Chapter 9

vālī nāma mama bhrātā jyeṣṭhaḥ śatruniṣūdanaḥ |
piturbahumato nityaṃ mama cāpi tathā purā || 1 ||
[Analyze grammar]

pitaryuparate'smākaṃ jyeṣṭho'yamiti mantribhiḥ |
kapīnāmīśvaro rājye kṛtaḥ paramasaṃmataḥ || 2 ||
[Analyze grammar]

rājyaṃ praśāsatastasya pitṛpaitāmahaṃ mahat |
ahaṃ sarveṣu kāleṣu praṇataḥ preṣyavat sthitaḥ || 3 ||
[Analyze grammar]

māyāvī nāma tejasvī pūrvajo dundubheḥ sutaḥ |
tena tasya mahadvairaṃ strīkṛtaṃ viśrutaṃ purā || 4 ||
[Analyze grammar]

sa tu supte jane rātrau kiṣkindhādvāramāgataḥ |
nardati sma susaṃrabdho vālinaṃ cāhvayad raṇe || 5 ||
[Analyze grammar]

prasuptastu mama bhrātā narditaṃ bhairavasvanam |
śrutvā na mamṛṣe vālī niṣpapāta javāttadā || 6 ||
[Analyze grammar]

sa tu vai niḥsṛtaḥ krodhāttaṃ hantumasurottamam |
vāryamāṇastataḥ strībhirmayā ca praṇatātmanā || 7 ||
[Analyze grammar]

sa tu nirdhūya sarvānno nirjagāma mahābalaḥ |
tato'hamapi sauhārdānniḥsṛto vālinā saha || 8 ||
[Analyze grammar]

sa tu me bhrātaraṃ dṛṣṭvā māṃ ca dūrādavasthitam |
asuro jātasaṃtrāsaḥ pradudrāva tadā bhṛśam || 9 ||
[Analyze grammar]

tasmindravati saṃtraste hyāvāṃ drutataraṃ gatau |
prakāśo'pi kṛto mārgaścandreṇodgacchatā tadā || 10 ||
[Analyze grammar]

sa tṛṇairāvṛtaṃ durgaṃ dharaṇyā vivaraṃ mahat |
praviveśāsuro vegādāvāmāsādya viṣṭhitau || 11 ||
[Analyze grammar]

taṃ praviṣṭaṃ ripuṃ dṛṣṭvā bilaṃ roṣavaśaṃ gataḥ |
māmuvāca tadā vālī vacanaṃ kṣubhitendriyaḥ || 12 ||
[Analyze grammar]

iha tvaṃ tiṣṭha sugrīva biladvāri samāhitaḥ |
yāvadatra praviśyāhaṃ nihanmi samare ripum || 13 ||
[Analyze grammar]

mayā tvetadvacaḥ śrutvā yācitaḥ sa paraṃtapa |
śāpayitvā ca māṃ padbhyāṃ praviveśa bilaṃ tadā || 14 ||
[Analyze grammar]

tasya praviṣṭasya bilaṃ sāgraḥ saṃvatsaro gataḥ |
sthitasya ca mama dvāri sa kālo vyatyavartata || 15 ||
[Analyze grammar]

ahaṃ tu naṣṭaṃ taṃ jñātvā snehādāgatasaṃbhramaḥ |
bhrātaraṃ na hi paśyāmi pāpaśaṅki ca me manaḥ || 16 ||
[Analyze grammar]

atha dīrghasya kālasya bilāttasmādviniḥsṛtam |
saphenaṃ rudhiraṃ raktamahaṃ dṛṣṭvā suduḥkhitaḥ || 17 ||
[Analyze grammar]

nardatāmasurāṇāṃ ca dhvanirme śrotramāgataḥ |
nirastasya ca saṃgrāme krośato niḥsvano guroḥ || 18 ||
[Analyze grammar]

ahaṃ tvavagato buddhyā cihnaistairbhrātaraṃ hatam |
pidhāya ca biladvāraṃ śilayā girimātrayā |
śokārtaścodakaṃ kṛtvā kiṣkindhāmāgataḥ sakhe || 19 ||
[Analyze grammar]

gūhamānasya me tattvaṃ yatnato mantribhiḥ śrutam |
tato'haṃ taiḥ samāgamya sametairabhiṣecitaḥ || 20 ||
[Analyze grammar]

rājyaṃ praśāsatastasya nyāyato mama rāghava |
ājagāma ripuṃ hatvā vālī tamasurottamam || 21 ||
[Analyze grammar]

abhiṣiktaṃ tu māṃ dṛṣṭvā krodhāt saṃraktalocanaḥ |
madīyānmantriṇo baddhvā paruṣaṃ vākyamabravīt || 22 ||
[Analyze grammar]

nigrahe'pi samarthasya taṃ pāpaṃ prati rāghava |
na prāvartata me buddhirbhrātṛgauravayantritā || 23 ||
[Analyze grammar]

mānayaṃstaṃ mahātmānaṃ yathāvaccābhyavādayam |
uktāśca nāśiṣastena saṃtuṣṭenāntarātmanā || 24 ||
[Analyze grammar]