Chapter 98

tataḥ puruṣasiṃhānāṃ vṛtānāṃ taiḥ suhṛdgaṇaiḥ |
śocatāmeva rajanī duḥkhena vyatyavartata || 1 ||
[Analyze grammar]

rajanyāṃ suprabhātāyāṃ bhrātaraste suhṛdvṛtāḥ |
mandākinyāṃ hutaṃ japyaṃ kṛtvā rāmamupāgaman || 2 ||
[Analyze grammar]

tūṣṇīṃ te samupāsīnā na kaścit kiṃ cidabravīt |
bharatastu suhṛnmadhye rāmavacanamabravīt || 3 ||
[Analyze grammar]

sāntvitā māmikā mātā dattaṃ rājyamidaṃ mama |
taddadāmi tavaivāhaṃ bhuṅkṣva rājyamakaṇṭakam || 4 ||
[Analyze grammar]

mahatevāmbuvegena bhinnaḥ seturjalāgame |
durāvāraṃ tvadanyena rājyakhaṇḍamidaṃ mahat || 5 ||
[Analyze grammar]

gatiṃ khara ivāśvasya tārkṣyasyeva patatriṇaḥ |
anugantuṃ na śaktirme gatiṃ tava mahīpate || 6 ||
[Analyze grammar]

sujīvaṃ nityaśastasya yaḥ parairupajīvyate |
rāma tena tu durjīvaṃ yaḥ parānupajīvati || 7 ||
[Analyze grammar]

yathā tu ropito vṛkṣaḥ puruṣeṇa vivardhitaḥ |
hrasvakena durāroho rūḍhaskandho mahādrumaḥ || 8 ||
[Analyze grammar]

sa yadā puṣpito bhūtvā phalāni na vidarśayet |
sa tāṃ nānubhavet prītiṃ yasya hetoḥ prabhāvitaḥ || 9 ||
[Analyze grammar]

eṣopamā mahābāho tvamarthaṃ vettumarhasi |
yadi tvamasmānṛṣabho bhartā bhṛtyānna śādhi hi || 10 ||
[Analyze grammar]

śreṇayastvāṃ mahārāja paśyantvagryāśca sarvaśaḥ |
pratapantamivādityaṃ rājye sthitamariṃdamam || 11 ||
[Analyze grammar]

tavānuyāne kākutṣṭha mattā nardantu kuñjarāḥ |
antaḥpura gatā nāryo nandantu susamāhitāḥ || 12 ||
[Analyze grammar]

tasya sādhvityamanyanta nāgarā vividhā janāḥ |
bharatasya vacaḥ śrutvā rāmaṃ pratyanuyācataḥ || 13 ||
[Analyze grammar]

tamevaṃ duḥkhitaṃ prekṣya vilapantaṃ yaśasvinam |
rāmaḥ kṛtātmā bharataṃ samāśvāsayadātmavān || 14 ||
[Analyze grammar]

nātmanaḥ kāmakāro'sti puruṣo'yamanīśvaraḥ |
itaścetarataścainaṃ kṛtāntaḥ parikarṣati || 15 ||
[Analyze grammar]

sarve kṣayāntā nicayāḥ patanāntāḥ samucchrayāḥ |
saṃyogā viprayogāntā maraṇāntaṃ ca jīvitam || 16 ||
[Analyze grammar]

yathā phalānaṃ pakvānāṃ nānyatra patanādbhayam |
evaṃ narasya jātasya nānyatra maraṇādbhayam || 17 ||
[Analyze grammar]

yathāgāraṃ dṛḍhasthūṇaṃ jīrṇaṃ bhūtvāvasīdati |
tathāvasīdanti narā jarāmṛtyuvaśaṃ gatāḥ || 18 ||
[Analyze grammar]

ahorātrāṇi gacchanti sarveṣāṃ prāṇināmiha |
āyūṃṣi kṣapayantyāśu grīṣme jalamivāṃśavaḥ || 19 ||
[Analyze grammar]

ātmānamanuśoca tvaṃ kimanyamanuśocasi |
āyuste hīyate yasya sthitasya ca gatasya ca || 20 ||
[Analyze grammar]

sahaiva mṛtyurvrajati saha mṛtyurniṣīdati |
gatvā sudīrghamadhvānaṃ saha mṛtyurnivartate || 21 ||
[Analyze grammar]

gātreṣu valayaḥ prāptāḥ śvetāścaiva śiroruhāḥ |
jarayā puruṣo jīrṇaḥ kiṃ hi kṛtvā prabhāvayet || 22 ||
[Analyze grammar]

nandantyudita āditye nandantyastamite ravau |
ātmano nāvabudhyante manuṣyā jīvitakṣayam || 23 ||
[Analyze grammar]

hṛṣyanty ṛtumukhaṃ dṛṣṭvā navaṃ navamihāgatam |
ṛtūnāṃ parivartena prāṇināṃ prāṇasaṃkṣayaḥ || 24 ||
[Analyze grammar]

