Chapter 25

tataḥ śokābhisaṃtaptaṃ sugrīvaṃ klinnavāsanam |
śākhāmṛgamahāmātrāḥ parivāryopatasthire || 1 ||
[Analyze grammar]

abhigamya mahābāhuṃ rāmamakliṣṭakāriṇam |
sthitāḥ prāñjalayaḥ sarve pitāmahamivarṣayaḥ || 2 ||
[Analyze grammar]

tataḥ kāñcanaśailābhastaruṇārkanibhānanaḥ |
abravīt prāñjalirvākyaṃ hanumānmārutātmajaḥ || 3 ||
[Analyze grammar]

bhavatprasādāt sugrīvaḥ pitṛpaitāmahaṃ mahat |
vānarāṇāṃ suduṣprāpaṃ prāpto rājyamidaṃ prabho || 4 ||
[Analyze grammar]

bhavatā samanujñātaḥ praviśya nagaraṃ śubham |
saṃvidhāsyati kāryāṇi sarvāṇi sasuhṛjjanaḥ || 5 ||
[Analyze grammar]

snāto'yaṃ vividhairgandhairauṣadhaiśca yathāvidhi |
arcayiṣyati ratnaiśca mālyaiśca tvāṃ viśeṣataḥ || 6 ||
[Analyze grammar]

imāṃ giriguhāṃ ramyāmabhigantumito'rhasi |
kuruṣva svāmi saṃbandhaṃ vānarān saṃpraharṣayan || 7 ||
[Analyze grammar]

evamukto hanumatā rāghavaḥ paravīrahā |
pratyuvāca hanūmantaṃ buddhimān vākyakovidaḥ || 8 ||
[Analyze grammar]

caturdaśasamāḥ saumya grāmaṃ vā yadi vā puram |
na pravekṣyāmi hanumanpiturnirdeśapālakaḥ || 9 ||
[Analyze grammar]

susamṛddhāṃ guhāṃ divyāṃ sugrīvo vānararṣabhaḥ |
praviṣṭo vidhivadvīraḥ kṣipraṃ rājye'bhiṣicyatām || 10 ||
[Analyze grammar]

evamuktvā hanūmantaṃ rāmaḥ sugrīvamabravīt |
imamapyaṅgadaṃ vīra yauvarājye'bhiṣecaya || 11 ||
[Analyze grammar]

pūrvo'yaṃ vārṣiko māsaḥ śrāvaṇaḥ salilāgamaḥ |
pravṛttāḥ saumya catvāro māsā vārṣikasaṃjñitāḥ || 12 ||
[Analyze grammar]

nāyamudyogasamayaḥ praviśa tvaṃ purīṃ śubhām |
asmin vatsyāmyahaṃ saumya parvate sahalakṣmaṇaḥ || 13 ||
[Analyze grammar]

iyaṃ giriguhā ramyā viśālā yuktamārutā |
prabhūtasalilā saumya prabhūtakamalotpalā || 14 ||
[Analyze grammar]

kārtike samanuprāpte tvaṃ rāvaṇavadhe yata |
eṣa naḥ samayaḥ saumya praviśa tvaṃ svamālayam |
abhiṣiñcasva rājye ca suhṛdaḥ saṃpraharṣaya || 15 ||
[Analyze grammar]

iti rāmābhyanujñātaḥ sugrīvo vānararṣabhaḥ |
praviveśa purīṃ ramyāṃ kiṣkindhāṃ vālipālitām || 16 ||
[Analyze grammar]

taṃ vānarasahasrāṇi praviṣṭaṃ vānareśvaram |
abhivādya prahṛṣṭāni sarvataḥ paryavārayan || 17 ||
[Analyze grammar]

tataḥ prakṛtayaḥ sarvā dṛṣṭvā harigaṇeśvaram |
praṇamya mūrdhnā patitā vasudhāyāṃ samāhitāḥ || 18 ||
[Analyze grammar]

sugrīvaḥ prakṛtīḥ sarvāḥ saṃbhāṣyotthāpya vīryavān |
bhrāturantaḥpuraṃ saumyaṃ praviveśa mahābalaḥ || 19 ||
[Analyze grammar]

