Chapter 55

upaviṣṭāstu te sarve yasminprāyaṃ giristhale |
harayo gṛdhrarājaśca taṃ deśamupacakrame || 1 ||
[Analyze grammar]

sāmpātirnāma nāmnā tu cirajīvī vihaṃgamaḥ |
bhrātā jaṭāyuṣaḥ śrīmānprakhyātabalapauruṣaḥ || 2 ||
[Analyze grammar]

kandarādabhiniṣkramya sa vindhyasya mahāgireḥ |
upaviṣṭān harīndṛṣṭvā hṛṣṭātmā giramabravīt || 3 ||
[Analyze grammar]

vidhiḥ kila naraṃ loke vidhānenānuvartate |
yathāyaṃ vihito bhakṣyaścirānmahyamupāgataḥ || 4 ||
[Analyze grammar]

paramparāṇāṃ bhakṣiṣye vānarāṇāṃ mṛtaṃ mṛtam |
uvācaivaṃ vacaḥ pakṣī tānnirīkṣya plavaṃgamān || 5 ||
[Analyze grammar]

tasya tadvacanaṃ śrutvā bhakṣalubdhasya pakṣiṇaḥ |
aṅgadaḥ paramāyasto hanūmantamathābravīt || 6 ||
[Analyze grammar]

paśya sītāpadeśena sākṣādvaivasvato yamaḥ |
imaṃ deśamanuprāpto vānarāṇāṃ vipattaye || 7 ||
[Analyze grammar]

rāmasya na kṛtaṃ kāryaṃ rājño na ca vacaḥ kṛtam |
harīṇāmiyamajñātā vipattiḥ sahasāgatā || 8 ||
[Analyze grammar]

vaidehyāḥ priyakāmena kṛtaṃ karma jaṭāyuṣā |
gṛdhrarājena yattatra śrutaṃ vastadaśeṣataḥ || 9 ||
[Analyze grammar]

tathā sarvāṇi bhūtāni tiryagyonigatānyapi |
priyaṃ kurvanti rāmasya tyaktvā prāṇānyathā vayam || 10 ||
[Analyze grammar]

rāghavārthe pariśrāntā vayaṃ saṃtyaktajīvitāḥ |
kāntārāṇi prapannāḥ sma na ca paśyāma maithilīm || 11 ||
[Analyze grammar]

sa sukhī gṛdhrarājastu rāvaṇena hato raṇe |
muktaśca sugrīvabhayādgataśca paramāṃ gatim || 12 ||
[Analyze grammar]

jaṭāyuṣo vināśena rājño daśarathasya ca |
haraṇena ca vaidehyāḥ saṃśayaṃ harayo gatāḥ || 13 ||
[Analyze grammar]

rāmalakṣmaṇayorvāsāmaraṇye saha sītayā |
rāghavasya ca bāṇena vālinaśca tathā vadhaḥ || 14 ||
[Analyze grammar]

rāmakopādaśeṣāṇāṃ rākṣasānāṃ tathā vadhaḥ |
kaikeyyā varadānena idaṃ hi vikṛtaṃ kṛtam || 15 ||
[Analyze grammar]

tattu śrutvā tadā vākyamaṅgadasya mukhodgatam |
abravīdvacanaṃ gṛdhrastīkṣṇatuṇḍo mahāsvanaḥ || 16 ||
[Analyze grammar]

ko'yaṃ girā ghoṣayati prāṇaiḥ priyatarasya me |
jaṭāyuṣo vadhaṃ bhrātuḥ kampayanniva me manaḥ || 17 ||
[Analyze grammar]

kathamāsījjanasthāne yuddhaṃ rākṣasagṛdhrayoḥ |
nāmadheyamidaṃ bhrātuścirasyādya mayā śrutam || 18 ||
[Analyze grammar]

yavīyaso guṇajñasya ślāghanīyasya vikramaiḥ |
tadiccheyamahaṃ śrotuṃ vināśaṃ vānararṣabhāḥ || 19 ||
[Analyze grammar]

bhrāturjaṭāyuṣastasya janasthānanivāsinaḥ |
tasyaiva ca mama bhrātuḥ sakhā daśarathaḥ katham |
yasya rāmaḥ priyaḥ putro jyeṣṭho gurujanapriyaḥ || 20 ||
[Analyze grammar]

sūryāṃśudagdhapakṣatvānna śaknomi visarpitum |
iccheyaṃ parvatādasmādavatartumariṃdamāḥ || 21 ||
[Analyze grammar]