Chapter 42

tataḥ saṃdiśya sugrīvaḥ śvaśuraṃ paścimāṃ diśam |
vīraṃ śatabaliṃ nāma vānaraṃ vānararṣabhaḥ || 1 ||
[Analyze grammar]

uvāca rājā mantrajñaḥ sarvavānarasaṃmatam |
vākyamātmahitaṃ caiva rāmasya ca hitaṃ tathā || 2 ||
[Analyze grammar]

vṛtaḥ śatasahasreṇa tvadvidhānāṃ vanaukasām |
vaivasvata sutaiḥ sārdhaṃ pratiṣṭhasva svamantribhiḥ || 3 ||
[Analyze grammar]

diśaṃ hyudīcīṃ vikrāntāṃ himaśailāvataṃsakām |
sarvataḥ parimārgadhvaṃ rāmapatnīmaninditām || 4 ||
[Analyze grammar]

asmin kārye vinivṛtte kṛte dāśaratheḥ priye |
ṛṇānmuktā bhaviṣyāmaḥ kṛtārthārthavidāṃ varāḥ || 5 ||
[Analyze grammar]

kṛtaṃ hi priyamasmākaṃ rāghaveṇa mahātmanā |
tasya cet pratikāro'sti saphalaṃ jīvitaṃ bhavet || 6 ||
[Analyze grammar]

etāṃ buddhiṃ samāsthāya dṛśyate jānakī yathā |
tathā bhavadbhiḥ kartavyamasmatpriyahitaiṣibhiḥ || 7 ||
[Analyze grammar]

ayaṃ hi sarvabhūtānāṃ mānyastu narasattamaḥ |
asmāsu cāgataprītī rāmaḥ parapuraṃjayaḥ || 8 ||
[Analyze grammar]

imāni vanadurgāṇi nadyaḥ śailāntarāṇi ca |
bhavantaḥ parimārgaṃstu buddhivikramasaṃpadā || 9 ||
[Analyze grammar]

tatra mlecchānpulindāṃśca śūrasenāṃstathaiva ca |
prasthālānbharatāṃścaiva kurūṃśca saha madrakaiḥ || 10 ||
[Analyze grammar]

kāmbojānyavanāṃścaiva śakānāraṭṭakānapi |
bāhlīkānṛṣikāṃścaiva pauravānatha ṭaṅkaṇān || 11 ||
[Analyze grammar]

cīnānparamacīnāṃśca nīhārāṃśca punaḥ punaḥ |
anviṣya daradāṃścaiva himavantaṃ vicinvatha || 12 ||
[Analyze grammar]

lodhrapadmakaṣaṇḍeṣu devadāruvaneṣu ca |
rāvaṇaḥ saha vaidehya mārgitavyastatastataḥ || 13 ||
[Analyze grammar]

tataḥ somāśramaṃ gatvā devagandharvasevitam |
kālaṃ nāma mahāsānuṃ parvataṃ taṃ gamiṣyatha || 14 ||
[Analyze grammar]

mahatsu tasya śṛṅgeṣu nirdareṣu guhāsu ca |
vicinudhvaṃ mahābhāgāṃ rāmapatnīṃ yaśasvinīm || 15 ||
[Analyze grammar]

tamatikramya śailendraṃ hemavargaṃ mahāgirim |
tataḥ sudarśanaṃ nāma parvataṃ gantumarhatha || 16 ||
[Analyze grammar]

tasya kānanaṣaṇḍeṣu nirdareṣu guhāsu ca |
rāvaṇaḥ saha vaidehyā mārgitavyastatastataḥ || 17 ||
[Analyze grammar]

tamatikramya cākāśaṃ sarvataḥ śatayojanam |
aparvatanadī vṛkṣaṃ sarvasattvavivarjitam || 18 ||
[Analyze grammar]

taṃ tu śīghramatikramya kāntāraṃ romaharṣaṇam |
kailāsaṃ pāṇḍuraṃ śailaṃ prāpya hṛṣṭā bhaviṣyatha || 19 ||
[Analyze grammar]

tatra pāṇḍurameghābhaṃ jāmbūnadapariṣkṛtam |
kuberabhavanaṃ divyaṃ nirmitaṃ viśvakarmaṇā || 20 ||
[Analyze grammar]

