Chapter 58

bhṛśamāvrajamānasya tasyādhovāmalocanam |
prāsphuraccāskhalad rāmo vepathuścāsya jāyate || 1 ||
[Analyze grammar]

upālakṣya nimittāni so'śubhāni muhurmuhuḥ |
api kṣemaṃ tu sītāyā iti vai vyājahāra ha || 2 ||
[Analyze grammar]

tvaramāṇo jagāmātha sītādarśanalālasaḥ |
śūnyamāvasathaṃ dṛṣṭvā babhūvodvignamānasaḥ || 3 ||
[Analyze grammar]

udbhramanniva vegena vikṣipan raghunandanaḥ |
tatra tatroṭajasthānamabhivīkṣya samantataḥ || 4 ||
[Analyze grammar]

dadarśa parṇaśālāṃ ca rahitāṃ sītayā tadā |
śriyā virahitāṃ dhvastāṃ hemante padminīmiva || 5 ||
[Analyze grammar]

rudantamiva vṛkṣaiśca mlānapuṣpamṛgadvijam |
śriyā vihīnaṃ vidhvastaṃ saṃtyaktavanadaivatam || 6 ||
[Analyze grammar]

viprakīrṇājinakuśaṃ vipraviddhabṛsīkaṭam |
dṛṣṭvā śūnyoṭajasthānaṃ vilalāpa punaḥ punaḥ || 7 ||
[Analyze grammar]

hṛtā mṛtā vā naṣṭā vā bhakṣitā vā bhaviṣyati |
nilīnāpyatha vā bhīruratha vā vanamāśritā || 8 ||
[Analyze grammar]

gatā vicetuṃ puṣpāṇi phalānyapi ca vā punaḥ |
atha vā padminīṃ yātā jalārthaṃ vā nadīṃ gatā || 9 ||
[Analyze grammar]

yatnānmṛgayamāṇastu nāsasāda vane priyām |
śokaraktekṣaṇaḥ śokādunmatta iva lakṣyate || 10 ||
[Analyze grammar]

vṛkṣādvṛkṣaṃ pradhāvan sa girīṃścāpi nadīnnadīm |
babhūva vilapan rāmaḥ śokapaṅkārṇavaplutaḥ || 11 ||
[Analyze grammar]

asti kaccittvayā dṛṣṭā sā kadambapriyā priyā |
kadamba yadi jānīṣe śaṃsa sītāṃ śubhānanām || 12 ||
[Analyze grammar]

snigdhapallavasaṃkāśāṃ pītakauśeyavāsinīm |
śaṃsasva yadi vā dṛṣṭā bilva bilvopamastanī || 13 ||
[Analyze grammar]

atha vārjuna śaṃsa tvaṃ priyāṃ tāmarjunapriyām |
janakasya sutā bhīruryadi jīvati vā na vā || 14 ||
[Analyze grammar]

kakubhaḥ kakubhoruṃ tāṃ vyaktaṃ jānāti maithilīm |
latāpallavapuṣpāḍhyo bhāti hyeṣa vanaspatiḥ || 15 ||
[Analyze grammar]

bhramarairupagītaśca yathā drumavaro hyayam |
eṣa vyaktaṃ vijānāti tilakastilakapriyām || 16 ||
[Analyze grammar]

aśokaśokāpanuda śokopahatacetasaṃ |
tvannāmānaṃ kuru kṣipraṃ priyāsaṃdarśanena mām || 17 ||
[Analyze grammar]

yadi tāla tvayā dṛṣṭā pakvatālaphalastanī |
kathayasva varārohāṃ kāruṣyaṃ yadi te mayi || 18 ||
[Analyze grammar]

yadi dṛṣṭā tvayā sītā jambujāmbūnadaprabhā |
priyāṃ yadi vijānīṣe niḥśaṅkaṃ kathayasva me || 19 ||
[Analyze grammar]

atha vā mṛgaśāvākṣīṃ mṛga jānāsi maithilīm |
mṛgaviprekṣaṇī kāntā mṛgībhiḥ sahitā bhavet || 20 ||
[Analyze grammar]

gaja sā gajanāsoruryadi dṛṣṭā tvayā bhavet |
tāṃ manye viditāṃ tubhyamākhyāhi varavāraṇa || 21 ||
[Analyze grammar]

śārdūla yadi sā dṛṣṭā priyā candranibhānanā |
maithilī mama visrabdhaḥ kathayasva na te bhayam || 22 ||
[Analyze grammar]

kiṃ dhāvasi priye nūnaṃ dṛṣṭāsi kamalekṣaṇe |
vṛkṣeṇācchādya cātmānaṃ kiṃ māṃ na pratibhāṣase || 23 ||
[Analyze grammar]

tiṣṭha tiṣṭha varārohe na te'sti karuṇā mayi |
nātyarthaṃ hāsyaśīlāsi kimarthaṃ māmupekṣase || 24 ||
[Analyze grammar]

pītakauśeyakenāsi sūcitā varavarṇini |
dhāvantyapi mayā dṛṣṭā tiṣṭha yadyasti sauhṛdam || 25 ||
[Analyze grammar]

naiva sā nūnamatha vā hiṃsitā cāruhāsinī |
kṛcchraṃ prāptaṃ hi māṃ nūnaṃ yathopekṣitumarhati || 26 ||
[Analyze grammar]

vyaktaṃ sā bhakṣitā bālā rākṣasaiḥ piśitāśanaiḥ |
vibhajyāṅgāni sarvāṇi mayā virahitā priyā || 27 ||
[Analyze grammar]

nūnaṃ tacchubhadantauṣṭhaṃ mukhaṃ niṣprabhatāṃ gatam |
sā hi campakavarṇābhā grīvā graiveya śobhitā || 28 ||
[Analyze grammar]

komalā vilapantyāstu kāntāyā bhakṣitā śubhā |
nūnaṃ vikṣipyamāṇau tau bāhū pallavakomalau || 29 ||
[Analyze grammar]

bhakṣitau vepamānāgrau sahastābharaṇāṅgadau |
mayā virahitā bālā rakṣasāṃ bhakṣaṇāya vai || 30 ||
[Analyze grammar]

sārtheneva parityaktā bhakṣitā bahubāndhavā |
hā lakṣmaṇa mahābāho paśyasi tvaṃ priyāṃ kva cit || 31 ||
[Analyze grammar]

hā priye kva gatā bhadre hā sīteti punaḥ punaḥ |
ityevaṃ vilapan rāmaḥ paridhāvan vanādvanam || 32 ||
[Analyze grammar]

kva cidudbhramate vegāt kva cidvibhramate balāt |
kva cinmatta ivābhāti kāntān veṣaṇatatparaḥ || 33 ||
[Analyze grammar]

sa vanāni nadīḥ śailān giriprasravaṇāni ca |
kānanāni ca vegena bhramatyaparisaṃsthitaḥ || 34 ||
[Analyze grammar]

tathā sa gatvā vipulaṃ mahadvanaṃ parītya sarvaṃ tvatha maithilīṃ prati |
aniṣṭhitāśaḥ sa cakāra mārgaṇe punaḥ priyāyāḥ paramaṃ pariśramam || 35 ||
[Analyze grammar]