Chapter 10

agrataḥ prayayau rāmaḥ sītā madhye sumadhyamā |
pṛṣṭhatastu dhanuṣpāṇirlakṣmaṇo'nujagāma ha || 1 ||
[Analyze grammar]

tau paśyamānau vividhāñ śailaprasthān vanāni ca |
nadīśca vividhā ramyā jagmatuḥ saha sītayā || 2 ||
[Analyze grammar]

sārasāṃścakravākāṃśca nadīpulinacāriṇaḥ |
sarāṃsi ca sapadmāni yutāni jalajaiḥ khagaiḥ || 3 ||
[Analyze grammar]

yūthabaddhāṃśca pṛṣatānmadonmattān viṣāṇinaḥ |
mahiṣāṃśca varāhāṃśca gajāṃśca drumavairiṇaḥ || 4 ||
[Analyze grammar]

te gatvā dūramadhvānaṃ lambamāne divākare |
dadṛśuḥ sahitā ramyaṃ taṭākaṃ yojanāyatam || 5 ||
[Analyze grammar]

padmapuṣkarasaṃbādhaṃ gajayūthairalaṃkṛtam |
sārasairhaṃsakādambaiḥ saṃkulaṃ jalacāribhiḥ || 6 ||
[Analyze grammar]

prasannasalile ramyatasmin sarasi śuśruve |
gītavāditranirghoṣo na tu kaścana dṛśyate || 7 ||
[Analyze grammar]

tataḥ kautūhalād rāmo lakṣmaṇaśca mahārathaḥ |
muniṃ dharmabhṛtaṃ nāma praṣṭuṃ samupacakrame || 8 ||
[Analyze grammar]

idamatyadbhutaṃ śrutvā sarveṣāṃ no mahāmune |
kautūhalaṃ mahajjātaṃ kimidaṃ sādhu kathyatām || 9 ||
[Analyze grammar]

tenaivamukto dharmātmā rāghaveṇa munistadā |
prabhāvaṃ sarasaḥ kṛtsnamākhyātumupacakrame || 10 ||
[Analyze grammar]

idaṃ pañcāpsaro nāma taṭākaṃ sārvakālikam |
nirmitaṃ tapasā rāma muninā māṇḍakarṇinā || 11 ||
[Analyze grammar]

sa hi tepe tapastīvraṃ māṇḍakarṇirmahāmuniḥ |
daśavarṣasahasrāṇi vāyubhakṣo jalāśraya || 12 ||
[Analyze grammar]

tataḥ pravyathitāḥ sarve devāḥ sāgnipurogamāḥ |
abruvan vacanaṃ sarve paraspara samāgatāḥ |
asmakaṃ kasya cit sthānameṣa prārthayate muniḥ || 13 ||
[Analyze grammar]

tataḥ kartuṃ tapovighnaṃ sarvairdevairniyojitāḥ |
pradhānāpsarasaḥ pañcavidyuccalitavarcasaḥ || 14 ||
[Analyze grammar]

apsarobhistatastābhirmunirdṛṣṭaparāvaraḥ |
nīto madanavaśyatvaṃ surāṇāṃ kāryasiddhaye || 15 ||
[Analyze grammar]

tāścaivāpsarasaḥ pañcamuneḥ patnītvamāgatāḥ |
taṭāke nirmitaṃ tāsāmasminnantarhitaṃ gṛham || 16 ||
[Analyze grammar]

tatraivāpsarasaḥ pañcanivasantyo yathāsukham |
ramayanti tapoyogānmuniṃ yauvanamāsthitam || 17 ||
[Analyze grammar]

tāsāṃ saṃkrīḍamānānāmeṣa vāditraniḥsvanaḥ |
śrūyate bhūṣaṇonmiśro gītaśabdo manoharaḥ || 18 ||
[Analyze grammar]

āścaryamiti tasyaitadvacanaṃ bhāvitātmanaḥ |
rāghavaḥ pratijagrāha saha bhrātrā mahāyaśāḥ || 19 ||
[Analyze grammar]

evaṃ kathayamānasya dadarśāśramamaṇḍalam |
kuśacīraparikṣiptaṃ nānāvṛkṣasamāvṛtam || 20 ||
[Analyze grammar]

praviśya saha vaidehyā lakṣmaṇena ca rāghavaḥ |
tadā tasmin sa kākutsthaḥ śrīmatyāśramamaṇḍale || 21 ||
[Analyze grammar]

uṣitvā susukhaṃ tatra pūrjyamāno maharṣibhiḥ |
jagāma cāśramāṃsteṣāṃ paryāyeṇa tapasvinām || 22 ||
[Analyze grammar]

yeṣāmuṣitavānpūrvaṃ sakāśe sa mahāstravit |
kva cit paridaśānmāsānekaṃ saṃvatsaraṃ kva cit || 23 ||
[Analyze grammar]

