Chapter 53

mama tvaśvā nivṛttasya na prāvartanta vartmani |
uṣṇamaśru vimuñcanto rāme saṃprasthite vanam || 1 ||
[Analyze grammar]

ubhābhyāṃ rājaputrābhyāmatha kṛtvāhamajñalim |
prasthito rathamāsthāya tadduḥkhamapi dhārayan || 2 ||
[Analyze grammar]

guheva sārdhaṃ tatraiva sthito'smi divasānbahūn |
āśayā yadi māṃ rāmaḥ punaḥ śabdāpayediti || 3 ||
[Analyze grammar]

viṣaye te mahārāja rāmavyasanakarśitāḥ |
api vṛkṣāḥ parimlānaḥ sapuṣpāṅkurakorakāḥ || 4 ||
[Analyze grammar]

na ca sarpanti sattvāni vyālā na prasaranti ca |
rāmaśokābhibhūtaṃ tanniṣkūjamabhavadvanam || 5 ||
[Analyze grammar]

līnapuṣkarapatrāśca narendra kaluṣodakāḥ |
saṃtaptapadmāḥ padminyo līnamīnavihaṃgamāḥ || 6 ||
[Analyze grammar]

jalajāni ca puṣpāṇi mālyāni sthalajāni ca |
nādya bhāntyalpagandhīni phalāni ca yathā puram || 7 ||
[Analyze grammar]

praviśantamayodhyāṃ māṃ na kaścidabhinandati |
narā rāmamapaśyanto niḥśvasanti muhurmuhuḥ || 8 ||
[Analyze grammar]

harmyairvimānaiḥ prāsādairavekṣya rathamāgatam |
hāhākārakṛtā nāryo rāmādarśanakarśitāḥ || 9 ||
[Analyze grammar]

āyatairvimalairnetrairaśruvegapariplutaiḥ |
anyonyamabhivīkṣante vyaktamārtatarāḥ striyaḥ || 10 ||
[Analyze grammar]

nāmitrāṇāṃ na mitrāṇāmudāsīnajanasya ca |
ahamārtatayā kaṃ cidviśeṣaṃ nopalakṣaye || 11 ||
[Analyze grammar]

aprahṛṣṭamanuṣyā ca dīnanāgaturaṃgamā |
ārtasvaraparimlānā viniḥśvasitaniḥsvanā || 12 ||
[Analyze grammar]

nirānandā mahārāja rāmapravrājanātulā |
kausalyā putra hīneva ayodhyā pratibhāti mā || 13 ||
[Analyze grammar]

sūtasya vacanaṃ śrutvā vācā paramadīnayā |
bāṣpopahatayā rājā taṃ sūtamidamabravīt || 14 ||
[Analyze grammar]

kaikeyyā viniyuktena pāpābhijanabhāvayā |
mayā na mantrakuśalairvṛddhaiḥ saha samarthitam || 15 ||
[Analyze grammar]

na suhṛdbhirna cāmātyairmantrayitvā na naigamaiḥ |
mayāyamarthaḥ saṃmohāt strīhetoḥ sahasā kṛtaḥ || 16 ||
[Analyze grammar]

bhavitavyatayā nūnamidaṃ vā vyasanaṃ mahat |
kulasyāsya vināśāya prāptaṃ sūta yadṛcchayā || 17 ||
[Analyze grammar]

sūta yadyasti te kiṃ cinmayāpi sukṛtaṃ kṛtam |
tvaṃ prāpayāśu māṃ rāmaṃ prāṇāḥ saṃtvarayanti mām || 18 ||
[Analyze grammar]

yad yad yāpi mamaivājñā nivartayatu rāghavam |
na śakṣyāmi vinā rāma muhūrtamapi jīvitum || 19 ||
[Analyze grammar]

atha vāpi mahābāhurgato dūraṃ bhaviṣyati |
māmeva rathamāropya śīghraṃ rāmāya darśaya || 20 ||
[Analyze grammar]

vṛttadaṃṣṭro maheṣvāsaḥ kvāsau lakṣmaṇapūrvajaḥ |
yadi jīvāmi sādhvenaṃ paśyeyaṃ saha sītayā || 21 ||
[Analyze grammar]

lohitākṣaṃ mahābāhumāmuktamaṇikuṇḍalam |
rāmaṃ yadi na paśyāmi gamiṣyāmi yamakṣayam || 22 ||
[Analyze grammar]

ato nu kiṃ duḥkhataraṃ yo'hamikṣvākunandanam |
imāmavasthāmāpanno neha paśyāmi rāghavam || 23 ||
[Analyze grammar]

hā rāma rāmānuja hā hā vaidehi tapasvinī |
na māṃ jānīta duḥkhena mriyamāṇamanāthavat |
dustaro jīvatā devi mayāyaṃ śokasāgaraḥ || 24 ||
[Analyze grammar]

aśobhanaṃ yo'hamihādya rāghavaṃ didṛkṣamāṇo na labhe salakṣmaṇam |
itīva rājā vilapanmahāyaśāḥ papāta tūrṇaṃ śayane sa mūrchitaḥ || 25 ||
[Analyze grammar]

iti vilapati pārthive pranaṣṭe karuṇataraṃ dviguṇaṃ ca rāmahetoḥ |
vacanamanuniśamya tasya devī bhayamagamat punareva rāmamātā || 26 ||
[Analyze grammar]