viśālā nalinī yatra prabhūtakamalotpalā |
haṃsakāraṇḍavākīrṇā apsarogaṇasevitā || 21 ||
[Analyze grammar]

tatra vaiśravaṇo rājā sarvabhūtanamaskṛtaḥ |
dhanado ramate śrīmān guhyakaiḥ saha yakṣarāṭ || 22 ||
[Analyze grammar]

tasya candranikaśeṣu parvateṣu guhāsu ca |
rāvaṇaḥ saha vaidehyā mārgitavyastatastataḥ || 23 ||
[Analyze grammar]

krauñcaṃ tu girimāsādya bilaṃ tasya sudurgamam |
apramattaiḥ praveṣṭavyaṃ duṣpraveśaṃ hi tat smṛtam || 24 ||
[Analyze grammar]

vasanti hi mahātmānastatra sūryasamaprabhāḥ |
devairapyarcitāḥ samyagdevarūpā maharṣayaḥ || 25 ||
[Analyze grammar]

krauñcasya tu guhāścānyāḥ sānūni śikharāṇi ca |
nirdarāśca nitambāśca vicetavyāstatastataḥ || 26 ||
[Analyze grammar]

krauñcasya śikharaṃ cāpi nirīkṣya ca tatastataḥ |
avṛkṣaṃ kāmaśailaṃ ca mānasaṃ vihagālayam || 27 ||
[Analyze grammar]

na gatistatra bhūtānāṃ devadānavarakṣasām |
sa ca sarvairvicetavyaḥ sasānuprasthabhūdharaḥ || 28 ||
[Analyze grammar]

krauñcaṃ girimatikramya maināko nāma parvataḥ |
mayasya bhavanaṃ tatra dānavasya svayaṃ kṛtam || 29 ||
[Analyze grammar]

mainākastu vicetavyaḥ sasānuprasthakandaraḥ |
strīṇāmaśvamukhīnāṃ ca niketāstatra tatra tu || 30 ||
[Analyze grammar]

taṃ deśaṃ samatikramya āśramaṃ siddhasevitam |
siddhā vaikhānasāstatra vālakhilyāśca tāpasāḥ || 31 ||
[Analyze grammar]

vandyāste tu tapaḥsiddhāstāpasā vītakalmaṣāḥ |
praṣṭavyāścāpi sītāyāḥ pravṛttaṃ vinayānvitaiḥ || 32 ||
[Analyze grammar]

hemapuṣkarasaṃchannaṃ tatra vaikhānasaṃ saraḥ |
taruṇādityasaṃkāśairhaṃsairvicaritaṃ śubhaiḥ || 33 ||
[Analyze grammar]

aupavāhyaḥ kuberasya sarvabhauma iti smṛtaḥ |
gajaḥ paryeti taṃ deśaṃ sadā saha kareṇubhiḥ || 34 ||
[Analyze grammar]

tat sāraḥ samatikramya naṣṭacandradivākaram |
anakṣatragaṇaṃ vyoma niṣpayodamanādimat || 35 ||
[Analyze grammar]

gabhastibhirivārkasya sa tu deśaḥ prakāśate |
viśrāmyadbhistapaḥ siddhairdevakalpaiḥ svayamprabhaiḥ || 36 ||
[Analyze grammar]

taṃ tu deśamatikramya śailodā nāma nimnagā |
ubhayostīrayoryasyāḥ kīcakā nāma veṇavaḥ || 37 ||
[Analyze grammar]

te nayanti paraṃ tīraṃ siddhānpratyānayanti ca |
uttarāḥ kuravastatra kṛtapuṇyapratiśriyāḥ || 38 ||
[Analyze grammar]

tataḥ kāñcanapadmābhiḥ padminībhiḥ kṛtodakāḥ |
nīlavaidūryapatrāḍhyā nadyastatra sahasraśaḥ || 39 ||
[Analyze grammar]

raktotpalavanaiścātra maṇḍitāśca hiraṇmayaiḥ |
taruṇādityasadṛśairbhānti tatra jalāśayāḥ || 40 ||
[Analyze grammar]

mahārhamaṇipatraiśca kāñcanaprabha kesaraiḥ |
nīlotpalavanaiścitraiḥ sa deśaḥ sarvatovṛtaḥ || 41 ||
[Analyze grammar]