praviśya tvabhiniṣkrāntaṃ sugrīvaṃ vānararṣabham |
abhyaṣiñcanta suhṛdaḥ sahasrākṣamivāmarāḥ || 20 ||
[Analyze grammar]

tasya pāṇḍuramājahruśchatraṃ hemapariṣkṛtam |
śukle ca bālavyajane hemadaṇḍe yaśaskare || 21 ||
[Analyze grammar]

tathā sarvāṇi ratnāni sarvabījauṣadhāni ca |
sakṣīrāṇāṃ ca vṛkṣāṇāṃ prarohān kusumāni ca || 22 ||
[Analyze grammar]

śuklāni caiva vastrāṇi śvetaṃ caivānulepanam |
sugandhīni ca mālyāni sthalajānyambujāni ca || 23 ||
[Analyze grammar]

candanāni ca divyāni gandhāṃśca vividhānbahūn |
akṣataṃ jātarūpaṃ ca priyaṅgumadhusarpiṣī || 24 ||
[Analyze grammar]

dadhicarma ca vaiyāghraṃ vārāhī cāpyupānahau |
samālambhanamādāya rocanāṃ samanaḥśilām |
ājagmustatra muditā varāḥ kanyāstu ṣoḍaśa || 25 ||
[Analyze grammar]

tataste vānaraśreṣṭhaṃ yathākālaṃ yathāvidhi |
ratnairvastraiśca bhakṣyaiśca toṣayitvā dvijarṣabhān || 26 ||
[Analyze grammar]

tataḥ kuśaparistīrṇaṃ samiddhaṃ jātavedasaṃ |
mantrapūtena haviṣā hutvā mantravido janāḥ || 27 ||
[Analyze grammar]

tato hemapratiṣṭhāne varāstaraṇasaṃvṛte |
prāsādaśikhare ramye citramālyopaśobhite || 28 ||
[Analyze grammar]

prāṅmukhaṃ vividhairmantraiḥ sthāpayitvā varāsane |
nadīnadebhyaḥ saṃhṛtya tīrthebhyaśca samantataḥ || 29 ||
[Analyze grammar]

āhṛtya ca samudrebhyaḥ sarvebhyo vānararṣabhāḥ |
apaḥ kanakakumbheṣu nidhāya vimalāḥ śubhāḥ || 30 ||
[Analyze grammar]

śubhairvṛṣabhaśṛṅgaiśca kalaśaiścāpi kāñcanaiḥ |
śāstradṛṣṭena vidhinā maharṣivihitena ca || 31 ||
[Analyze grammar]

gajo gavākṣo gavayaḥ śarabho gandhamādanaḥ |
maindaśca dvividaścaiva hanūmāñjāmbavānnalaḥ || 32 ||
[Analyze grammar]

abhyaṣiñcanta sugrīvaṃ prasannena sugandhinā |
salilena sahasrākṣaṃ vasavo vāsavaṃ yathā || 33 ||
[Analyze grammar]

abhiṣikte tu sugrīve sarve vānarapuṃgavāḥ |
pracukruśurmahātmāno hṛṣṭāstatra sahasraśaḥ || 34 ||
[Analyze grammar]

rāmasya tu vacaḥ kurvan sugrīvo haripuṃgavaḥ |
aṅgadaṃ saṃpariṣvajya yauvarājye'bhiṣecayat || 35 ||
[Analyze grammar]

aṅgade cābhiṣikte tu sānukrośāḥ plavaṃgamāḥ |
sādhu sādhviti sugrīvaṃ mahātmāno'bhyapūjayan || 36 ||
[Analyze grammar]

hṛṣṭapuṣṭajanākīrṇā patākādhvajaśobhitā |
babhūva nagarī ramyā kṣikindhā girigahvare || 37 ||
[Analyze grammar]

nivedya rāmāya tadā mahātmane mahābhiṣekaṃ kapivāhinīpatiḥ |
rumāṃ ca bhāryāṃ pratilabhya vīryavānavāpa rājyaṃ tridaśādhipo yathā || 38 ||
[Analyze grammar]