Chapter 93

niviṣṭāyāṃ tu senāyāmutsuko bharatastadā |
jagāma bhrātaraṃ draṣṭuṃ śatrughnamanudarśayan || 1 ||
[Analyze grammar]

ṛṣiṃ vasiṣṭhaṃ saṃdiśya mātṝrme śīghramānaya |
iti taritamagre sa jāgama guruvatsalaḥ || 2 ||
[Analyze grammar]

sumantrastvapi śatughnamadūrādanvapadyata |
rāmadārśanajastarṣo bharatasyeva tasya ca || 3 ||
[Analyze grammar]

gacchannevātha bharatastāpasālayasaṃsthitām |
bhrātuḥ parṇakuṭīṃ śrīmānuṭajaṃ ca dadarśa ha || 4 ||
[Analyze grammar]

śālāyāstvagratastasyā dadarśa bharatastadā |
kāṣṭāni cāvabhagnāni puṣpāṇyavacitāni ca || 5 ||
[Analyze grammar]

dadarśa ca vane tasminmahataḥ saṃcayān kṛtān |
mṛgāṇāṃ mahiṣāṇāṃ ca karīṣaiḥ śītakāraṇāt || 6 ||
[Analyze grammar]

gacchaneva mahābāhurdyutimānbharatastadā |
śatrughnaṃ cābravīddhṛṣṭastānamātyāṃśca sarvaśaḥ || 7 ||
[Analyze grammar]

manye prāptāḥ sma taṃ deśaṃ bharadvājo yamabravīt |
nātidūre hi manye'haṃ nadīṃ mandākinīmitaḥ || 8 ||
[Analyze grammar]

uccairbaddhāni cīrāṇi lakṣmaṇena bhavedayam |
abhijñānakṛtaḥ panthā vikāle gantumicchatā || 9 ||
[Analyze grammar]

idaṃ codāttadantānāṃ kuñjarāṇāṃ tarasvinām |
śailapārśve parikrāntamanyonyamabhigarjatām || 10 ||
[Analyze grammar]

yamevādhātumicchanti tāpasāḥ satataṃ vane |
tasyāsau dṛśyate dhūmaḥ saṃkulaḥ kṛṣṭavartmanaḥ || 11 ||
[Analyze grammar]

atrāhaṃ puruṣavyāghraṃ gurusatkārakāriṇam |
āryaṃ drakṣyāmi saṃhṛṣṭo maharṣimiva rāghavam || 12 ||
[Analyze grammar]

atha gatvā muhūrtaṃ tu citrakūṭaṃ sa rāghavaḥ |
mandākinīmanuprāptastaṃ janaṃ cedamabravīt || 13 ||
[Analyze grammar]

jagatyāṃ puruṣavyāghra āste vīrāsane rataḥ |
janendro nirjanaṃ prāpya dhinme janma sajīvitam || 14 ||
[Analyze grammar]

matkṛte vyasanaṃ prāpto lokanātho mahādyutiḥ |
sarān kāmānparityajya vane vasati rāghavaḥ || 15 ||
[Analyze grammar]

iti lokasamākruṣṭaḥ pādeṣvadya prasādayan |
rāmasya nipatiṣyāmi sītāyāśca punaḥ punaḥ || 16 ||
[Analyze grammar]

evaṃ sa vilapaṃstasmin vane daśarathātmajaḥ |
dadarśa mahatīṃ puṇyāṃ parṇaśālāṃ manoramām || 17 ||
[Analyze grammar]

sālatālāśvakarṇānāṃ parṇairbahubhirāvṛtām |
viśālāṃ mṛdubhistīrṇāṃ kuśairvedimivādhvare || 18 ||
[Analyze grammar]

