Chapter 11

rāmasya vacanaṃ śrutvā harṣapauruṣavardhanam |
sugrīvaḥ pūjayāṃ cakre rāghavaṃ praśaśaṃsa ca || 1 ||
[Analyze grammar]

asaṃśayaṃ prajvalitaistīkṣṇairmarmātigaiḥ śaraiḥ |
tvaṃ daheḥ kupito lokānyugānta iva bhāskaraḥ || 2 ||
[Analyze grammar]

vālinaḥ pauruṣaṃ yattad yacca vīryaṃ dhṛtiśca yā |
tanmamaikamanāḥ śrutvā vidhatsva yadanantaram || 3 ||
[Analyze grammar]

samudrāt paścimāt pūrvaṃ dakṣiṇādapi cottaram |
krāmatyanudite sūrye vālī vyapagataklamaḥ || 4 ||
[Analyze grammar]

agrāṇyāruhya śailānāṃ śikharāṇi mahāntyapi |
ūrdhvamutkṣipya tarasā pratigṛhṇāti vīryavān || 5 ||
[Analyze grammar]

bahavaḥ sāravantaśca vaneṣu vividhā drumāḥ |
vālinā tarasā bhagnā balaṃ prathayatātmanaḥ || 6 ||
[Analyze grammar]

mahiṣo dundubhirnāma kailāsaśikharaprabhaḥ |
balaṃ nāgasahasrasya dhārayāmāsa vīryavān || 7 ||
[Analyze grammar]

vīryotsekena duṣṭātmā varadānācca mohitaḥ |
jagāma sa mahākāyaḥ samudraṃ saritāṃ patim || 8 ||
[Analyze grammar]

ūrmimantamatikramya sāgaraṃ ratnasaṃcayam |
mama yuddhaṃ prayaccheti tamuvāca mahārṇavam || 9 ||
[Analyze grammar]

tataḥ samudro dharmātmā samutthāya mahābalaḥ |
abravīdvacanaṃ rājannasuraṃ kālacoditam || 10 ||
[Analyze grammar]

samartho nāsmi te dātuṃ yuddhaṃ yuddhaviśārada |
śrūyatāmabhidhāsyāmi yaste yuddhaṃ pradāsyati || 11 ||
[Analyze grammar]

śailarājo mahāraṇye tapasviśaraṇaṃ param |
śaṃkaraśvaśuro nāmnā himavāniti viśrutaḥ || 12 ||
[Analyze grammar]

guhā prasravaṇopeto bahukandaranirjharaḥ |
sa samarthastava prītimatulāṃ kartumāhave || 13 ||
[Analyze grammar]

taṃ bhītamiti vijñāya samudramasurottamaḥ |
himavadvanamāgacchaccharaścāpādiva cyutaḥ || 14 ||
[Analyze grammar]

tatastasya gireḥ śvetā gajendravipulāḥ śilāḥ |
cikṣepa bahudhā bhūmau dundubhirvinanāda ca || 15 ||
[Analyze grammar]

tataḥ śvetāmbudākāraḥ saumyaḥ prītikarākṛtiḥ |
himavānabravīdvākyaṃ sva eva śikhare sthitaḥ || 16 ||
[Analyze grammar]

kleṣṭumarhasi māṃ na tvaṃ dundubhe dharmavatsala |
raṇakarmasvakuśalastapasviśaraṇaṃ hyaham || 17 ||
[Analyze grammar]

tasya tadvacanaṃ śrutvā girirājasya dhīmataḥ |
uvāca dundubhirvākyaṃ krodhāt saṃraktalocanaḥ || 18 ||
[Analyze grammar]

yadi yuddhe'samarthastvaṃ madbhayādvā nirudyamaḥ |
tamācakṣva pradadyānme yo'dya yuddhaṃ yuyutsataḥ || 19 ||
[Analyze grammar]

himavānabravīdvākyaṃ śrutvā vākyaviśāradaḥ |
anuktapūrvaṃ dharmātmā krodhāttamasurottamam || 20 ||
[Analyze grammar]

vālī nāma mahāprājñaḥ śakratulyaparākramaḥ |
adhyāste vānaraḥ śrīmān kiṣkindhāmatulaprabhām || 21 ||
[Analyze grammar]

sa samartho mahāprājñastava yuddhaviśāradaḥ |
dvandvayuddhaṃ mahaddātuṃ namuceriva vāsavaḥ || 22 ||
[Analyze grammar]

taṃ śīghramabhigaccha tvaṃ yadi yuddhamihecchasi |
sa hi durdharṣaṇo nityaṃ śūraḥ samarakarmaṇi || 23 ||
[Analyze grammar]

śrutvā himavato vākyaṃ krodhāviṣṭaḥ sa dundubhiḥ |
jagāma tāṃ purīṃ tasya kiṣkindhāṃ vālinastadā || 24 ||
[Analyze grammar]

dhārayanmāhiṣaṃ rūpaṃ tīkṣṇaśṛṅgo bhayāvahaḥ |
prāvṛṣīva mahāmeghastoyapūrṇo nabhastale || 25 ||
[Analyze grammar]

tatastu dvāramāgamya kiṣkindhāyā mahābalaḥ |
nanarda kampayanbhūmiṃ dundubhirdundubhiryathā || 26 ||
[Analyze grammar]

samīpajāndrumānbhañjan vasudhāṃ dārayan khuraiḥ |
viṣāṇenollekhandarpāttaddvāraṃ dvirado yathā || 27 ||
[Analyze grammar]

