Chapter 47

sahatārāṅgadābhyāṃ tu gatvā sa hanumān kapiḥ |
sugrīveṇa yathoddiṣṭaṃ taṃ deśamupacakrame || 1 ||
[Analyze grammar]

sa tu dūramupāgamya sarvaistaiḥ kapisattamaiḥ |
vicinoti sma vindhyasya guhāśca gahanāni ca || 2 ||
[Analyze grammar]

parvatāgrānnadīdurgān sarāṃsi vipulāndrumān |
vṛkṣaṣaṇḍāṃśca vividhānparvatān ghanapādapān || 3 ||
[Analyze grammar]

anveṣamāṇāste sarve vānarāḥ sarvato diśam |
na sītāṃ dadṛśurvīrā maithilīṃ janakātmajām || 4 ||
[Analyze grammar]

te bhakṣayanto mūlāni phalāni vividhāni ca |
anveṣamāṇā durdharṣā nyavasaṃstatra tatra ha |
sa tu deśo duranveṣo guhāgahanavānmahān || 5 ||
[Analyze grammar]

tyaktvā tu taṃ tadā deśaṃ sarve vai hariyūthapāḥ |
deśamanyaṃ durādharṣaṃ viviśuścākutobhayāḥ || 6 ||
[Analyze grammar]

yatra vandhyaphalā vṛkṣā vipuṣpāḥ parṇavarjitāḥ |
nistoyāḥ sarito yatra mūlaṃ yatra sudurlabham || 7 ||
[Analyze grammar]

na santi mahiṣā yatra na mṛgā na ca hastinaḥ |
śārdūlāḥ pakṣiṇo vāpi ye cānye vanagocarāḥ || 8 ||
[Analyze grammar]

snigdhapatrāḥ sthale yatra padminyaḥ phullapaṅkajāḥ |
prekṣaṇīyāḥ sugandhāśca bhramaraiścāpi varjitāḥ || 9 ||
[Analyze grammar]

kaṇḍurnāma mahābhāgaḥ satyavādī tapodhanaḥ |
maharṣiḥ paramāmarṣī niyamairduṣpradharṣaṇaḥ || 10 ||
[Analyze grammar]

tasya tasmin vane putro bālako daśavārṣikaḥ |
pranaṣṭo jīvitāntāya kruddhastatra mahāmuniḥ || 11 ||
[Analyze grammar]

tena dharmātmanā śaptaṃ kṛtsnaṃ tatra mahadvanam |
aśaraṇyaṃ durādharṣaṃ mṛgapakṣivivarjitam || 12 ||
[Analyze grammar]

tasya te kānanāntāṃstu girīṇāṃ kandarāṇi ca |
prabhavāni nadīnāṃca vicinvanti samāhitāḥ || 13 ||
[Analyze grammar]

tatra cāpi mahātmāno nāpaśyañjanakātmajām |
hartāraṃ rāvaṇaṃ vāpi sugrīvapriyakāriṇaḥ || 14 ||
[Analyze grammar]

te praviśya tu taṃ bhīmaṃ latāgulmasamāvṛtam |
dadṛśuḥ krūrakarmāṇamasuraṃ suranirbhayam || 15 ||
[Analyze grammar]

taṃ dṛṣṭvā vanarā ghoraṃ sthitaṃ śailamivāparam |
gāḍhaṃ parihitāḥ sarve dṛṣṭvā taṃ parvatopamam || 16 ||
[Analyze grammar]

so'pi tān vānarān sarvānnaṣṭāḥ sthetyabravīdbalī |
abhyadhāvata saṃkruddho muṣṭimudyamya saṃhitam || 17 ||
[Analyze grammar]

tamāpatantaṃ sahasā vāliputro'ṅgadastadā |
rāvaṇo'yamiti jñātvā talenābhijaghāna ha || 18 ||
[Analyze grammar]

sa vāliputrābhihato vaktrācchoṇitamudvaman |
asuro nyapatadbhūmau paryasta iva parvataḥ || 19 ||
[Analyze grammar]

te tu tasminnirucchvāse vānarā jitakāśinaḥ |
vyacinvanprāyaśastatra sarvaṃ tadgirigahvaram || 20 ||
[Analyze grammar]

vicitaṃ tu tataḥ kṛtvā sarve te kānanaṃ punaḥ |
anyadevāparaṃ ghoraṃ viviśurgirigahvaram || 21 ||
[Analyze grammar]

te vicintya punaḥ khinnā viniṣpatya samāgatāḥ |
ekānte vṛkṣamūle tu niṣedurdīnamānasāḥ || 22 ||
[Analyze grammar]