nistulābhiśca muktābhirmaṇibhiśca mahādhanaiḥ |
udbhūtapulināstatra jātarūpaiśca nimnagāḥ || 42 ||
[Analyze grammar]

sarvaratnamayaiścitrairavagāḍhā nagottamaiḥ |
jātarūpamayaiścāpi hutāśanasamaprabhaiḥ || 43 ||
[Analyze grammar]

nityapuṣpaphalāścātra nagāḥ patrarathākulāḥ |
divyagandharasasparśāḥ sarvakāmān sravanti ca || 44 ||
[Analyze grammar]

nānākārāṇi vāsāṃsi phalantyanye nagottamāḥ |
muktāvaidūryacitrāṇi bhūṣaṇāni tathaiva ca || 45 ||
[Analyze grammar]

strīṇāṃ yānyanurūpāṇi puruṣāṇāṃ tathaiva ca |
sarvartusukhasevyāni phalantyanye nagottamāḥ || 46 ||
[Analyze grammar]

mahārhāṇi vicitrāṇi haimānyanye nagottamāḥ |
śayanāni prasūyante citrāstāraṇavanti ca || 47 ||
[Analyze grammar]

manaḥkāntāni mālyāni phalantyatrāpare drumāḥ |
pānāni ca mahārhāṇi bhakṣyāṇi vividhāni ca || 48 ||
[Analyze grammar]

striyaśca guṇasaṃpannā rūpayauvanalakṣitāḥ |
gandharvāḥ kiṃnarā siddhā nāgā vidyādharāstathā |
ramante sahitāstatra nārībhirbhāskaraprabhāḥ || 49 ||
[Analyze grammar]

sarve sukṛtakarmāṇaḥ sarve ratiparāyaṇāḥ |
sarve kāmārthasahitā vasanti saha yoṣitaḥ || 50 ||
[Analyze grammar]

gītavāditranirghoṣaḥ sotkṛṣṭahasitasvanaḥ |
śrūyate satataṃ tatra sarvabhūtamanoharaḥ || 51 ||
[Analyze grammar]

tatra nāmuditaḥ kaścinnāsti kaścidasatpriyaḥ |
ahanyahani vardhante guṇāstatra manoramāḥ || 52 ||
[Analyze grammar]

samatikramya taṃ deśamuttarastoyasāṃ nidhiḥ |
tatra somagirirnāma madhye hemamayo mahān || 53 ||
[Analyze grammar]

indralokagatā ye ca brahmalokagatāśca ye |
devāstaṃ samavekṣante girirājaṃ divaṃ gatam || 54 ||
[Analyze grammar]

sa tu deśo visūryo'pi tasya bhāsā prakāśate |
sūryalakṣmyābhivijñeyastapaseva vivasvatā || 55 ||
[Analyze grammar]

bhagavānapi viśvātmā śambhurekādaśātmakaḥ |
brahmā vasati deveśo brahmarṣiparivāritaḥ || 56 ||
[Analyze grammar]

na kathaṃ cana gantavyaṃ kurūṇāmuttareṇa vaḥ |
anyeṣāmapi bhūtānāṃ nātikrāmati vai gatiḥ || 57 ||
[Analyze grammar]

sā hi somagirirnāma devānāmapi durgamaḥ |
tamālokya tataḥ kṣipramupāvartitumarhatha || 58 ||
[Analyze grammar]

etāvadvānaraiḥ śakyaṃ gantuṃ vānarapuṃgavāḥ |
abhāskaramamaryādaṃ na jānīmastataḥ param || 59 ||
[Analyze grammar]

sarvametadvicetavyaṃ yanmayā parikīrtitam |
yadanyadapi noktaṃ ca tatrāpi kriyatāṃ matiḥ || 60 ||
[Analyze grammar]

tataḥ kṛtaṃ dāśarathermahat priyaṃ mahattaraṃ cāpi tato mama priyam |
kṛtaṃ bhaviṣyatyanilānalopamā videhajā darśanajena karmaṇā || 61 ||
[Analyze grammar]

tataḥ kṛtārthāḥ sahitāḥ sabāndhavā mayārcitāḥ sarvaguṇairmanoramaiḥ |
cariṣyathorvīṃ pratiśāntaśatravaḥ sahapriyā bhūtadharāḥ plavaṃgamāḥ || 62 ||
[Analyze grammar]