Chapter 13

ṛśyamūkāt sa dharmātmā kiṣkindhāṃ lakṣmaṇāgrajaḥ |
jagāma sahasugrīvo vālivikramapālitām || 1 ||
[Analyze grammar]

samudyamya mahaccāpaṃ rāmaḥ kāñcanabhūṣitam |
śarāṃścāditya saṃkāśān gṛhītvā raṇasādhakān || 2 ||
[Analyze grammar]

agratastu yayau tasya rāghavasya mahātmanaḥ |
sugrīvaḥ saṃhatagrīvo lakṣmaṇaśca mahābalaḥ || 3 ||
[Analyze grammar]

pṛṣṭhato hanumān vīro nalo nīlaśca vānaraḥ |
tāraścaiva mahātejā hariyūthapa yūthapāḥ || 4 ||
[Analyze grammar]

te vīkṣamāṇā vṛkṣāṃśca puṣpabhārāvalambinaḥ |
prasannāmbuvahāścaiva saritaḥ sāgaraṃ gamāḥ || 5 ||
[Analyze grammar]

kandarāṇi ca śailāṃśca nirjharāṇi guhāstathā |
śikharāṇi ca mukhyāni darīśca priyadarśanāḥ || 6 ||
[Analyze grammar]

vaidūryavimalaiḥ parṇaiḥ padmaiścākāśakuḍmalaiḥ |
śobhitān sajalānmārge taṭākāṃśca vyalokayan || 7 ||
[Analyze grammar]

kāraṇḍaiḥ sārasairhaṃsairvañjūlairjalakukkuṭaiḥ |
cakravākaistathā cānyaiḥ śakunaiḥ pratināditān || 8 ||
[Analyze grammar]

mṛduśaṣpāṅkurāhārānnirbhayān vanagocarān |
carataḥ sarvato'paśyan sthalīṣu hariṇān sthitān || 9 ||
[Analyze grammar]

taṭākavairiṇaścāpi śukladantavibhūṣitān |
ghorānekacarān vanyāndviradān kūlaghātinaḥ || 10 ||
[Analyze grammar]

vane vanacarāṃścānyān khecarāṃśca vihaṃgamān |
paśyantastvaritā jagmuḥ sugrīvavaśavartinaḥ || 11 ||
[Analyze grammar]

teṣāṃ tu gacchatāṃ tatra tvaritaṃ raghunandanaḥ |
drumaṣaṇḍaṃ vanaṃ dṛṣṭvā rāmaḥ sugrīvamabravīt || 12 ||
[Analyze grammar]

eṣa megha ivākāśe vṛkṣaṣaṇḍaḥ prakāśate |
meghasaṃghātavipulaḥ paryantakadalīvṛtaḥ || 13 ||
[Analyze grammar]

kimetajjñātumicchāmi sakhe kautūhalaṃ mama |
kautūhalāpanayanaṃ kartumicchāmyahaṃ tvayā || 14 ||
[Analyze grammar]

tasya tadvacanaṃ śrutvā rāghavasya mahātmanaḥ |
gacchannevācacakṣe'tha sugrīvastanmahadvanam || 15 ||
[Analyze grammar]

etad rāghava vistīrṇamāśramaṃ śramanāśanam |
udyānavanasaṃpannaṃ svādumūlaphalodakam || 16 ||
[Analyze grammar]

atra saptajanā nāma munayaḥ saṃśitavratāḥ |
saptaivāsannadhaḥśīrṣā niyataṃ jalaśāyinaḥ || 17 ||
[Analyze grammar]

saptarātrakṛtāhārā vāyunā vanavāsinaḥ |
divaṃ varṣaśatairyātāḥ saptabhiḥ sakalevarāḥ || 18 ||
[Analyze grammar]

teṣāmevaṃ prabhāvena drumaprākārasaṃvṛtam |
āśramaṃ sudurādharṣamapi sendraiḥ surāsuraiḥ || 19 ||
[Analyze grammar]

pakṣiṇo varjayantyetattathānye vanacāriṇaḥ |
viśanti mohād ye'pyatra nivartante na te punaḥ || 20 ||
[Analyze grammar]

vibhūṣaṇaravāścātra śrūyante sakalākṣarāḥ |
tūryagītasvanāścāpi gandho divyaśca rāghava || 21 ||
[Analyze grammar]

tretāgnayo'pi dīpyante dhūmo hyeṣa pradṛśyate |
veṣṭayanniva vṛkṣāgrān kapotāṅgāruṇo ghanaḥ || 22 ||
[Analyze grammar]

kuru praṇāmaṃ dharmātmaṃstān samuddiśya rāghavaḥ |
lakṣmaṇena saha bhrātrā prayataḥ saṃyatāñjaliḥ || 23 ||
[Analyze grammar]

praṇamanti hi ye teṣāmṛṣīṇāṃ bhāvitātmanām |
na teṣāmaśubhaṃ kiṃ ciccharīre rāma dṛśyate || 24 ||
[Analyze grammar]

tato rāmaḥ saha bhrātrā lakṣmaṇena kṛtāñjaliḥ |
samuddiśya mahātmānastānṛṣīnabhyavādayat || 25 ||
[Analyze grammar]

abhivādya ca dharmātmā rāmo bhrātā ca lakṣmaṇaḥ |
sugrīvo vānarāścaiva jagmuḥ saṃhṛṣṭamānasāḥ || 26 ||
[Analyze grammar]

te gatvā dūramadhvānaṃ tasmāt saptajanāśramāt |
dadṛśustāṃ durādharṣāṃ kiṣkindhāṃ vālipālitām || 27 ||
[Analyze grammar]