yathā kāṣṭhaṃ ca kāṣṭhaṃ ca sameyātāṃ mahārṇave |
sametya ca vyapeyātāṃ kālamāsādya kaṃ cana || 25 ||
[Analyze grammar]

evaṃ bhāryāśca putrāśca jñātayaśca vasūni ca |
sametya vyavadhāvanti dhruvo hyeṣāṃ vinābhavaḥ || 26 ||
[Analyze grammar]

nātra kaścid yathā bhāvaṃ prāṇī samabhivartate |
tena tasminna sāmarthyaṃ pretasyāstyanuśocataḥ || 27 ||
[Analyze grammar]

yathā hi sārthaṃ gacchantaṃ brūyāt kaścit pathi sthitaḥ |
ahamapyāgamiṣyāmi pṛṣṭhato bhavatāmiti || 28 ||
[Analyze grammar]

evaṃ pūrvairgato mārgaḥ pitṛpaitāmaho dhruvaḥ |
tamāpannaḥ kathaṃ śoced yasya nāsti vyatikramaḥ || 29 ||
[Analyze grammar]

vayasaḥ patamānasya srotaso vānivartinaḥ |
ātmā sukhe niyoktavyaḥ sukhabhājaḥ prajāḥ smṛtāḥ || 30 ||
[Analyze grammar]

dharmātmā sa śubhaiḥ kṛtsnaiḥ kratubhiścāptadakṣiṇaiḥ |
dhūtapāpo gataḥ svargaṃ pitā naḥ pṛthivīpatiḥ || 31 ||
[Analyze grammar]

bhṛtyānāṃ bharaṇāt samyak prajānāṃ paripālanāt |
arthādānācca dhārmeṇa pitā nastridivaṃ gataḥ || 32 ||
[Analyze grammar]

iṣṭvā bahuvidhairyajñairbhogāṃścāvāpya puṣkalān |
uttamaṃ cāyurāsādya svargataḥ pṛthivīpatiḥ || 33 ||
[Analyze grammar]

sa jīrṇaṃ mānuṣaṃ dehaṃ parityajya pitā hi naḥ |
daivīmṛddhimanuprāpto brahmalokavihāriṇīm || 34 ||
[Analyze grammar]

taṃ tu naivaṃ vidhaḥ kaścit prājñaḥ śocitumarhati |
tvadvidho yadvidhaścāpi śrutavānbuddhimattaraḥ || 35 ||
[Analyze grammar]

ete bahuvidhāḥ śokā vilāpa rudite tathā |
varjanīyā hi dhīreṇa sarvāvasthāsu dhīmatā || 36 ||
[Analyze grammar]

sa svastho bhava mā śoco yātvā cāvasa tāṃ purīm |
tathā pitrā niyukto'si vaśinā vadatāmv vara || 37 ||
[Analyze grammar]

yatrāhamapi tenaiva niyuktaḥ puṇyakarmaṇā |
tatraivāhaṃ kariṣyāmi piturāryasya śāsanam || 38 ||
[Analyze grammar]

na mayā śāsanaṃ tasya tyaktuṃ nyāyyamariṃdama |
tattvayāpi sadā mānyaṃ sa vai bandhuḥ sa naḥ pitā || 39 ||
[Analyze grammar]

evamuktvā tu virate rāme vacanamarthavat |
uvāca bharataścitraṃ dhārmiko dhārmikaṃ vacaḥ || 40 ||
[Analyze grammar]

ko hi syādīdṛśo loke yādṛśastvamariṃdama |
na tvāṃ pravyathayedduḥkhaṃ prītirvā na praharṣayet || 41 ||
[Analyze grammar]

saṃmataścāsi vṛddhānāṃ tāṃśca pṛcchasi saṃśayān |
yathā mṛtastathā jīvanyathāsati tathā sati || 42 ||
[Analyze grammar]

yasyaiṣa buddhilābhaḥ syāt paritapyeta kena saḥ |
sa evaṃ vyasanaṃ prāpya na viṣīditumarhati || 43 ||
[Analyze grammar]

amaropamasattvastvaṃ mahātmā satyasaṃgaraḥ |
sarvajñaḥ sarvadarśī ca buddhimāṃścāsi rāghava || 44 ||
[Analyze grammar]

na tvāmevaṃ guṇairyuktaṃ prabhavābhavakovidam |
aviṣahyatamaṃ duḥkhamāsādayitumarhati || 45 ||
[Analyze grammar]

proṣite mayi yat pāpaṃ mātrā matkāraṇāt kṛtam |
kṣudrayā tadaniṣṭaṃ me prasīdatu bhavānmama || 46 ||
[Analyze grammar]

dharmabandhena baddho'smi tenemāṃ neha mātaram |
hanmi tīvreṇa daṇḍena daṇḍārhāṃ pāpakāriṇīm || 47 ||
[Analyze grammar]

kathaṃ daśarathājjātaḥ śuddhābhijanakarmaṇaḥ |
jānandharmamadharmiṣṭhaṃ kuryāṃ karma jugupsitam || 48 ||
[Analyze grammar]