kva cicca caturo māsānpañcaṣaṭ cāparān kva cit |
aparatrādhikānmāsānadhyardhamadhikaṃ kva cit || 24 ||
[Analyze grammar]

trīnmāsānaṣṭamāsāṃśca rāghavo nyavasat sukham |
tathā saṃvasatastasya munīnāmāśrameṣu vai |
ramataścānukulyena yayuḥ saṃvatsarā daśa || 25 ||
[Analyze grammar]

parisṛtya ca dharmajño rāghavaḥ saha sītayā |
sutīkṣṇasyāśramaṃ śrīmānpunarevājagāma ha || 26 ||
[Analyze grammar]

sa tamāśramamāgamya munibhiḥ pratipūjitaḥ |
tatrāpi nyavasad rāmaḥ kaṃ cit kālamariṃdamaḥ || 27 ||
[Analyze grammar]

athāśramastho vinayāt kadā cittaṃ mahāmunim |
upāsīnaḥ sa kākutsthaḥ sutīkṣṇamidamabravīt || 28 ||
[Analyze grammar]

asminnaraṇye bhagavannagastyo munisattamaḥ |
vasatīti mayā nityaṃ kathāḥ kathayatāṃ śrutam || 29 ||
[Analyze grammar]

na tu jānāmi taṃ deśaṃ vanasyāsya mahattayā |
kutrāśramapadaṃ puṇyaṃ maharṣestasya dhīmataḥ || 30 ||
[Analyze grammar]

prasādāttatra bhavataḥ sānujaḥ saha sītayā |
agastyamabhigaccheyamabhivādayituṃ munim || 31 ||
[Analyze grammar]

manoratho mahāneṣa hṛdi saṃparivartate |
yadahaṃ taṃ munivaraṃ śuśrūṣeyamapi svayam || 32 ||
[Analyze grammar]

iti rāmasya sa muniḥ śrutvā dharmātmano vacaḥ |
sutīkṣṇaḥ pratyuvācedaṃ prīto daśarathātmajam || 33 ||
[Analyze grammar]

ahamapyetadeva tvāṃ vaktukāmaḥ salakṣmaṇam |
agastyamabhigaccheti sītayā saha rāghava || 34 ||
[Analyze grammar]

diṣṭyā tvidānīmarthe'smin svayameva bravīṣi mām |
ahamākhyāmi te vatsa yatrāgastyo mahāmuniḥ || 35 ||
[Analyze grammar]

yojanānyāśramāttāta yāhi catvāri vai tataḥ |
dakṣiṇena mahāñ śrīmānagastyabhrāturāśramaḥ || 36 ||
[Analyze grammar]

sthalaprāye vanoddeśe pippalīvanaśobhite |
bahupuṣpaphale ramye nānāśakuninādite || 37 ||
[Analyze grammar]

padminyo vividhāstatra prasannasalilāḥ śivāḥ |
haṃsakāraṇḍavākīrṇāścakravākopaśobhitāḥ || 38 ||
[Analyze grammar]

tatraikāṃ rajanīmuṣya prabhāte rāma gamyatām |
dakṣiṇāṃ diśamāsthāya vanakhaṇḍasya pārśvataḥ || 39 ||
[Analyze grammar]

tatrāgastyāśramapadaṃ gatvā yojanamantaram |
ramaṇīye vanoddeśe bahupādapa saṃvṛte |
raṃsyate tatra vaidehī lakṣmaṇaśca tvayā saha || 40 ||
[Analyze grammar]

sa hi ramyo vanoddeśo bahupādapasaṃkulaḥ |
yadi buddhiḥ kṛtā draṣṭumagastyaṃ taṃ mahāmunim |
adyaiva gamane buddhiṃ rocayasva mahāyaśaḥ || 41 ||
[Analyze grammar]

iti rāmo muneḥ śrutvā saha bhrātrābhivādya ca |
pratasthe'gastyamuddiśya sānujaḥ saha sītayā || 42 ||
[Analyze grammar]

paśyan vanāni citrāṇi parvapāṃścābhrasaṃnibhān |
sarāṃsi saritaścaiva pathi mārgavaśānugāḥ || 43 ||
[Analyze grammar]

sutīkṣṇenopadiṣṭena gatvā tena pathā sukham |
idaṃ paramasaṃhṛṣṭo vākyaṃ lakṣmaṇamabravīt || 44 ||
[Analyze grammar]

etadevāśramapadaṃ nūnaṃ tasya mahātmanaḥ |
agastyasya munerbhrāturdṛśyate puṇyakarmaṇaḥ || 45 ||
[Analyze grammar]

yathā hīme vanasyāsya jñātāḥ pathi sahasraśaḥ |
saṃnatāḥ phalabhareṇa puṣpabhāreṇa ca drumāḥ || 46 ||
[Analyze grammar]

