Chapter 48

athāṅgadastadā sarvān vānarānidamabravīt |
pariśrānto mahāprājñaḥ samāśvāsya śanairvacaḥ || 1 ||
[Analyze grammar]

vanāni girayo nadyo durgāṇi gahanāni ca |
daryo giriguhāścaiva vicitā naḥ samantataḥ || 2 ||
[Analyze grammar]

tatra tatra sahāsmābhirjānakī na ca dṛśyate |
tadvā rakṣo hṛtā yena sītā surasutopamā || 3 ||
[Analyze grammar]

kālaśca no mahānyātaḥ sugrīvaścograśāsanaḥ |
tasmādbhavantaḥ sahitā vicinvantu samantataḥ || 4 ||
[Analyze grammar]

vihāya tandrīṃ śokaṃ ca nidrāṃ caiva samutthitām |
vicinudhvaṃ yathā sītāṃ paśyāmo janakātmajām || 5 ||
[Analyze grammar]

anirvedaṃ ca dākṣyaṃ ca manasaścāparājayam |
kāryasiddhikarāṇyāhustasmādetadbravīmyaham || 6 ||
[Analyze grammar]

adyāpīdaṃ vanaṃ durgaṃ vicinvantu vanaukasaḥ |
khedaṃ tyaktvā punaḥ sarvaṃ vanametadvicīyatām || 7 ||
[Analyze grammar]

avaśyaṃ kriyamāṇasya dṛśyate karmaṇaḥ phalam |
alaṃ nirvedamāgamya na hi no malinaṃ kṣamam || 8 ||
[Analyze grammar]

sugrīvaḥ krodhano rājā tīkṣṇadaṇḍaśca vānarāḥ |
bhetavyaṃ tasya satataṃ rāmasya ca mahātmanaḥ || 9 ||
[Analyze grammar]

hitārthametaduktaṃ vaḥ kriyatāṃ yadi rocate |
ucyatāṃ vā kṣamaṃ yannaḥ sarveṣāmeva vānarāḥ || 10 ||
[Analyze grammar]

aṅgadasya vacaḥ śrutvā vacanaṃ gandhamādanaḥ |
uvācāvyaktayā vācā pipāsā śramakhinnayā || 11 ||
[Analyze grammar]

sadṛśaṃ khalu vo vākyamaṅgado yaduvāca ha |
hitaṃ caivānukūlaṃ ca kriyatāmasya bhāṣitam || 12 ||
[Analyze grammar]

punarmārgāmahe śailān kandarāṃśca darīstathā |
kānanāni ca śūnyāni giriprasravaṇāni ca || 13 ||
[Analyze grammar]

yathoddiṣṭhāni sarvāṇi sugrīveṇa mahātmanā |
vicinvantu vanaṃ sarve giridurgāṇi sarvaśaḥ || 14 ||
[Analyze grammar]

tataḥ samutthāya punarvānarāste mahābalāḥ |
vindhyakānanasaṃkīrṇāṃ vicerurdakṣiṇāṃ diśam || 15 ||
[Analyze grammar]

te śāradābhrapratimaṃ śrīmadrajataparvatam |
śṛṅgavantaṃ darīvantamadhiruhya ca vānarāḥ || 16 ||
[Analyze grammar]

tatra lodhravanaṃ ramyaṃ saptaparṇavanāni ca |
vicinvanto harivarāḥ sītādarśanakāṅkṣiṇaḥ || 17 ||
[Analyze grammar]

tasyāgramadhirūḍhāste śrāntā vipulavikramāḥ |
na paśyanti sma vaidehīṃ rāmasya mahiṣīṃ priyām || 18 ||
[Analyze grammar]

te tu dṛṣṭigataṃ kṛtvā taṃ śailaṃ bahukandaram |
avārohanta harayo vīkṣamāṇāḥ samantataḥ || 19 ||
[Analyze grammar]

avaruhya tato bhūmiṃ śrāntā vigatacetasaḥ |
sthitvā muhūrtaṃ tatrātha vṛkṣamūlamupāśritāḥ || 20 ||
[Analyze grammar]

te muhūrtaṃ samāśvastāḥ kiṃ cidbhagnapariśramāḥ |
punarevodyatāḥ kṛtsnāṃ mārgituṃ dakṣiṇāṃ diśam || 21 ||
[Analyze grammar]

hanumatpramukhāste tu prasthitāḥ plavagarṣabhāḥ |
vindhyamevāditastāvadviceruste samantataḥ || 22 ||
[Analyze grammar]