Chapter 72

atra yātrāṃ samīhantaṃ śatrughno lakṣmaṇānujaḥ |
bharataṃ śokasaṃtaptamidaṃ vacanamabravīt || 1 ||
[Analyze grammar]

gatiryaḥ sarvabhūtānāṃ duḥkhe kiṃ punarātmanaḥ |
sa rāmaḥ sattva saṃpannaḥ striyā pravrājito vanam || 2 ||
[Analyze grammar]

balavān vīrya saṃpanno lakṣmaṇo nāma yo'pyasau |
kiṃ na mocayate rāmaṃ kṛtvāpi pitṛnigraham || 3 ||
[Analyze grammar]

pūrvameva tu nigrāhyaḥ samavekṣya nayānayau |
utpathaṃ yaḥ samārūḍho nāryā rājā vaśaṃ gataḥ || 4 ||
[Analyze grammar]

iti saṃbhāṣamāṇe tu śatrughne lakṣmaṇānuje |
prāgdvāre'bhūttadā kubjā sarvābharaṇabhūṣitā || 5 ||
[Analyze grammar]

liptā candanasāreṇa rājavastrāṇi bibhratī |
mekhalā dāmabhiścitrai rajjubaddheva vānarī || 6 ||
[Analyze grammar]

tāṃ samīkṣya tadā dvāḥstho bhṛśaṃ pāpasya kāriṇīm |
gṛhītvākaruṇaṃ kubjāṃ śatrughnāya nyavedayat || 7 ||
[Analyze grammar]

yasyāḥ kṛte vane rāmo nyastadehaśca vaḥ pitā |
seyaṃ pāpā nṛśaṃsā ca tasyāḥ kuru yathāmati || 8 ||
[Analyze grammar]

śatrughnaśca tadājñāya vacanaṃ bhṛśaduḥkhitaḥ |
antaḥpuracarān sarvānityuvāca dhṛtavrataḥ || 9 ||
[Analyze grammar]

tīvramutpāditaṃ duḥkhaṃ bhrātṝṇāṃ me tathā pituḥ |
yayā seyaṃ nṛśaṃsasya karmaṇaḥ phalamaśnutām || 10 ||
[Analyze grammar]

evamuktā ca tenāśu sakhī janasamāvṛtā |
gṛhītā balavat kubjā sā tadgṛhamanādayat || 11 ||
[Analyze grammar]

tataḥ subhṛśa saṃtaptastasyāḥ sarvaḥ sakhījanaḥ |
kruddhamājñāya śatrughnaṃ vyapalāyata sarvaśaḥ || 12 ||
[Analyze grammar]

amantrayata kṛtsnaśca tasyāḥ sarvasakhījanaḥ |
yathāyaṃ samupakrānto niḥśeṣaṃ naḥ kariṣyati || 13 ||
[Analyze grammar]

sānukrośāṃ vadānyāṃ ca dharmajñāṃ ca yaśasvinīm |
kausalyāṃ śaraṇaṃ yāmaḥ sā hi no'stu dhruvā gatiḥ || 14 ||
[Analyze grammar]

sa ca roṣeṇa tāmrākṣaḥ śatrughnaḥ śatrutāpanaḥ |
vicakarṣa tadā kubjāṃ krośantīṃ pṛthivītale || 15 ||
[Analyze grammar]

tasyā hyākṛṣyamāṇāyā mantharāyāstatastataḥ |
citraṃ bahuvidhaṃ bhāṇḍaṃ pṛthivyāṃ tadvyaśīryata || 16 ||
[Analyze grammar]

tena bhāṇḍena saṃkīrṇaṃ śrīmadrājaniveśanam |
aśobhata tadā bhūyaḥ śāradaṃ gaganaṃ yathā || 17 ||
[Analyze grammar]

sa balī balavat krodhādgṛhītvā puruṣarṣabhaḥ |
kaikeyīmabhinirbhartsya babhāṣe paruṣaṃ vacaḥ || 18 ||
[Analyze grammar]

tairvākyaiḥ paruṣairduḥkhaiḥ kaikeyī bhṛśaduḥkhitā |
śatrughna bhayasaṃtrastā putraṃ śaraṇamāgatā || 19 ||
[Analyze grammar]

tāṃ prekṣya bharataḥ kruddhaṃ śatrughnamidamabravīt |
avadhyāḥ sarvabhūtānāṃ pramadāḥ kṣamyatāmiti || 20 ||
[Analyze grammar]

hanyāmahamimāṃ pāpāṃ kaikeyīṃ duṣṭacāriṇīm |
yadi māṃ dhārmiko rāmo nāsūyenmātṛghātakam || 21 ||
[Analyze grammar]

imāmapi hatāṃ kubjāṃ yadi jānāti rāghavaḥ |
tvāṃ ca māṃ caiva dharmātmā nābhibhāṣiṣyate dhruvam || 22 ||
[Analyze grammar]

bharatasya vacaḥ śrutvā śatrughno lakṣmaṇānujaḥ |
nyavartata tato roṣāttāṃ mumoca ca mantharām || 23 ||
[Analyze grammar]

sā pādamūle kaikeyyā mantharā nipapāta ha |
niḥśvasantī suduḥkhārtā kṛpaṇaṃ vilalāpa ca || 24 ||
[Analyze grammar]

śatrughnavikṣepavimūḍhasaṃjñāṃ samīkṣya kubjāṃ bharatasya mātā |
śanaiḥ samāśvāsayadārtarūpāṃ krauñcīṃ vilagnāmiva vīkṣamāṇām || 25 ||
[Analyze grammar]