pippalīnāṃ ca pakvānāṃ vanādasmādupāgataḥ |
gandho'yaṃ pavanotkṣiptaḥ sahasā kaṭukodayaḥ || 47 ||
[Analyze grammar]

tatra tatra ca dṛśyante saṃkṣiptāḥ kāṣṭhasaṃcayāḥ |
lūnāśca pathi dṛśyante darbhā vaidūryavarcasaḥ || 48 ||
[Analyze grammar]

etacca vanamadhyasthaṃ kṛṣṇābhraśikharopamam |
pāvakasyāśramasthasya dhūmāgraṃ saṃpradṛśyate || 49 ||
[Analyze grammar]

vivikteṣu ca tīrtheṣu kṛtasnānā dvijātayaḥ |
puṣpopahāraṃ kurvanti kusumaiḥ svayamārjitaiḥ || 50 ||
[Analyze grammar]

tat sutīkṣṇasya vacanaṃ yathā saumya mayā śrutam |
agastyasyāśramo bhrāturnūnameṣa bhaviṣyati || 51 ||
[Analyze grammar]

nigṛhya tarasā mṛtyuṃ lokānāṃ hitakāmyayā |
yasya bhrātrā kṛteyaṃ dik śaraṇyā puṇyakarmaṇā || 52 ||
[Analyze grammar]

ihaikadā kila krūro vātāpirapi celvalaḥ |
bhrātarau sahitāvāstāṃ brāhmaṇaghnau mahāsurau || 53 ||
[Analyze grammar]

dhārayanbrāhmaṇaṃ rūpamilvalaḥ saṃskṛtaṃ vadan |
āmantrayati viprān sa śrāddhamuddiśya nirghṛṇaḥ || 54 ||
[Analyze grammar]

bhrātaraṃ saṃskṛtaṃ bhrātā tatastaṃ meṣarūpiṇam |
tāndvijānbhojayāmāsa śrāddhadṛṣṭena karmaṇā || 55 ||
[Analyze grammar]

tato bhuktavatāṃ teṣāṃ viprāṇāmilvalo'bravīt |
vātāpe niṣkramasveti svareṇa mahatā vadan || 56 ||
[Analyze grammar]

tato bhrāturvacaḥ śrutvā vātāpirmeṣavannadan |
bhittvā bhitvā śarīrāṇi brāhmaṇānāṃ viniṣpatat || 57 ||
[Analyze grammar]

brāhmaṇānāṃ sahasrāṇi tairevaṃ kāmarūpibhiḥ |
vināśitāni saṃhatya nityaśaḥ piśitāśanaiḥ || 58 ||
[Analyze grammar]

agastyena tadā devaiḥ prārthitena maharṣiṇā |
anubhūya kila śrāddhe bhakṣitaḥ sa mahāsuraḥ || 59 ||
[Analyze grammar]

tataḥ saṃpannamityuktvā dattvā hastāvasecanam |
bhrātaraṃ niṣkramasveti ilvalaḥ so'bhyabhāṣata || 60 ||
[Analyze grammar]

taṃ tathā bhāṣamāṇaṃ tu bhrātaraṃ vipraghātinam |
abravīt prahasandhīmānagastyo munisattamaḥ || 61 ||
[Analyze grammar]

kuto niṣkramituṃ śaktirmayā jīrṇasya rakṣasaḥ |
bhrātuste meṣa rūpasya gatasya yamasādanam || 62 ||
[Analyze grammar]

atha tasya vacaḥ śrutvā bhrāturnidhanasaṃśritam |
pradharṣayitumārebhe muniṃ krodhānniśācaraḥ || 63 ||
[Analyze grammar]

so'bhyadravaddvijendraṃ taṃ muninā dīptatejasā |
cakṣuṣānalakalpena nirdagdho nidhanaṃ gataḥ || 64 ||
[Analyze grammar]

tasyāyamāśramo bhrātustaṭākavanaśobhitaḥ |
viprānukampayā yena karmedaṃ duṣkaraṃ kṛtam || 65 ||
[Analyze grammar]

evaṃ kathayamānasya tasya saumitriṇā saha |
rāmasyāstaṃ gataḥ sūryaḥ saṃdhyākālo'bhyavartata || 66 ||
[Analyze grammar]

upāsya paścimāṃ saṃdhyāṃ saha bhrātrā yathāvidhi |
praviveśāśramapadaṃ tamṛṣiṃ cābhyavādayan || 67 ||
[Analyze grammar]

samyak pratigṛhītastu muninā tena rāghavaḥ |
nyavasattāṃ niśāmekāṃ prāśya mūlaphalāni ca || 68 ||
[Analyze grammar]

tasyāṃ rātryāṃ vyatītāyāṃ vimale sūryamaṇḍale |
bhrātaraṃ tamagastyasya āmantrayata rāghavaḥ || 69 ||
[Analyze grammar]

