Chapter 58

tatastadamṛtāsvādaṃ gṛdhrarājena bhāṣitam |
niśamya vadato hṛṣṭāste vacaḥ plavagarṣabhāḥ || 1 ||
[Analyze grammar]

jāmbavān vai hariśreṣṭhaḥ saha sarvaiḥ plavaṃgamaiḥ |
bhūtalāt sahasotthāya gṛdhrarājānamabravīt || 2 ||
[Analyze grammar]

kva sītā kena vā dṛṣṭā ko vā harati maithilīm |
tadākhyātu bhavān sarvaṃ gatirbhava vanaukasām || 3 ||
[Analyze grammar]

ko dāśarathibāṇānāṃ vajraveganipātinām |
svayaṃ lakṣmaṇamuktānāṃ na cintayati vikramam || 4 ||
[Analyze grammar]

sa harīnprītisaṃyuktān sītā śrutisamāhitān |
punarāśvāsayanprīta idaṃ vacanamabravīt || 5 ||
[Analyze grammar]

śrūyatāmiha vaidehyā yathā me haraṇaṃ śrutam |
yena cāpi mamākhyātaṃ yatra cāyatalocanā || 6 ||
[Analyze grammar]

ahamasmin girau durge bahuyojanamāyate |
cirānnipatito vṛddhaḥ kṣīṇaprāṇaparākramaḥ || 7 ||
[Analyze grammar]

taṃ māmevaṃgataṃ putraḥ supārśvo nāma nāmataḥ |
āhāreṇa yathākālaṃ bibharti patatāṃ varaḥ || 8 ||
[Analyze grammar]

tīkṣṇakāmāstu gandharvāstīkṣṇakopā bhujaṃgamāḥ |
mṛgāṇāṃ tu bhayaṃ tīkṣṇaṃ tatastīkṣṇakṣudhā vayam || 9 ||
[Analyze grammar]

sa kadā cit kṣudhārtasya mama cāhārakāṅkṣiṇaḥ |
gatasūryo'hani prāpto mama putro hyanāmiṣaḥ || 10 ||
[Analyze grammar]

sa mayā vṛddhabhāvācca kopācca paribhartsitaḥ |
kṣutpipāsā parītena kumāraḥ patatāṃ varaḥ || 11 ||
[Analyze grammar]

sa mamāhārasaṃrodhāt pīḍitaḥ prītivardhanaḥ |
anumānya yathātattvamidaṃ vacanamabravīt || 12 ||
[Analyze grammar]

ahaṃ tāta yathākālamāmiṣārthī khamāplutaḥ |
mahendrasya girerdvāramāvṛtya ca samāsthitaḥ || 13 ||
[Analyze grammar]

tatra sattvasahasrāṇāṃ sāgarāntaracāriṇām |
panthānameko'dhyavasaṃ saṃniroddhumavāṅmukhaḥ || 14 ||
[Analyze grammar]

tatra kaścinmayā dṛṣṭaḥ sūryodayasamaprabhām |
striyamādāya gacchan vai bhinnāñjanacayopamaḥ || 15 ||
[Analyze grammar]

so'hamabhyavahārārthī tau dṛṣṭvā kṛtaniścayaḥ |
tena sāmnā vinītena panthānamabhiyācitaḥ || 16 ||
[Analyze grammar]

na hi sāmopapannānāṃ prahartā vidyate kva cit |
nīceṣvapi janaḥ kaścit kimaṅga bata madvidhaḥ || 17 ||
[Analyze grammar]

sa yātastejasā vyoma saṃkṣipanniva vegataḥ |
athāhaṃ khe carairbhūtairabhigamya sabhājitaḥ || 18 ||
[Analyze grammar]

diṣṭyā jīvasi tāteti abruvanmāṃ maharṣayaḥ |
kathaṃ cit sakalatro'sau gataste svastyasaṃśayam || 19 ||
[Analyze grammar]

evamuktastato'haṃ taiḥ siddhaiḥ paramaśobhanaiḥ |
sa ca me rāvaṇo rājā rakṣasāṃ prativeditaḥ || 20 ||
[Analyze grammar]

harandāśaratherbhāryāṃ rāmasya janakātmajām |
bhraṣṭābharaṇakauśeyāṃ śokavegaparājitām || 21 ||
[Analyze grammar]

rāmalakṣmaṇayornāma krośantīṃ muktamūrdhajām |
eṣa kālātyayastāvaditi vākyavidāṃ varaḥ || 22 ||
[Analyze grammar]

etamarthaṃ samagraṃ me supārśvaḥ pratyavedayat |
tacchrutvāpi hi me buddhirnāsīt kā cit parākrame || 23 ||
[Analyze grammar]

apakṣo hi kathaṃ pakṣī karma kiṃ cidupakramet |
yattu śakyaṃ mayā kartuṃ vāgbuddhiguṇavartinā || 24 ||
[Analyze grammar]

śrūyatāṃ tat pravakṣyāmi bhavatāṃ pauruṣāśrayam |
vāṅmatibhyāṃ hi sārveṣāṃ kariṣyāmi priyaṃ hi vaḥ |
yaddhi dāśaratheḥ kāryaṃ mama tannātra saṃśayaḥ || 25 ||
[Analyze grammar]

te bhavanto matiśreṣṭhā balavanto manasvinaḥ |
sahitāḥ kapirājena devairapi durāsadāḥ || 26 ||
[Analyze grammar]

rāmalakṣmaṇabāṇāśca niśitāḥ kaṅkapatriṇaḥ |
trayāṇāmapi lokānāṃ paryāptāstrāṇanigrahe || 27 ||
[Analyze grammar]

kāmaṃ khalu daśagrīvastejobalasamanvitaḥ |
bhavatāṃ tu samarthānāṃ na kiṃ cidapi duṣkaram || 28 ||
[Analyze grammar]

tadalaṃ kālasaṃgena kriyatāṃ buddhiniścayaḥ |
na hi karmasu sajjante buddhimanto bhavadvidhāḥ || 29 ||
[Analyze grammar]