Chapter 13

atha pañcavaṭīṃ gacchannantarā raghunandanaḥ |
āsasāda mahākāyaṃ gṛdhraṃ bhīmaparākramam || 1 ||
[Analyze grammar]

taṃ dṛṣṭvā tau mahābhāgau vanasthaṃ rāmalakṣmaṇau |
menāte rākṣasaṃ pakṣiṃ bruvāṇau ko bhavāniti || 2 ||
[Analyze grammar]

sa tau madhurayā vācā saumyayā prīṇayanniva |
uvāca vatsa māṃ viddhi vayasyaṃ piturātmanaḥ || 3 ||
[Analyze grammar]

sa taṃ pitṛsakhaṃ buddhvā pūjayāmāsa rāghavaḥ |
sa tasya kulamavyagramatha papraccha nāma ca || 4 ||
[Analyze grammar]

rāmasya vacanaṃ śrutvā kulamātmānameva ca |
ācacakṣe dvijastasmai sarvabhūtasamudbhavam || 5 ||
[Analyze grammar]

pūrvakāle mahābāho ye prajāpatayo'bhavan |
tānme nigadataḥ sarvānāditaḥ śṛṇu rāghava || 6 ||
[Analyze grammar]

kardamaḥ prathamasteṣāṃ vikṛtastadanantaram |
śeṣaśca saṃśrayaścaiva bahuputraśca vīryavān || 7 ||
[Analyze grammar]

sthāṇurmarīciratriśca kratuścaiva mahābalaḥ |
pulastyaścāṅgirāścaiva pracetāḥ pulahastathā || 8 ||
[Analyze grammar]

dakṣo vivasvānaparo'riṣṭanemiśca rāghava |
kaśyapaśca mahātejāsteṣāmāsīcca paścimaḥ || 9 ||
[Analyze grammar]

prajāpatestu dakṣasya babhūvuriti naḥ śrutam |
ṣaṣṭirduhitaro rāma yaśasvinyo mahāyaśaḥ || 10 ||
[Analyze grammar]

kaśyapaḥ pratijagrāha tāsāmaṣṭau sumadhyamāḥ |
aditiṃ ca ditiṃ caiva danūmapi ca kālakām || 11 ||
[Analyze grammar]

tāmrāṃ krodhavaśāṃ caiva manuṃ cāpyanalāmapi |
tāstu kanyāstataḥ prītaḥ kaśyapaḥ punarabravīt || 12 ||
[Analyze grammar]

putrāṃstrailokyabhartṝn vai janayiṣyatha mat samān |
aditistanmanā rāma ditiśca danureva ca || 13 ||
[Analyze grammar]

kālakā ca mahābāho śeṣāstvamanaso'bhavan |
adityāṃ jajñire devāstrayastriṃśadariṃdama || 14 ||
[Analyze grammar]

ādityā vasavo rudrā aśvinau ca paraṃtapa |
ditistvajanayat putrāndaityāṃstāta yaśasvinaḥ || 15 ||
[Analyze grammar]

teṣāmiyaṃ vasumatī purāsīt savanārṇavā |
danustvajanayat putramaśvagrīvamariṃdama || 16 ||
[Analyze grammar]

narakaṃ kālakaṃ caiva kālakāpi vyajāyata |
krauñcīṃ bhāsīṃ tathā śyenīṃ dhṛtarāṣṭrīṃ tathā śukīm || 17 ||
[Analyze grammar]

tāmrāpi suṣuve kanyāḥ pañcaitā lokaviśrutāḥ |
ulūkāñjanayat krauñcī bhāsī bhāsān vyajāyata || 18 ||
[Analyze grammar]

śyenī śyenāṃśca gṛdhrāṃśca vyajāyata sutejasaḥ |
dhṛtarāṣṭrī tu haṃsāṃśca kalahaṃsāṃśca sarvaśaḥ || 19 ||
[Analyze grammar]

cakravākāṃśca bhadraṃ te vijajñe sāpi bhāminī |
śukī natāṃ vijajñe tu natāyā vinatā sutā || 20 ||
[Analyze grammar]

daśakrodhavaśā rāma vijajñe'pyātmasaṃbhavāḥ |
mṛgīṃ ca mṛgamandāṃ ca harīṃ bhadramadāmapi || 21 ||
[Analyze grammar]

mātaṅgīmatha śārdūlīṃ śvetāṃ ca surabhīṃ tathā |
sarvalakṣaṇasaṃpannāṃ surasāṃ kadrukāmapi || 22 ||
[Analyze grammar]

apatyaṃ tu mṛgāḥ sarve mṛgyā naravarottama |
ṛṣkāśca mṛgamandāyāḥ sṛmarāścamarāstathā || 23 ||
[Analyze grammar]

tatastvirāvatīṃ nāma jajñe bhadramadā sutām |
tasyāstvairāvataḥ putro lokanātho mahāgajaḥ || 24 ||
[Analyze grammar]

haryāśca harayo'patyaṃ vānarāśca tapasvinaḥ |
golāṅgūlāṃśca śārdūlī vyāghrāṃścājanayat sutān || 25 ||
[Analyze grammar]

mātaṅgyāstvatha mātaṅgā apatyaṃ manujarṣabha |
diśāgajaṃ tu śvetākṣaṃ śvetā vyajanayat sutam || 26 ||
[Analyze grammar]

tato duhitarau rāma surabhirdevyajāyata |
rohiṇīṃ nāma bhadraṃ te gandharvīṃ ca yaśasvinīm || 27 ||
[Analyze grammar]

rohiṇyajanayadgā vai gandharvī vājinaḥ sutān |
surasājanayannāgān rāma kadrūśca pannagān || 28 ||
[Analyze grammar]

manurmanuṣyāñjanayat kaśyapasya mahātmanaḥ |
brāhmaṇān kṣatriyān vaiśyāñ śūdrāṃśca manujarṣabha || 29 ||
[Analyze grammar]

mukhato brāhmaṇā jātā urasaḥ kṣatriyāstathā |
ūrubhyāṃ jajñire vaiśyāḥ padbhyāṃ śūdrā iti śrutiḥ || 30 ||
[Analyze grammar]

sarvānpuṇyaphalān vṛkṣānanalāpi vyajāyata |
vinatā ca śukī pautrī kadrūśca surasā svasā || 31 ||
[Analyze grammar]

kadrūrnāgasahaskraṃ tu vijajñe dharaṇīdharam |
dvau putrau vinatāyāstu garuḍo'ruṇa eva ca || 32 ||
[Analyze grammar]

tasmājjāto'hamaruṇāt saṃpātiśca mamāgrajaḥ |
jaṭāyuriti māṃ viddhi śyenīputramariṃdama || 33 ||
[Analyze grammar]

so'haṃ vāsasahāyaste bhaviṣyāmi yadīcchasi |
sītāṃ ca tāta rakṣiṣye tvayi yāte salakṣmaṇe || 34 ||
[Analyze grammar]

jaṭāyuṣaṃ tu pratipūjya rāghavo mudā pariṣvajya ca saṃnato'bhavat |
piturhi śuśrāva sakhitvamātmavāñjaṭāyuṣā saṃkathitaṃ punaḥ punaḥ || 35 ||
[Analyze grammar]

sa tatra sītāṃ paridāya maithilīṃ sahaiva tenātibalena pakṣiṇā |
jagāma tāṃ pañcavaṭīṃ salakṣmaṇo ripūndidhakṣañ śalabhānivānalaḥ || 36 ||
[Analyze grammar]