antaḥpuragato vālī śrutvā śabdamamarṣaṇaḥ |
niṣpapāta saha strībhistārābhiriva candramāḥ || 28 ||
[Analyze grammar]

mitaṃ vyaktākṣarapadaṃ tamuvāca sa dundubhim |
harīṇāmīśvaro vālī sarveṣāṃ vanacāriṇām || 29 ||
[Analyze grammar]

kimarthaṃ nagaradvāramidaṃ ruddhvā vinardasi |
dundubhe vidito me'si rakṣa prāṇānmahābala || 30 ||
[Analyze grammar]

tasya tadvacanaṃ śrutvā vānarendrasya dhīmataḥ |
uvāca dundubhirvākyaṃ krodhāt saṃraktalocanaḥ || 31 ||
[Analyze grammar]

na tvaṃ strīsaṃnidhau vīra vacanaṃ vaktumarhasi |
mama yuddhaṃ prayaccha tvaṃ tato jñāsyāmi te balam || 32 ||
[Analyze grammar]

atha vā dhārayiṣyāmi krodhamadya niśāmimām |
gṛhyatāmudayaḥ svairaṃ kāmabhogeṣu vānara || 33 ||
[Analyze grammar]

yo hi mattaṃ pramattaṃ vā suptaṃ vā rahitaṃ bhṛśam |
hanyāt sa bhrūṇahā loke tvadvidhaṃ madamohitam || 34 ||
[Analyze grammar]

sa prahasyābravīnmandaṃ krodhāttamasurottamam |
visṛjya tāḥ striyaḥ sarvāstārāprabhṛtikāstadā || 35 ||
[Analyze grammar]

matto'yamiti mā maṃsthā yadyabhīto'si saṃyuge |
mado'yaṃ saṃprahāre'smin vīrapānaṃ samarthyatām || 36 ||
[Analyze grammar]

tamevamuktvā saṃkruddho mālāmutkṣipya kāñcanīm |
pitrā dattāṃ mahendreṇa yuddhāya vyavatiṣṭhata || 37 ||
[Analyze grammar]

viṣāṇayorgṛhītvā taṃ dundubhiṃ girisaṃnibham |
vālī vyāpātayāṃ cakre nanarda ca mahāsvanam || 38 ||
[Analyze grammar]

yuddhe prāṇahare tasminniṣpiṣṭo dundubhistadā |
śrotrābhyāmatha raktaṃ tu tasya susrāva pātyataḥ |
papāta ca mahākāyaḥ kṣitau pañcatvamāgataḥ || 39 ||
[Analyze grammar]

taṃ tolayitvā bāhubhyāṃ gatasattvamacetanam |
cikṣepa vegavān vālī vegenaikena yojanam || 40 ||
[Analyze grammar]

tasya vegapraviddhasya vaktrāt kṣatajabindavaḥ |
prapeturmārutotkṣiptā mataṅgasyāśramaṃ prati || 41 ||
[Analyze grammar]

tāndṛṣṭvā patitāṃstatra muniḥ śoṇitavipruṣaḥ |
utsasarja mahāśāpaṃ kṣeptāraṃ vālinaṃ prati |
iha tenāpraveṣṭavyaṃ praviṣṭasya badho bhavet || 42 ||
[Analyze grammar]

sa maharṣiṃ samāsādya yācate sma kṛtāñjaliḥ || 43 ||
[Analyze grammar]

tataḥ śāpabhayādbhīta ṛśyamūkaṃ mahāgirim |
praveṣṭuṃ necchati harirdraṣṭuṃ vāpi nareśvara || 44 ||
[Analyze grammar]

tasyāpraveśaṃ jñātvāhamidaṃ rāma mahāvanam |
vicarāmi sahāmātyo viṣādena vivarjitaḥ || 45 ||
[Analyze grammar]

eṣo'sthinicayastasya dundubheḥ saṃprakāśate |
vīryotsekānnirastasya girikūṭanibho mahān || 46 ||
[Analyze grammar]

ime ca vipulāḥ sālāḥ sapta śākhāvalambinaḥ |
yatraikaṃ ghaṭate vālī niṣpatrayitumojasā || 47 ||
[Analyze grammar]

etadasyāsamaṃ vīryaṃ mayā rāma prakāśitam |
kathaṃ taṃ vālinaṃ hantuṃ samare śakṣyase nṛpa || 48 ||
[Analyze grammar]

yadi bhindyādbhavān sālānimāṃstvekeṣuṇā tataḥ |
jānīyāṃ tvāṃ mahābāho samarthaṃ vālino vadhe || 49 ||
[Analyze grammar]

tasya tadvacanaṃ śrutvā sugrīvasya mahātmanaḥ |
rāghavo dundubheḥ kāyaṃ pādāṅguṣṭhena līlayā |
tolayitvā mahābāhuścikṣepa daśayojanam || 50 ||
[Analyze grammar]

kṣiptaṃ dṛṣṭvā tataḥ kāyaṃ sugrīvaḥ punarabravīt |
lakṣmaṇasyāgrato rāmamidaṃ vacanamarthavat || 51 ||
[Analyze grammar]

ārdraḥ samāṃsapratyagraḥ kṣiptaḥ kāyaḥ purā sakhe |
laghuḥ saṃprati nirmāṃsastṛṇabhūtaśca rāghava |
nātra śakyaṃ balaṃ jñātuṃ tava vā tasya vādhikam || 52 ||
[Analyze grammar]