Chapter 6

rāmastu sahito bhrātrā sītayā ca paraṃtapaḥ |
sutīkṣṇasyāśramapadaṃ jagāma saha tairdvijaiḥ || 1 ||
[Analyze grammar]

sa gatvā dūramadhvānaṃ nadīstīrtva bahūdakāḥ |
dadarśa vipulaṃ śailaṃ mahāmeghamivonnatam || 2 ||
[Analyze grammar]

tatastadikṣvākuvarau satataṃ vividhairdrumaiḥ |
kānanaṃ tau viviśatuḥ sītayā saha rāghavau || 3 ||
[Analyze grammar]

praviṣṭastu vanaṃ ghoraṃ bahupuṣpaphaladrumam |
dadarśāśramamekānte cīramālāpariṣkṛtam || 4 ||
[Analyze grammar]

tatra tāpasamāsīnaṃ malapaṅkajaṭādharam |
rāmaḥ sutīkṣṇaṃ vidhivattapovṛddhamabhāṣata || 5 ||
[Analyze grammar]

rāmo'hamasmi bhagavanbhavantaṃ draṣṭumāgataḥ |
tanmābhivada dharmajña maharṣe satyavikrama || 6 ||
[Analyze grammar]

sa nirīkṣya tato vīraṃ rāmaṃ dharmabhṛtāṃ varam |
samāśliṣya ca bāhubhyāmidaṃ vacanamabravīt || 7 ||
[Analyze grammar]

svāgataṃ khalu te vīra rāma dharmabhṛtāṃ vara |
āśramo'yaṃ tvayākrāntaḥ sanātha iva sāmpratam || 8 ||
[Analyze grammar]

pratīkṣamāṇastvāmeva nārohe'haṃ mahāyaśaḥ |
devalokamito vīra dehaṃ tyaktvā mahītale || 9 ||
[Analyze grammar]

citrakūṭamupādāya rājyabhraṣṭo'si me śrutaḥ |
ihopayātaḥ kākutstho devarājaḥ śatakratuḥ |
sarvāṃl lokāñjitānāha mama puṇyena karmaṇā || 10 ||
[Analyze grammar]

teṣu devarṣijuṣṭeṣu jiteṣu tapasā mayā |
matprasādāt sabhāryastvaṃ viharasva salakṣmaṇaḥ || 11 ||
[Analyze grammar]

tamugratapasaṃ dīptaṃ maharṣiṃ satyavādinam |
pratyuvācātmavān rāmo brahmāṇamiva vāsavaḥ || 12 ||
[Analyze grammar]

ahamevāhariṣyāmi svayaṃ lokānmahāmune |
āvāsaṃ tvahamicchāmi pradiṣṭamiha kānane || 13 ||
[Analyze grammar]

bhavān sarvatra kuśalaḥ sarvabhūtahite rataḥ |
ākhyātaḥ śarabhaṅgena gautamena mahātmanā || 14 ||
[Analyze grammar]

evamuktastu rāmeṇa maharṣirlokaviśrutaḥ |
abravīnmadhuraṃ vākyaṃ harṣeṇa mahatāplutaḥ || 15 ||
[Analyze grammar]

ayamevāśramo rāma guṇavān ramyatāmiha |
ṛṣisaṃghānucaritaḥ sadā mūlaphalairyutaḥ || 16 ||
[Analyze grammar]

imamāśramamāgamya mṛgasaṃghā mahāyaśāḥ |
aṭitvā pratigacchanti lobhayitvākutobhayāḥ || 17 ||
[Analyze grammar]

tacchrutvā vacanaṃ tasya maharṣerlakṣmaṇāgrajaḥ |
uvāca vacanaṃ dhīro vikṛṣya saśaraṃ dhanuḥ || 18 ||
[Analyze grammar]

tānahaṃ sumahābhāga mṛgasaṃghān samāgatān |
hanyāṃ niśitadhāreṇa śareṇāśanivarcasā || 19 ||
[Analyze grammar]

bhavāṃstatrābhiṣajyeta kiṃ syāt kṛcchrataraṃ tataḥ |
etasminnāśrame vāsaṃ ciraṃ tu na samarthaye || 20 ||
[Analyze grammar]

tamevamuktvā varadaṃ rāmaḥ saṃdhyāmupāgamat |
anvāsya paścimāṃ saṃdhyāṃ tatra vāsamakalpayat || 21 ||
[Analyze grammar]

tataḥ śubhaṃ tāpasabhojyamannaṃ svayaṃ sutīkṣṇaḥ puruṣarṣabhābhyām |
tābhyāṃ susatkṛtya dadau mahātmā saṃdhyānivṛttau rajanīṃ samīkṣya || 22 ||
[Analyze grammar]