Chapter 50

atha rātryāṃ vyatītāyāmavasuptamanantaram |
prabodhayāmāsa śanairlakṣmaṇaṃ raghunandanaḥ || 1 ||
[Analyze grammar]

saumitre śṛṇu vanyānāṃ valgu vyāharatāṃ svanam |
saṃpratiṣṭhāmahe kālaḥ prasthānasya paraṃtapa || 2 ||
[Analyze grammar]

sa suptaḥ samaye bhrātrā lakṣmaṇaḥ pratibodhitaḥ |
jahau nidrāṃ ca tandrīṃ ca prasaktaṃ ca pathi śramam || 3 ||
[Analyze grammar]

tata utthāya te sarve spṛṣṭvā nadyāḥ śivaṃ jalam |
panthānamṛṣiṇoddiṣṭaṃ citrakūṭasya taṃ yayuḥ || 4 ||
[Analyze grammar]

tataḥ saṃprasthitaḥ kāle rāmaḥ saumitriṇā saha |
sītāṃ kamalapatrākṣīmidaṃ vacanamabravīt || 5 ||
[Analyze grammar]

ādīptāniva vaidehi sarvataḥ puṣpitānnagān |
svaiḥ puṣpaiḥ kiṃśukānpaśya mālinaḥ śiśirātyaye || 6 ||
[Analyze grammar]

paśya bhallātakānphullānnarairanupasevitān |
phalapatrairavanatānnūnaṃ śakṣyāmi jīvitum || 7 ||
[Analyze grammar]

paśya droṇapramāṇāni lambamānāni lakṣmaṇa |
madhūni madhukārībhiḥ saṃbhṛtāni nage nage || 8 ||
[Analyze grammar]

eṣa krośati natyūhastaṃ śikhī pratikūjati |
ramaṇīye vanoddeśe puṣpasaṃstarasaṃkaṭe || 9 ||
[Analyze grammar]

mātaṃgayūthānusṛtaṃ pakṣisaṃghānunāditam |
citrakūṭamimaṃ paśya pravṛddhaśikharaṃ girim || 10 ||
[Analyze grammar]

tatastau pādacāreṇa gacchantau saha sītayā |
ramyamāsedatuḥ śailaṃ citrakūṭaṃ manoramam || 11 ||
[Analyze grammar]

taṃ tu parvatamāsādya nānāpakṣigaṇāyutam |
ayaṃ vāso bhavettāvadatra saumya ramemahi || 12 ||
[Analyze grammar]

lakṣmaṇānaya dārūṇi dṛḍhāni ca varāṇi ca |
kuruṣvāvasathaṃ saumya vāse me'bhirataṃ manaḥ || 13 ||
[Analyze grammar]

tasya tadvacanaṃ śrutvā saumitrirvividhāndrumān |
ājahāra tataścakre parṇa śālāmariṃ dama || 14 ||
[Analyze grammar]

śuśrūṣamāṇamekāgramidaṃ vacanamabravīt |
aiṇeyaṃ māṃsamāhṛtya śālāṃ yakṣyāmahe vayam || 15 ||
[Analyze grammar]

sa lakṣmaṇaḥ kṛṣṇamṛgaṃ hatvā medhyaṃ patāpavān |
atha cikṣepa saumitriḥ samiddhe jātavedasi || 16 ||
[Analyze grammar]

taṃ tu pakvaṃ samājñāya niṣṭaptaṃ chinnaśoṇitam |
lakṣmaṇaḥ puruṣavyāghramatha rāghavamabravīt || 17 ||
[Analyze grammar]

ayaṃ kṛṣṇaḥ samāptāṅgaḥ śṛtaḥ kṛṣṇa mṛgo yathā |
devatā devasaṃkāśa yajasva kuśalo hyasi || 18 ||
[Analyze grammar]

rāmaḥ snātvā tu niyato guṇavāñjapyakovidaḥ |
pāpasaṃśamanaṃ rāmaścakāra balimuttamam || 19 ||
[Analyze grammar]

tāṃ vṛkṣaparṇacchadanāṃ manojñāṃ yathāpradeśaṃ sukṛtāṃ nivātām |
vāsāya sarve viviśuḥ sametāḥ sabhāṃ yathā deva gaṇāḥ sudharmām || 20 ||
[Analyze grammar]

anekanānāmṛgapakṣisaṃkule vicitrapuṣpastabalairdrumairyute |
vanottame vyālamṛgānunādite tathā vijahruḥ susukhaṃ jitendriyāḥ || 21 ||
[Analyze grammar]

suramyamāsādya tu citrakūṭaṃ nadīṃ ca tāṃ mālyavatīṃ sutīrthām |
nananda hṛṣṭo mṛgapakṣijuṣṭāṃ jahau ca duḥkhaṃ puravipravāsāt || 22 ||
[Analyze grammar]