Chapter 88

dīrghakāloṣitastasmin girau girivanapriyaḥ |
videhyāḥ priyamākāṅkṣan svaṃ ca cittaṃ vilobhayan || 1 ||
[Analyze grammar]

atha dāśarathiścitraṃ citrakūṭamadarśayat |
bhāryāmamarasaṃkāśaḥ śacīmiva puraṃdaraḥ || 2 ||
[Analyze grammar]

na rājyādbhraṃśanaṃ bhadre na suhṛdbhirvinābhavaḥ |
mano me bādhate dṛṣṭvā ramaṇīyamimaṃ girim || 3 ||
[Analyze grammar]

paśyemamacalaṃ bhadre nānādvijagaṇāyutam |
śikharaiḥ khamivodviddhairdhātumadbhirvibhūṣitam || 4 ||
[Analyze grammar]

ke cid rajatasaṃkāśāḥ ke cit kṣatajasaṃnibhāḥ |
pītamāñjiṣṭhavarṇāśca ke cinmaṇivaraprabhāḥ || 5 ||
[Analyze grammar]

puṣyārkaketukābhāśca ke cijjyotī rasaprabhāḥ |
virājante'calendrasya deśā dhātuvibhūṣitāḥ || 6 ||
[Analyze grammar]

nānāmṛgagaṇadvīpitarakṣvṛkṣagaṇairvṛtaḥ |
aduṣṭairbhātyayaṃ śailo bahupakṣisamākulaḥ || 7 ||
[Analyze grammar]

āmrajambvasanairlodhraiḥ priyālaiḥ panasairdhavaiḥ |
aṅkolairbhavyatiniśairbilvatindukaveṇubhiḥ || 8 ||
[Analyze grammar]

kāśmaryariṣṭavaraṇairmadhūkaistilakaistathā |
badaryāmalakairnīpairvetradhanvanabījakaiḥ || 9 ||
[Analyze grammar]

puṣpavadbhiḥ phalopetaiśchāyāvadbhirmanoramaiḥ |
evamādibhirākīrṇaḥ śriyaṃ puṣyatyayaṃ giriḥ || 10 ||
[Analyze grammar]

śailaprastheṣu ramyeṣu paśyemān kāmaharṣaṇān |
kinnarāndvaṃdvaśo bhadre ramamāṇānmanasvinaḥ || 11 ||
[Analyze grammar]

śākhāvasaktān khaḍgāṃśca pravarāṇyambarāṇi ca |
paśya vidyādharastrīṇāṃ krīḍeddeśānmanoramān || 12 ||
[Analyze grammar]

jalaprapātairudbhedairniṣyandaiśca kva cit kva cit |
sravadbhirbhātyayaṃ śailaḥ sravanmada iva dvipaḥ || 13 ||
[Analyze grammar]

guhāsamīraṇo gandhānnānāpuṣpabhavān vahan |
ghrāṇatarpaṇamabhyetya kaṃ naraṃ na praharṣayet || 14 ||
[Analyze grammar]

yadīha śarado'nekāstvayā sārdhamanindite |
lakṣmaṇena ca vatsyāmi na māṃ śokaḥ pradhakṣyati || 15 ||
[Analyze grammar]

bahupuṣpaphale ramye nānādvijagaṇāyute |
vicitraśikhare hyasmin ratavānasmi bhāmini || 16 ||
[Analyze grammar]

anena vanavāsena mayā prāptaṃ phaladvayam |
pituścānṛṇatā dharme bharatasya priyaṃ tathā || 17 ||
[Analyze grammar]

vaidehi ramase kacciccitrakūṭe mayā saha |
paśyantī vividhānbhāvānmanovākkāyasaṃyatān || 18 ||
[Analyze grammar]

idamevāmṛtaṃ prāhū rājñāṃ rājarṣayaḥ pare |
vanavāsaṃ bhavārthāya pretya me prapitāmahāḥ || 19 ||
[Analyze grammar]

śilāḥ śailasya śobhante viśālāḥ śataśo'bhitaḥ |
bahulā bahulairvarṇairnīlapītasitāruṇaiḥ || 20 ||
[Analyze grammar]

niśi bhāntyacalendrasya hutāśanaśikhā iva |
oṣadhyaḥ svaprabhā lakṣmyā bhrājamānāḥ sahasraśaḥ || 21 ||
[Analyze grammar]

ke cit kṣayanibhā deśāḥ ke cidudyānasaṃnibhāḥ |
ke cidekaśilā bhānti parvatasyāsya bhāmini || 22 ||
[Analyze grammar]

bhittveva vasudhāṃ bhāti citrakūṭaḥ samutthitaḥ |
citrakūṭasya kūṭo'sau dṛśyate sarvataḥ śivaḥ || 23 ||
[Analyze grammar]

kuṣṭhapuṃnāgatagarabhūrjapatrottaracchadān |
kāmināṃ svāstarānpaśya kuśeśayadalāyutān || 24 ||
[Analyze grammar]

mṛditāścāpaviddhāśca dṛśyante kamalasrajaḥ |
kāmibhirvanite paśya phalāni vividhāni ca || 25 ||
[Analyze grammar]

vasvaukasārāṃ nalinīmatyetīvottarān kurūn |
parvataścitrakūṭo'sau bahumūlaphalodakaḥ || 26 ||
[Analyze grammar]

imaṃ tu kālaṃ vanite vijahrivāṃstvayā ca sīte saha lakṣmaṇena ca |
ratiṃ prapatsye kuladharmavardhinīṃ satāṃ pathi svairniyamaiḥ paraiḥ sthitaḥ || 27 ||
[Analyze grammar]