abhivādaye tvā bhagavan sukhamadhyuṣito niśām |
āmantraye tvāṃ gacchāmi guruṃ te draṣṭumagrajam || 70 ||
[Analyze grammar]

gamyatāmiti tenokto jagāma raghunandanaḥ |
yathoddiṣṭena mārgeṇa vanaṃ taccāvalokayan || 71 ||
[Analyze grammar]

nīvārānpanasāṃstālāṃstimiśān vañjulāndhavān |
ciribilvānmadhūkāṃśca bilvānapi ca tindukān || 72 ||
[Analyze grammar]

puṣpitānpuṣpitāgrābhirlatābhiranuveṣṭitān |
dadarśa rāmaḥ śataśastatra kāntārapādapān || 73 ||
[Analyze grammar]

hastihastairvimṛditān vānarairupaśobhitān |
mattaiḥ śakunisaṃghaiśca śataśaḥ pratināditān || 74 ||
[Analyze grammar]

tato'bravīt samīpasthaṃ rāmo rājīvalocanaḥ |
pṛṣṭhato'nugataṃ vīraṃ lakṣmaṇaṃ lakṣmivardhanam || 75 ||
[Analyze grammar]

snigdhapatrā yathā vṛkṣā yathā kṣāntā mṛgadvijāḥ |
āśramo nātidūrastho maharṣerbhāvitātmanaḥ || 76 ||
[Analyze grammar]

agastya iti vikhyāto loke svenaiva karmaṇā |
āśramo dṛśyate tasya pariśrānta śramāpahaḥ || 77 ||
[Analyze grammar]

prājyadhūmākulavanaścīramālāpariṣkṛtaḥ |
praśāntamṛgayūthaśca nānāśakunināditaḥ || 78 ||
[Analyze grammar]

nigṛhya tarasā mṛtyuṃ lokānāṃ hitakāmyayā |
dakṣiṇā dikkṛtā yena śaraṇyā puṇyakarmaṇā || 79 ||
[Analyze grammar]

tasyedamāśramapadaṃ prabhāvād yasya rākṣasaiḥ |
digiyaṃ dakṣiṇā trāsāddṛśyate nopabhujyate || 80 ||
[Analyze grammar]

yadā prabhṛti cākrāntā digiyaṃ puṇyakarmaṇā |
tadā prabhṛti nirvairāḥ praśāntā rajanīcarāḥ || 81 ||
[Analyze grammar]

nāmnā ceyaṃ bhagavato dakṣiṇā dik pradakṣiṇā |
prathitā triṣu lokeṣu durdharṣā krūrakarmabhiḥ || 82 ||
[Analyze grammar]

mārgaṃ niroddhuṃ satataṃ bhāskarasyācalottamaḥ |
saṃdeśaṃ pālayaṃstasya vindhyaśaulo na vardhate || 83 ||
[Analyze grammar]

ayaṃ dīrghāyuṣastasya loke viśrutakarmaṇaḥ |
agastyasyāśramaḥ śrīmān vinītamṛgasevitaḥ || 84 ||
[Analyze grammar]

eṣa lokārcitaḥ sādhurhite nityaṃ rataḥ satām |
asmānadhigatāneṣa śreyasā yojayiṣyati || 85 ||
[Analyze grammar]

ārādhayiṣyāmyatrāhamagastyaṃ taṃ mahāmunim |
śeṣaṃ ca vanavāsasya saumya vatsyāmyahaṃ prabho || 86 ||
[Analyze grammar]

atra devāḥ sagandharvāḥ siddhāśca paramarṣayaḥ |
agastyaṃ niyatāhāraṃ satataṃ paryupāsate || 87 ||
[Analyze grammar]

nātra jīvenmṛṣāvādī krūro vā yadi vā śaṭhaḥ |
nṛśaṃsaḥ kāmavṛtto vā munireṣa tathāvidhaḥ || 88 ||
[Analyze grammar]

atra devāśca yakṣāśca nāgāśca patagaiḥ saha |
vasanti niyatāhārā dharmamārādhayiṣṇavaḥ || 89 ||
[Analyze grammar]

atra siddhā mahātmāno vimānaiḥ sūryasaṃnibhaiḥ |
tyaktvā dehānnavairdehaiḥ svaryātāḥ paramarṣayaḥ || 90 ||
[Analyze grammar]

yakṣatvamamaratvaṃ ca rājyāni vividhāni ca |
atra devāḥ prayacchanti bhūtairārādhitāḥ śubhaiḥ || 91 ||
[Analyze grammar]

āgatāḥ smāśramapadaṃ saumitre praviśāgrataḥ |
nivedayeha māṃ prāptamṛṣaye saha sītayā || 92 ||
[Analyze grammar]