śakrāyudha nikāśaiśca kārmukairbhārasādhanaiḥ |
rukmapṛṣṭhairmahāsāraiḥ śobhitāṃ śatrubādhakaiḥ || 19 ||
[Analyze grammar]

arkaraśmipratīkāśairghoraistūṇīgataiḥ śaraiḥ |
śobhitāṃ dīptavadanaiḥ sarpairbhogavatīmiva || 20 ||
[Analyze grammar]

mahārajatavāsobhyāmasibhyāṃ ca virājitām |
rukmabinduvicitrābhyāṃ carmabhyāṃ cāpi śobhitām || 21 ||
[Analyze grammar]

godhāṅgulitrairāsāktaiścitraiḥ kāñcanabhūṣitaiḥ |
arisaṃghairanādhṛṣyāṃ mṛgaiḥ siṃhaguhāmiva || 22 ||
[Analyze grammar]

prāgudaksravaṇāṃ vediṃ viśālāṃ dīptapāvakām |
dadarśa bharatastatra puṇyāṃ rāmaniveśane || 23 ||
[Analyze grammar]

nirīkṣya sa muhūrtaṃ tu dadarśa bharato gurum |
uṭaje rāmamāsīnāṃ jaṭāmaṇḍaladhāriṇam || 24 ||
[Analyze grammar]

taṃ tu kṛṣṇājinadharaṃ cīravalkalavāsasaṃ |
dadarśa rāmamāsīnamabhitaḥ pāvakopamam || 25 ||
[Analyze grammar]

siṃhaskandhaṃ mahābāhuṃ puṇḍarīkanibhekṣaṇam |
pṛthivyāḥ sagarāntāyā bhartāraṃ dharmacāriṇam || 26 ||
[Analyze grammar]

upaviṣṭaṃ mahābāhuṃ brahmāṇamiva śāśvatam |
sthaṇḍile darbhasasmtīrṇe sītayā lakṣmaṇena ca || 27 ||
[Analyze grammar]

taṃ dṛṣṭvā bharataḥ śrīmānduḥkhamohapariplutaḥ |
abhyadhāvata dharmātmā bharataḥ kaikayīsutaḥ || 28 ||
[Analyze grammar]

dṛṣṭvā ca vilalāpārto bāṣpasaṃdigdhayā girā |
aśaknuvandhārayituṃ dhairyādvacanamabravīt || 29 ||
[Analyze grammar]

yaḥ saṃsadi prakṛtibhirbhaved yukta upāsitum |
vanyairmṛgairupāsīnaḥ so'yamāste mamāgrajaḥ || 30 ||
[Analyze grammar]

vāsobhirbahusāhasrairyo mahātmā purocitaḥ |
mṛgājine so'yamiha pravaste dharmamācaran || 31 ||
[Analyze grammar]

adhārayad yo vividhāścitrāḥ sumanasastadā |
so'yaṃ jaṭābhāramimaṃ sahate rāghavaḥ katham || 32 ||
[Analyze grammar]

yasya yajñairyathādiṣṭairyukto dharmasya saṃcayaḥ |
śarīra kleśasaṃbhūtaṃ sa dharmaṃ parimārgate || 33 ||
[Analyze grammar]

candanena mahārheṇa yasyāṅgamupasevitam |
malena tasyāṅgamidaṃ kathamāryasya sevyate || 34 ||
[Analyze grammar]

mannimittamidaṃ duḥkhaṃ prāpto rāmaḥ sukhocitaḥ |
dhigjīvitaṃ nṛśaṃsasya mama lokavigarhitam || 35 ||
[Analyze grammar]

ityevaṃ vilapandīnaḥ prasvinnamukhapaṅkajaḥ |
pādāvaprāpya rāmasya papāta bharato rudan || 36 ||
[Analyze grammar]

duḥkhābhitapto bharato rājaputro mahābalaḥ |
uktvāryeti sakṛddīnaṃ punarnovāca kiṃ cana || 37 ||
[Analyze grammar]

bāṣpāpihita kaṇṭhaśca prekṣya rāmaṃ yaśasvinam |
āryetyevābhisaṃkruśya vyāhartuṃ nāśakattataḥ || 38 ||
[Analyze grammar]

śatrughnaścāpi rāmasya vavande caraṇau rudan |
tāv ubhau sa samāliṅgya rāmo'pyaśrūṇyavartayat || 39 ||
[Analyze grammar]

tataḥ sumantreṇa guhena caiva samīyatū rājasutāvaraṇye |
divākaraścaiva niśākaraśca yathāmbare śukrabṛhaspatibhyām || 40 ||
[Analyze grammar]

tānpārthivān vāraṇayūthapābhān samāgatāṃstatra mahatyaraṇye |
vanaukasaste'pi samīkṣya sarve'pyaśrūṇyamuñcanpravihāya harṣam || 41 ||
[Analyze grammar]