttamam || 26 ||
[Analyze grammar]

svacchandataśca maraṇaṃ te bhūyāditi vai prabho |
sa tvaṃ kesariṇaḥ putraḥ kṣetrajo bhīmavikramaḥ || 27 ||
[Analyze grammar]

mārutasyaurasaḥ putrastejasā cāpi tatsamaḥ |
tvaṃ hi vāyusuto vatsa plavane cāpi tatsamaḥ || 28 ||
[Analyze grammar]

vayamadya gataprāṇā bhavānasmāsu sāmpratam |
dākṣyavikramasaṃpannaḥ pakṣirāja ivāparaḥ || 29 ||
[Analyze grammar]

trivikrame mayā tāta saśailavanakānanā |
triḥ saptakṛtvaḥ pṛthivī parikrāntā pradakṣiṇam || 30 ||
[Analyze grammar]

tadā cauṣadhayo'smābhiḥ saṃcitā devaśāsanāt |
niṣpannamamṛtaṃ yābhistadāsīnno mahadbalam || 31 ||
[Analyze grammar]

sa idānīmahaṃ vṛddhaḥ parihīnaparākramaḥ |
sāmprataṃ kālamasmākaṃ bhavān sarvaguṇānvitaḥ || 32 ||
[Analyze grammar]

tadvijṛmbhasva vikrāntaḥ plavatāmuttamo hyasi |
tvadvīryaṃ draṣṭukāmeyaṃ sarvā vānaravāhinī || 33 ||
[Analyze grammar]

uttiṣṭha hariśārdūla laṅghayasva mahārṇavam |
parā hi sarvabhūtānāṃ hanumanyā gatistava || 34 ||
[Analyze grammar]

viṣāṇṇā harayaḥ sarve hanuman kimupekṣase |
vikramasva mahāvego viṣṇustrīn vikramāniva || 35 ||
[Analyze grammar]

tatastu vai jāmbavatābhicoditaḥ pratītavegaḥ pavanātmajaḥ kapiḥ |
praharṣayaṃstāṃ harivīra vāhinīṃ cakāra rūpaṃ mahadātmanastadā || 36 ||
[Analyze grammar]