Chapter 87

tayā mahatyā yāyinyā dhvajinyā vanavāsinaḥ |
arditā yūthapā mattāḥ sayūthāḥ saṃpradudruvuḥ || 1 ||
[Analyze grammar]

ṛkṣāḥ pṛṣatasaṃghāśca ruravaśca samantataḥ |
dṛśyante vanarājīṣu giriṣvapi nadīṣu ca || 2 ||
[Analyze grammar]

sa saṃpratasthe dharmātmā prīto daśarathātmajaḥ |
vṛto mahatyā nādinyā senayā caturaṅgayā || 3 ||
[Analyze grammar]

sāgaraughanibhā senā bharatasya mahātmanaḥ |
mahīṃ saṃchādayāmāsa prāvṛṣi dyāmivāmbudaḥ || 4 ||
[Analyze grammar]

turaṃgaughairavatatā vāraṇaiśca mahājavaiḥ |
anālakṣyā ciraṃ kālaṃ tasmin kāle babhūva bhūḥ || 5 ||
[Analyze grammar]

sa yātvā dūramadhvānaṃ supariśrānta vāhanaḥ |
uvāca bharataḥ śrīmān vasiṣṭhaṃ mantriṇāṃ varam || 6 ||
[Analyze grammar]

yādṛśaṃ lakṣyate rūpaṃ yathā caiva śrutaṃ mayā |
vyaktaṃ prāptāḥ sma taṃ deśaṃ bharadvājo yamabravīt || 7 ||
[Analyze grammar]

ayaṃ giriścitrakūṭastathā mandākinī nadī |
etat prakāśate dūrānnīlameghanibhaṃ vanam || 8 ||
[Analyze grammar]

gireḥ sānūni ramyāṇi citrakūṭasya saṃprati |
vāraṇairavamṛdyante māmakaiḥ parvatopamaiḥ || 9 ||
[Analyze grammar]

muñcanti kusumānyete nagāḥ parvatasānuṣu |
nīlā ivātapāpāye toyaṃ toyadharā ghanāḥ || 10 ||
[Analyze grammar]

kinnarācaritoddeśaṃ paśya śatrughna parvatam |
hayaiḥ samantādākīrṇaṃ makarairiva sāgaram || 11 ||
[Analyze grammar]

ete mṛgagaṇā bhānti śīghravegāḥ pracoditāḥ |
vāyupraviddhāḥ śaradi megharājya ivāmbare || 12 ||
[Analyze grammar]

kurvanti kusumāpīḍāñ śiraḥsu surabhīnamī |
meghaprakāśaiḥ phalakairdākṣiṇātyā yathā narāḥ || 13 ||
[Analyze grammar]

niṣkūjamiva bhūtvedaṃ vanaṃ ghorapradarśanam |
ayodhyeva janākīrṇā saṃprati pratibhāti mā || 14 ||
[Analyze grammar]

khurairudīrito reṇurdivaṃ pracchādya tiṣṭhati |
taṃ vahatyanilaḥ śīghraṃ kurvanniva mama priyam || 15 ||
[Analyze grammar]

syandanāṃsturagopetān sūtamukhyairadhiṣṭhitān |
etān saṃpatataḥ śīghraṃ paśya śatrughna kānane || 16 ||
[Analyze grammar]

etān vitrāsitānpaśya barhiṇaḥ priyadarśanān |
etamāviśataḥ śailamadhivāsaṃ patatriṇām || 17 ||
[Analyze grammar]

atimātramayaṃ deśo manojñaḥ pratibhāti mā |
tāpasānāṃ nivāso'yaṃ vyaktaṃ svargapatho yathā || 18 ||
[Analyze grammar]

mṛgā mṛgībhiḥ sahitā bahavaḥ pṛṣatā vane |
manojña rūpā lakṣyante kusumairiva citritaḥ || 19 ||
[Analyze grammar]

sādhu sainyāḥ pratiṣṭhantāṃ vicinvantu ca kānanam |
yathā tau puruṣavyāghrau dṛśyete rāmalakṣmaṇau || 20 ||
[Analyze grammar]

bharatasya vacaḥ śrutvā puruṣāḥ śastrapāṇayaḥ |
viviśustadvanaṃ śūrā dhūmaṃ ca dadṛśustataḥ || 21 ||
[Analyze grammar]

te samālokya dhūmāgramūcurbharatamāgatāḥ |
nāmanuṣye bhavatyagnirvyaktamatraiva rāghavau || 22 ||
[Analyze grammar]

atha nātra naravyāghrau rājaputrau paraṃtapau |
anye rāmopamāḥ santi vyaktamatra tapasvinaḥ || 23 ||
[Analyze grammar]

tacchrutvā bharatasteṣāṃ vacanaṃ sādhu saṃmatam |
sainyānuvāca sarvāṃstānamitrabalamardanaḥ || 24 ||
[Analyze grammar]

yattā bhavantastiṣṭhantu neto gantavyamagrataḥ |
ahameva gamiṣyāmi sumantro gurureva ca || 25 ||
[Analyze grammar]

evamuktāstataḥ sarve tatra tasthuḥ samantataḥ |
bharato yatra dhūmāgraṃ tatra dṛṣṭiṃ samādadhat || 26 ||
[Analyze grammar]

vyavasthitā yā bharatena sā camūrnirīkṣamāṇāpi ca dhūmamagrataḥ |
babhūva hṛṣṭā nacireṇa jānatī priyasya rāmasya samāgamaṃ tadā || 27 ||
[Analyze grammar]