Chapter 97

taṃ tu rāmaḥ samāśvāsya bhrātaraṃ guruvatsalam |
lakṣmaṇena saha bhrātrā praṣṭuṃ samupacakrame || 1 ||
[Analyze grammar]

kimetadiccheyamahaṃ śrotuṃ pravyāhṛtaṃ tvayā |
yasmāttvamāgato deśamimaṃ cīrajaṭājinī || 2 ||
[Analyze grammar]

yannimittamimaṃ deśaṃ kṛṣṇājinajaṭādharaḥ |
hitvā rājyaṃ praviṣṭastvaṃ tat sarvaṃ vaktumarhasi || 3 ||
[Analyze grammar]

ityuktaḥ kekayīputraḥ kākutsthena mahātmanā |
pragṛhya balavadbhūyaḥ prāñjalirvākyamabravīt || 4 ||
[Analyze grammar]

āryaṃ tātaḥ parityajya kṛtvā karma suduṣkaram |
gataḥ svargaṃ mahābāhuḥ putraśokābhipīḍitaḥ || 5 ||
[Analyze grammar]

striyā niyuktaḥ kaikeyyā mama mātrā paraṃtapa |
cakāra sumahat pāpamidamātmayaśoharam || 6 ||
[Analyze grammar]

sā rājyaphalamaprāpya vidhavā śokakarśitā |
patiṣyati mahāghore niraye jananī mama || 7 ||
[Analyze grammar]

tasya me dāsabhūtasya prasādaṃ kartumarhasi |
abhiṣiñcasva cādyaiva rājyena maghavāniva || 8 ||
[Analyze grammar]

imāḥ prakṛtayaḥ sarvā vidhavā māturaśca yāḥ |
tvat sakāśamanuprāptāḥ prasādaṃ kartumarhasi || 9 ||
[Analyze grammar]

tadānupūrvyā yuktaṃ ca yuktaṃ cātmani mānada |
rājyaṃ prāpnuhi dharmeṇa sakāmān suhṛdaḥ kuru || 10 ||
[Analyze grammar]

bhavatvavidhavā bhūmiḥ samagrā patinā tvayā |
śaśinā vimaleneva śāradī rajanī yathā || 11 ||
[Analyze grammar]

ebhiśca sacivaiḥ sārdhaṃ śirasā yācito mayā |
bhrātuḥ śiṣyasya dāsasya prasādaṃ kartumarhasi || 12 ||
[Analyze grammar]

tadidaṃ śāśvataṃ pitryaṃ sarvaṃ sacivamaṇḍalam |
pūjitaṃ puruṣavyāghra nātikramitumutsahe || 13 ||
[Analyze grammar]

evamuktvā mahābāhuḥ sabāṣpaḥ kekayīsutaḥ |
rāmasya śirasā pādau jagrāha bharataḥ punaḥ || 14 ||
[Analyze grammar]

taṃ mattamiva mātaṅgaṃ niḥśvasantaṃ punaḥ punaḥ |
bhrātaraṃ bharataṃ rāmaḥ pariṣvajyedamabravīt || 15 ||
[Analyze grammar]

kulīnaḥ sattvasaṃpannastejasvī caritavrataḥ |
rājyahetoḥ kathaṃ pāpamācarettvadvidho janaḥ || 16 ||
[Analyze grammar]

na doṣaṃ tvayi paśyāmi sūkṣmamapyari sūdana |
na cāpi jananīṃ bālyāttvaṃ vigarhitumarhasi || 17 ||
[Analyze grammar]

yāvat pitari dharmajña gauravaṃ lokasatkṛte |
tāvaddharmabhṛtāṃ śreṣṭha jananyāmapi gauravam || 18 ||
[Analyze grammar]

etābhyāṃ dharmaśīlābhyāṃ vanaṃ gaccheti rāghava |
mātā pitṛbhyāmukto'haṃ kathamanyat samācare || 19 ||
[Analyze grammar]

tvayā rājyamayodhyāyāṃ prāptavyaṃ lokasatkṛtam |
vastavyaṃ daṇḍakāraṇye mayā valkalavāsasā || 20 ||
[Analyze grammar]

evaṃ kṛtvā mahārājo vibhāgaṃ lokasaṃnidhau |
vyādiśya ca mahātejā divaṃ daśaratho gataḥ || 21 ||
[Analyze grammar]

sa ca pramāṇaṃ dharmātmā rājā lokagurustava |
pitrā dattaṃ yathābhāgamupabhoktuṃ tvamarhasi || 22 ||
[Analyze grammar]

caturdaśa samāḥ saumya daṇḍakāraṇyamāśritaḥ |
upabhokṣye tvahaṃ dattaṃ bhāgaṃ pitrā mahātmanā || 23 ||
[Analyze grammar]

yadabravīnmāṃ naralokasatkṛtaḥ pitā mahātmā vibudhādhipopamaḥ |
tadeva manye paramātmano hitaṃ na sarvalokeśvarabhāvamavyayam || 24 ||
[Analyze grammar]