guruḥ kriyāvān vṛddhaśca rājā pretaḥ piteti ca |
tātaṃ na parigarheyaṃ daivataṃ ceti saṃsadi || 49 ||
[Analyze grammar]

ko hi dharmārthayorhīnamīdṛśaṃ karma kilbiṣam |
striyāḥ priyacikīrṣuḥ san kuryāddharmajña dharmavit || 50 ||
[Analyze grammar]

antakāle hi bhūtāni muhyantīti purāśrutiḥ |
rājñaivaṃ kurvatā loke pratyakṣā sā śrutiḥ kṛtā || 51 ||
[Analyze grammar]

sādhvarthamabhisaṃdhāya krodhānmohācca sāhasāt |
tātasya yadatikrāntaṃ pratyāharatu tadbhavān || 52 ||
[Analyze grammar]

piturhi samatikrāntaṃ putro yaḥ sādhu manyate |
tadapatyaṃ mataṃ loke viparītamato'nyathā || 53 ||
[Analyze grammar]

tadapatyaṃ bhavānastu mā bhavānduṣkṛtaṃ pituḥ |
abhipattat kṛtaṃ karma loke dhīravigarhitam || 54 ||
[Analyze grammar]

kaikeyīṃ māṃ ca tātaṃ ca suhṛdo bāndhavāṃśca naḥ |
paurajānapadān sarvāṃstrātu sarvamidaṃ bhavān || 55 ||
[Analyze grammar]

kva cāraṇyaṃ kva ca kṣātraṃ kva jaṭāḥ kva ca pālanam |
īdṛśaṃ vyāhataṃ karma na bhavān kartumarhati || 56 ||
[Analyze grammar]

atha kleśajameva tvaṃ dharmaṃ caritumicchasi |
dharmeṇa caturo varṇānpālayan kleśamāpnuhi || 57 ||
[Analyze grammar]

caturṇāmāśramāṇāṃ hi gārhasthyaṃ śreṣṭhamāśramam |
āhurdharmajña dharmajñāstaṃ kathaṃ tyaktumarhasi || 58 ||
[Analyze grammar]

śrutena bālaḥ sthānena janmanā bhavato hyaham |
sa kathaṃ pālayiṣyāmi bhūmiṃ bhavati tiṣṭhati || 59 ||
[Analyze grammar]

hīnabuddhiguṇo bālo hīnaḥ sthānena cāpyaham |
bhavatā ca vinā bhūto na vartayitumutsahe || 60 ||
[Analyze grammar]

idaṃ nikhilamavyagraṃ pitryaṃ rājyamakaṇṭakam |
anuśādhi svadharmeṇa dharmajña saha bāndhavaiḥ || 61 ||
[Analyze grammar]

ihaiva tvābhiṣiñcantu dharmajña saha bāndhavaiḥ |
ṛtvijaḥ savasiṣṭhāśca mantravanmantrakovidāḥ || 62 ||
[Analyze grammar]

abhiṣiktastvamasmābhirayodhyāṃ pālane vraja |
vijitya tarasā lokānmarudbhiriva vāsavaḥ || 63 ||
[Analyze grammar]

ṛṇāni trīṇyapākurvandurhṛdaḥ sādhu nirdahan |
suhṛdastarpayan kāmaistvamevātrānuśādhi mām || 64 ||
[Analyze grammar]

adyārya muditāḥ santu suhṛdaste'bhiṣecane |
adya bhītāḥ pālayantāṃ durhṛdaste diśo daśa || 65 ||
[Analyze grammar]

ākrośaṃ mama mātuśca pramṛjya puruṣarṣabha |
adya tatra bhavantaṃ ca pitaraṃ rakṣa kilbiṣāt || 66 ||
[Analyze grammar]

śirasā tvābhiyāce'haṃ kuruṣva karuṇāṃ mayi |
bāndhaveṣu ca sarveṣu bhūteṣviva maheśvaraḥ || 67 ||
[Analyze grammar]

atha vā pṛṣṭhataḥ kṛtvā vanameva bhavānitaḥ |
gamiṣyati gamiṣyāmi bhavatā sārdhamapyaham || 68 ||
[Analyze grammar]

tathāpi rāmo bharatena tāmyata prasādyamānaḥ śirasā mahīpatiḥ |
na caiva cakre gamanāya sattvavānmatiṃ pitustadvacane pratiṣṭhitaḥ || 69 ||
[Analyze grammar]

tadadbhutaṃ sthairyamavekṣya rāghave samaṃ jano harṣamavāpa duḥkhitaḥ |
na yātyayodhyāmiti duḥkhito'bhavat sthirapratijñatvamavekṣya harṣitaḥ || 70 ||
[Analyze grammar]

tamṛtvijo naigamayūthavallabhāstathā visaṃjñāśrukalāśca mātaraḥ |
tathā bruvāṇaṃ bharataṃ pratuṣṭuvuḥ praṇamya rāmaṃ ca yayācire saha || 71 ||
[Analyze grammar]