Chapter 19

sa vānaramahārājaḥ śayānaḥ śaravikṣataḥ |
pratyukto hetumadvākyairnottaraṃ pratyapadyata || 1 ||
[Analyze grammar]

aśmabhiḥ paribhinnāṅgaḥ pādapairāhato bhṛśam |
rāmabāṇena cākrānto jīvitānte mumoha saḥ || 2 ||
[Analyze grammar]

taṃ bhāryābāṇamokṣeṇa rāmadattena saṃyuge |
hataṃ plavagaśārdūlaṃ tārā śuśrāva vālinam || 3 ||
[Analyze grammar]

sā saputrāpriyaṃ śrutvā vadhaṃ bhartuḥ sudāruṇam |
niṣpapāta bhṛśaṃ trastā vividhādgirigahvarāt || 4 ||
[Analyze grammar]

ye tvaṅgadaparīvārā vānarā hi mahābalāḥ |
te sakārmukamālokya rāmaṃ trastāḥ pradudruvuḥ || 5 ||
[Analyze grammar]

sā dadarśa tatastrastān harīnāpatato drutam |
yūthādiva paribhraṣṭānmṛgānnihatayūthapān || 6 ||
[Analyze grammar]

tānuvāca samāsādya duḥkhitānduḥkhitā satī |
rāma vitrāsitān sarvānanubaddhāniveṣubhiḥ || 7 ||
[Analyze grammar]

vānarā rājasiṃhasya yasya yūyaṃ puraḥsarāḥ |
taṃ vihāya suvitrastāḥ kasmāddravata durgatāḥ || 8 ||
[Analyze grammar]

rājyahetoḥ sa cedbhrātā bhrātā raudreṇa pātitaḥ |
rāmeṇa prasṛtairdūrānmārgaṇairdūra pātibhiḥ || 9 ||
[Analyze grammar]

kapipatnyā vacaḥ śrutvā kapayaḥ kāmarūpiṇaḥ |
prāptakālamaviśliṣṭamūcurvacanamaṅganām || 10 ||
[Analyze grammar]

jīva putre nivartasya putraṃ rakṣasva cāndagam |
antako rāma rūpeṇa hatvā nayati vālinam || 11 ||
[Analyze grammar]

kṣiptān vṛkṣān samāvidhya vipulāśca śilāstathā |
vālī vajrasamairbāṇairvajreṇeva nipātitaḥ || 12 ||
[Analyze grammar]

abhidrutamidaṃ sarvaṃ vidrutaṃ prasṛtaṃ balam |
asminplavagaśārdūle hate śakrasamaprabhe || 13 ||
[Analyze grammar]

rakṣyatāṃ nagaraṃ śūrairaṅgadaścābhiṣicyatām |
padasthaṃ vālinaḥ putraṃ bhajiṣyanti plavaṃgamāḥ || 14 ||
[Analyze grammar]

atha vā ruciraṃ sthānamiha te rucirānane |
āviśanti hi durgāṇi kṣipramadyaiva vānarāḥ || 15 ||
[Analyze grammar]

abhāryāḥ saha bhāryāśca santyatra vanacāriṇaḥ |
lubdhebhyo viprayuktebhyaḥ svebhyo nastumulaṃ bhayam || 16 ||
[Analyze grammar]

alpāntaragatānāṃ tu śrutvā vacanamaṅganā |
ātmanaḥ pratirūpaṃ sā babhāṣe cāruhāsinī || 17 ||
[Analyze grammar]

putreṇa mama kiṃ kāryaṃ kiṃ rājyena kimātmanā |
kapisiṃhe mahābhāge tasminbhartari naśyati || 18 ||
[Analyze grammar]

pādamūlaṃ gamiṣyāmi tasyaivāhaṃ mahātmanaḥ |
yo'sau rāmaprayuktena śareṇa vinipātitaḥ || 19 ||
[Analyze grammar]

evamuktvā pradudrāva rudatī śokakarśitā |
śiraścoraśca bāhubhyāṃ duḥkhena samabhighnatī || 20 ||
[Analyze grammar]

āvrajantī dadarśātha patiṃ nipatitaṃ bhuvi |
hantāraṃ dānavendrāṇāṃ samareṣvanivartinām || 21 ||
[Analyze grammar]

kṣeptāraṃ parvatendrāṇāṃ vajrāṇāmiva vāsavam |
mahāvātasamāviṣṭaṃ mahāmeghaughaniḥsvanam || 22 ||
[Analyze grammar]

śakratulyaparākrāntaṃ vṛṣṭvevoparataṃ ghanam |
nardantaṃ nardatāṃ bhīmaṃ śūraṃ śūreṇa pātitam || 23 ||
[Analyze grammar]

śārdūlenāmiṣasyārthe mṛgarājaṃ yathā hatam |
arcitaṃ sarvalokasya sapatākaṃ savedikam || 24 ||
[Analyze grammar]

nāgahetoḥ suparṇena caityamunmathitaṃ yathā |
avaṣṭabhyāvatiṣṭhantaṃ dadarśa dhanurūrjitam || 25 ||
[Analyze grammar]

rāmaṃ rāmānujaṃ caiva bhartuścaivānujaṃ śubhā |
tānatītya samāsādya bhartāraṃ nihataṃ raṇe || 26 ||
[Analyze grammar]

samīkṣya vyathitā bhūmau saṃbhrāntā nipapāta ha |
supteva punarutthāya āryaputreti krośatī || 27 ||
[Analyze grammar]

ruroda sā patiṃ dṛṣṭvā saṃditaṃ mṛtyudāmabhiḥ |
tāmavekṣya tu sugrīvaḥ krośantīṃ kurarīmiva || 28 ||
[Analyze grammar]

viṣādamagamat kaṣṭaṃ dṛṣṭvā cāṅgadamāgatam || 29 ||
[Analyze grammar]